മസ്തിഷ്ക സംബന്ധമായ രോഗങ്ങൾക്ക് "ആട്ടിൻ തല സൂപ്പ്"

മസ്തിഷ്ക സംബന്ധമായ രോഗങ്ങൾക്ക് "ആട്ടിൻ തല സൂപ്പ്"
.......................................................

മസ്തിഷ്ക സംബന്ധിയായ അനവധി രോഗങ്ങളില്‍ ആട്ടിന്‍തലസൂപ്പ് അത്യുത്തമമാണ്. മസ്തിഷ്കത്തെ ബാധിക്കുന്ന അപസ്മാരം, പക്ഷാഘാതം, അർദ്ധിതം മുതലായ രോഗങ്ങളിൽ ഈ സൂപ്പ് കഴിക്കുന്നത് അതീവ ഫലപ്രദമാണ്

ആട്ടിൻ തല സൂപ്പ് ഉണ്ടാക്കുന്ന വിധം
........................................................

അരിയാറ് (കുടകപ്പാലയരി, കാർകോകിലരി, ചെറുപുന്നയരി, കൊത്തമ്പാലരി, ഏലത്തരി, വിഴാലരി ) ജീരകം മൂന്ന് (ചെറുജീരകം, പെരുംജീരകം, കരിഞ്ചീരകം) ദശമൂലം (കുമ്പിള്‍, കൂവളം, മൂഞ്ഞ, പാതിരി, പലകപ്പയ്യാനി, ഓരില, മൂവില, കറുത്തചുണ്ട ,വെളുത്തചുണ്ട, ഞെരിഞ്ഞില്‍) , ആടലോടകവേര്, കൊടിത്തൂവവേര്, പുഷ്കരമൂലം, നന്നാറിക്കിഴങ്ങ്‌, കരിമ്പനക്കൂമ്പ്, തഴുതാമവേര്, പുത്തരിച്ചുണ്ടവേര്, കൊടുവേലിക്കിഴങ്ങ്‌, വരട്ടുമഞ്ഞള്‍, കാട്ടുതിപ്പലിവേര്, ചീനത്തിപ്പലി, ഇലവംഗത്തൊലി, പച്ചില, നാഗപ്പൂവ്, മുന്തിരിങ്ങ, ഇരട്ടിമധുരം, ചുക്ക്, കുരുമുളക് ഇവ 10 ഗ്രാം വീതം (ആകെ 37 മരുന്നുകള്‍ – 10 ഗ്രാം വീതം – 370 ഗ്രാം മരുന്ന് ഒരു ആട്ടിന്‍ തലയ്ക്ക് എന്ന കണക്കില്‍) മരുന്നുകളെല്ലാം കഴുകി ഇടിച്ചു ചതച്ച് ആട്ടിൻ തലയിൽ ( കറുത്ത ആട്ടിൻ തല കൂടുതൽ ശ്രേഷ്ഠമായി പറഞ്ഞുവരുന്നു) നിന്ന് പല്ല്, തൊലി, നാക്ക്, കൊമ്പ്, എന്നിവ മാത്രം കളഞ്ഞ് തലച്ചോറ് കളയാതെ കൊത്തിനുറുക്കി മുകളിൽ പറഞ്ഞ മരുന്നുകളെല്ലാം ചേർത്തു തിരുമ്മി 6 ഇടങ്ങഴി വെള്ളത്തില്‍ തിളപ്പിച്ച്‌ 6 നാഴിയാക്കി വറ്റിച്ച്, അതില്‍ നിന്ന് നാഴി കഷായവും ആറിലൊരു ഭാഗം ചണ്ടിയും എടുത്തു പ്രത്യേകമായി തിളപ്പിച്ചു 75 മില്ലിയാക്കി കുറുക്കി അരിച്ചെടുത്ത് തണുത്തതിന് ശേഷം 30 മില്ലി തേനും ഒരു രൂപാത്തൂക്കം (10 ഗ്രാം) കല്‍ക്കണ്ടവും മേമ്പൊടി ചേര്‍ത്ത് രാവിലെ കഴിക്കുക. ഇപ്രകാരം വൈകുന്നേരവും സേവിക്കുക. ഇങ്ങനെ മുടങ്ങാതെ ഒരാഴ്ച കഴിക്കുക നല്ല അഗ്നിബലം ഉള്ളവർ മാത്രം വൈദ്യ നിർദ്ദേശാനുസരണം, മേൽനോട്ടത്തിലും മാത്രം കഴിക്കാവുന്ന കഷായം ആണിത്.മരുന്ന് കഴിക്കുമ്പോൾ പഥ്യം അനിവാര്യമാണ് അതിനാൽ ദഹനക്കേട് ഉണ്ടാക്കുന്നത് ഒന്നും ഭക്ഷിക്കരുത് പച്ചക്കറികളും , ഇലക്കറികളും, ധാന്യ വർഗ്ഗങ്ങളും ധാരാളം കഴിക്കുക.

നന്ദി

ഡോ. പൗസ് പൗലോസ് BAMS, MS(Ay)

സീതാറാം ആയുർവേദ സ്പെഷ്യാലിറ്റി ഹോസ്പിറ്റൽ. തൃശ്ശൂർ

ഡോക്ടറെ ശരീരം മുഴുവൻ "നീർക്കെട്ടാണ്" ഒന്ന് തിരുമ്മി ഉഴിയണം

ഡോക്ടറെ ശരീരം മുഴുവൻ "നീർക്കെട്ടാണ്" ഒന്ന് തിരുമ്മി ഉഴിയണം
........................................................

ഈ ആധുനിക യുഗത്തിലും ഭൂരിഭാഗം ജനങ്ങൾക്കും ആയുർവേദത്തെക്കുറിച്ച് വളരെ വികലമായ ധാരണയാണുള്ളത്. പലപ്പോഴും രോഗികൾ ഒരു ആയുർവേദ ഡോക്ടറെ സമീപിക്കാറ് ഇൻറർനെറ്റിൽ രോഗലക്ഷണങ്ങളെ കുറിച്ചും രോഗത്തെക്കുറിച്ചും തിരഞ്ഞ്, ആരോടെങ്കിലും രോഗത്തെക്കുറിച്ച് ചർച്ച ചെയ്തും സ്വയം രോഗനിർണയം നടത്തിയും അതിനുള്ള ചികിത്സ സ്വയം നിശ്ചയിച്ചും ആണ് എന്താല്ലേ കേൾക്കുമ്പോൾ നല്ല രസമാണ്. ശരീരത്തിൽ ഏതു തരത്തിലുള്ള വേദന വന്നാലും അത് "നീരിറക്കം" ആണെന്ന് സ്വയമങ്ങ് നിശ്ചയിച്ച് ഞാൻ മുകളിൽ പറഞ്ഞ മാതിരി ഒന്ന് തിരുമ്മണം, ഉഴിയണം അല്ലെങ്കിൽ കിഴി കുത്തണം എന്ന് ചികിത്സയും നിശ്ചയിച്ചിട്ടാണ് രോഗികൾ പലപ്പോഴും എന്നെ ഉൾപ്പെടെ പല ഡോക്ടർമാരെയും സമീപിക്കാറ്. ഇത്തരത്തിലുള്ള രോഗികളുടെ സമീപനം എന്റെ സമപ്രായക്കാരും എന്നെക്കാളും സീനിയറും ആയിട്ടുള്ള പല ആയുർവേദ ഡോക്ടർമാരും പങ്കുവയ്ക്കാറുണ്ട്. ജനങ്ങളെ കുറ്റം പറഞ്ഞിട്ട് കാര്യമില്ല കാരണം അവർക്ക് ഈ പാരമ്പര്യം കാഴ്ചപ്പാടുകൾ പകർന്നുകൊടുത്തത് പണ്ടത്തെ നാട്ടുവൈദ്യൻമാരും, ഉഴിച്ചിൽ വിദഗ്ധരും, പാരമ്പര്യ വൈദ്യന്മാർ എന്ന് അവകാശപ്പെടുന്ന ഒരു കൂട്ടരും, പ്രകൃതിചികിത്സാ വിദഗ്ധർ എന്ന പേരിൽ വാതോരാതെ പ്രസംഗിക്കുന്ന ചില പ്രസംഗ തൊഴിലാളികളും ആണ്. ഈ പരമ്പരാഗത ചിന്താഗതിയിൽ നിന്നുള്ള മോചനം ഭൂരിഭാഗം ജനസമൂഹത്തിനും ഇന്നും ലഭിച്ചിട്ടില്ല എന്നുള്ളതാണ് യാഥാർത്ഥ്യം. ആയുർവേദം എന്നുപറഞ്ഞാൽ ചുവന്നരത്ത കഷായവും, ബലാരിഷ്ടവും, മഹേഷദ്രാവകവും(അല്ലെങ്കിൽ പോത്തിൻ ദ്രാവകം), ദശമൂലാരിഷ്ടവും, ധന്വന്തരം ഗുളികയും, കൊട്ടൻചുക്കാദി തൈലവും, പിണ്ഡ തൈലവും, രാസ്നാദി ചൂർണവും,അഷ്ട ചൂർണ്ണവും അമൃതാരിഷ്ടം, വെട്ടുമാറൻ ഗുളിക യും അതുകൂടാതെ തിരുമ്മലും, ഉഴിച്ചിലും, കിഴി കുത്തലും ആണെന്നാണ് ഇപ്പോഴും ഭൂരിഭാഗം ജനങ്ങളും ധരിച്ചുവെച്ചിരിക്കുന്നത്. അതിനെ വേറെ രീതിയിൽ പറയാം ചിലരുടെ സ്വാർത്ഥ താൽപര്യങ്ങൾക്കു വേണ്ടി രോഗികളെ മസ്തിഷ്കപ്രക്ഷാളനം ചെയ്ത് അവരുടെ ചിന്താരീതികൾ വളരെ കാലങ്ങളായി ഇത്തരത്തിൽ ആക്കി വച്ചിരിക്കുകയാണ്. പലപ്പോഴും രോഗികൾ വേദനയും ബുദ്ധിമുട്ടും വന്നാൽ ആദ്യം ഒരു ചോന്നരത്ത കഷായം അല്ലെങ്കിലും മഹാരാസനാദി കഷായം മേടിച്ച് കുടിച്ച് ഇത്തരത്തിലുള്ള ഏതെങ്കിലുമൊരു ഉഴിച്ചിൽ വിദഗ്ധരുടെ അടുത്തുപോയി യാതൊരു ശാസ്ത്രീയ അടിത്തറയും ഇല്ലാതെ കിഴി കുത്തിയും, ഉഴിഞ്ഞും ആ രോഗത്തെ അങ്ങ് കുളമാക്കി രോഗാവസ്ഥ മൂർച്ഛിപ്പിച്ചു പലപ്പോഴും ചികിത്സയ്ക്കായി സമീപിക്കാറുണ്ട്. ഇവരൊക്കെ ഇങ്ങനെ രോഗം കുളമായി കഴിഞ്ഞ് നമ്മുടെ അടുത്തു വരുമ്പോൾ പലപ്പോഴും പറയാറുള്ള ഒരു പതിവു പല്ലവി ഉണ്ട് "അതേ ഡോക്ടറെ വളരെ പ്രസിദ്ധനും, കഴിവുള്ളവനും പാരമ്പര്യമായി ഉഴിഞ്ഞ് നല്ല പരിചയമുള്ള നല്ല ഉഴിച്ചിൽ വിദഗ്ധനാണ് എന്താണെന്നറിയില്ല ആദ്യം ചെയ്തപ്പോൾ നല്ല സുഖമുണ്ടായിരുന്നു പിന്നീട് വേദന പൂർവാധികം ശക്തിയോടുകൂടി തിരിച്ചു വന്നു" , അവർ പറഞ്ഞത് സത്യമാണ് കാരണം വെറുതെ കിഴി കുത്തി ചൂടു കൊടുത്താൽ ആദ്യം ഒരു സുഖം കിട്ടും പക്ഷേ ഒരിക്കലും രോഗം മാറില്ല ഇതിനെയാണ് നമ്മുടെ നാട്ടിൽ "കയ്യിലെ പൈസ കൊടുത്ത് കടിക്കുന്ന പട്ടിയെ വാങ്ങുക" എന്ന് പറയുന്നത്. ശരിക്കും പറഞ്ഞാൽ ഇത്തരത്തിൽ ചികിത്സിച്ച് കുളമായി നമ്മളെ സമീപിക്കാനുള്ള രോഗികളുടെ അവസ്ഥയിൽ സഹതാപവും, സങ്കടവും ഒക്കെ തോന്നും കാരണം അവരുടെ അറിവില്ലായ്മയാണ് അവരെ ഇത്തരത്തിൽ അവരുടെ സമ്പത്തും, ആരോഗ്യവും ചൂഷണം ചെയ്യുന്നവരുടെ അടുത്ത് കൊണ്ടെത്തിക്കുന്നത്. പലപ്പോഴും ഈ രോഗികളെ എന്റെ കയ്യിൽ കിട്ടിയാൽ ഞാൻ "ആയുർവേദത്തെ" കുറിച്ച് ഒരു പതിനഞ്ച് മിനിറ്റ് ദൈർഘ്യമുള്ള ചെറിയ ഒരു ബോധവൽക്കരണ ക്ലാസ് എടുത്ത് കൊടുക്കാറുണ്ട്. അവിടെ ഞാൻ സാധാരണ രോഗികളോട് പറയാറുള്ളത് ഇതൊക്കെയാണ് "പ്രിയപ്പെട്ട ചേട്ടാ/ചേച്ചി ആയുർവേദം എന്നുപറഞ്ഞാൽ ചുവന്നരത്ത കഷായവും, മഹേഷ് ദ്രാവകവും, കെട്ടൻചുക്കാതി തൈലവും, തിരുമ്മലും,ഉഴിച്ചിലും,കിഴി കുത്തലും അല്ല അതിന് വ്യക്തമായ ഒരു ശാസ്ത്രീയ അടിത്തറയുണ്ട്, അടിസ്ഥാന സിദ്ധാന്തങ്ങൾ ഉണ്ട്. അടിസ്ഥാനസിദ്ധാന്തം ആകുന്ന അടിത്തറയിൽ കെട്ടപ്പെട്ട ഒരു മഹത്തായ ഭാരതീയ ശാസ്ത്ര ശാഖയാണ് ആയുർവേദം. ഏകദേശം മൂവായിരം വർഷത്തോളം പഴക്കമുള്ള ഒരു ശാസ്ത്രം ത്രിദോഷ സിദ്ധാന്തത്തെയും, പഞ്ചഭൂതസിദ്ധാന്തത്തെയും അടിസ്ഥാനപ്പെടുത്തി ചിട്ടപ്പെടുത്തിയ ചികിത്സാരീതികൾ ഉള്ള വളരെ മനോഹരമായ അല്ലെങ്കിൽ കാവ്യാത്മകമായ ഒരു ശാസ്ത്രം. പഠിക്കുന്തോറും ആഴവും, പരപ്പും വർധിച്ചുവരുന്ന ഒരു ശാസ്ത്രം അതിനെ ഒരു തിരുമ്മലിലും, ഉഴിച്ചിലിലോം തളച്ചിടരുത്. ആയുർവേദ ശാസ്ത്രത്തിൽ ഇന്ന് ആയിരക്കണക്കിന് മരുന്നുകൾ ഈ ആധുനിക യുഗത്തിൽ പോലും പല രോഗങ്ങൾക്കും ഉള്ള ചികിത്സയുമായി ബന്ധപ്പെട്ട് മാർക്കറ്റിൽ ലഭ്യമാണ്. നിങ്ങളീ പറഞ്ഞ ചുവന്നരത്ത കഷായവും, കൊട്ടൻചുക്കാദി തൈലത്തിലും മാത്രമല്ല ആയുർവേദ മരുന്നുകൾ ആയി ഉള്ളത്. അതുപോലെതന്നെ പരസ്യങ്ങൾ കണ്ടും, ഇൻറർനെറ്റിൽ തിരഞ്ഞും ദയവു ചെയ്തു മരുന്നുകൾ വാങ്ങി കഴിക്കരുത് അത് നിങ്ങളുടെ ആരോഗ്യത്തെ നശിപ്പിക്കും രോഗാവസ്ഥ കുളമാക്കും. നിങ്ങളുടെ മനസ്സിലുള്ള ധാരണ പോലെ തിരുമ്മലും, ഉഴിച്ചിലും, കിഴി കുത്തലും അല്ല ഈ ശാസ്ത്രത്തിൽ പ്രതിപാദിച്ചിരിക്കുന്ന ചികിത്സ. ആയുർവേദത്തിൽ വ്യക്തമായ പഞ്ചകർമ്മ ചികിത്സാ രീതികളുണ്ട്. നമ്മുടെ കേരളത്തിലെ മുഖമുദ്രയായ ചില സ്പെഷ്യൽ കേരള പഞ്ചകർമ്മ ചികിത്സാ രീതികളും ഉണ്ട് അതാണ് ഞവര കിഴി,ഞവരതേപ്പ്,പിഴിച്ചിൽ മുതലായവ ഇത്തരത്തിൽ പരമ്പരാഗതമായ ചികിത്സാരീതികൾ ഇന്നും നമ്മുടെ നാട്ടിൽ സത്യസന്ധമായി അനുവർത്തിക്കുന്നത് കൊണ്ടാണ് കേരളം ആയുർവേദത്തിന്റെ തലസ്ഥാനമയി മാറിയത്. "പലപ്പോഴും ഞാൻ ഈ ചെറിയ ഒരു ബോധവൽക്കരണ ക്ലാസ് ആയുർവേദത്തെ കുറിച്ച് രോഗികൾക്ക് എടുത്തു കൊടുക്കുമ്പോൾ മാത്രമാണ് പലരും ഇതാണ് ആയുർവേദം എന്ന് മനസ്സിലാക്കുന്നത്. അതിന് പ്രധാനകാരണം വളരെ കാലങ്ങളായി നമ്മുടെ ചിന്തകളെ മസ്തിഷ്ക പ്രക്ഷാളനം നടത്തി തെറ്റായ ചിന്താധാരകൾ ആയുർവേദത്തെക്കുറിച്ച് നിങ്ങളിൽ കുത്തിനിറച്ച ചില വ്യാജ വൈദ്യന്മാരും, വ്യാജ പാരമ്പര്യ ചികിത്സകരും, വ്യാജ പ്രകൃതിചികിത്സകരുമാണ് ഇതിന്റെ പ്രധാന ഉത്തരവാദികൾ. അവർ അവരുടെ സ്വാർത്ഥ ലാഭങ്ങൾക്ക് വേണ്ടിയാണ് ഇത് ഇപ്പോഴും തുടർന്നു ചെയ്തുകൊണ്ടിരിക്കുന്നത് എന്നതാണ് യാഥാർത്ഥ്യം. നിങ്ങളുടെ ചിന്തകളിൽ അവർ നിക്ഷേപിച്ചിരിക്കുന്ന ഇത്തരം തെറ്റായ ചിന്താധാരകൾ അവിടെ നിന്ന് എടുത്ത് മാറ്റിയാൽ മാത്രമേ ശരിയായിട്ടുള്ള ആയുർവ്വേദവും, ആയുർവേദ ചികിത്സയും നിങ്ങൾക്കു ചുറ്റും ഉണ്ട് എന്നുള്ള അവബോധം നിങ്ങളിൽ ഉണ്ടാവുകയുള്ളൂ.

നന്ദി

ഡോ. പൗസ് പൗലോസ് BAMS, MS(Ay)

സീതാറാം ആയുർവേദ സ്പെഷ്യാലിറ്റി ഹോസ്പിറ്റൽ. തൃശ്ശൂർ

കീടനാശിനിയുടെ ഉപയോഗം മനുഷ്യരെയാണോ കീടങ്ങളെ ആണോ കൊല്ലുന്നത്

കീടനാശിനിയുടെ ഉപയോഗം മനുഷ്യരെയാണോ കീടങ്ങളെ ആണോ കൊല്ലുന്നത്
........................................................

തികച്ചും വ്യത്യസ്തമായ ഒരു വിഷയമാണ് ഇന്ന് ഞാൻ നിങ്ങളുമായി പങ്കു വയ്ക്കുന്നത് കീടനാശിനികളുടെ അമിതമായ ഉപയോഗം നമ്മളിൽ പലരെയും രോഗികളാക്കുന്നു എന്ന വസ്തുത മുന്നിൽ കണ്ടുകൊണ്ട് ഈ ലേഖനം എഴുതുന്നത്. കൃഷി ഇടങ്ങളിൽ കീടനാശിനിയുടെ അമിതമായ ഉപയോഗം മൂലം പലരും മരിച്ചു എന്ന് ടി വിയിലൂടെയും മറ്റ് നവ മാധ്യമങ്ങളിലൂടെയും ഈയടുത്ത ദിവസങ്ങളിൽ നമ്മൾ കണ്ടതാണ്. അപ്പോഴാണ് ഈ കീടനാശിനിയെ കുറിച്ച് ഒന്ന് നെറ്റിൽ സെർച്ച് ചെയ്ത് നോക്കിയത് തികച്ചും ഭയപ്പെടുത്തുന്ന സെർച്ച് റിസൾട്ടുകൾ ആണ് എനിക്ക് ലഭിച്ചത്. പ്രകൃതിയുടെ ആവാസ വ്യവസ്ഥിതിയുടെ നിയമങ്ങൾക്കനുസരിച്ച് ഓരോ ചെറിയ കീടങ്ങൾക്കും അതിന്റെതായ ചില പങ്കുണ്ട്. ഈ കീടങ്ങളെ വിവിധ ജീവിതദശകളിൽ നിയന്ത്രിക്കുകയോ നശിപ്പിക്കുകയോ ചെയ്യുന്ന വസ്തുക്കൾ കീടനാശിനി (Pesticide) എന്നറിയപ്പെടുന്നു. കീടനാശിനി ഉൾപ്പെടെ കുമിൾ വർഗത്തെ നശിപ്പിക്കുന്ന ഫൻജിസൈഡുകൾ (fungicides), എലിവർഗ്ഗങ്ങളെ നശിപ്പിക്കുന്ന റോഡന്റിസൈഡ്സ് (rodenticides), പാഴ്ചെടികളെ/കളകളെ നശിപ്പിക്കുന്ന ഹെർബിസൈഡ്സ്(herbicides), ഒച്ച്‌ നാശിനികൾ (molluscides) ബാക്ടീരിയനാശിനികൾ (bactericide), വിരനാശിനികൾ( nematicide), അണുനാശിനികൾ(disinfectants), ടിക്ക് / ഉണ്ണി നാശിനി (acaricide), അകറ്റുന്നവ (repellents) തുടങ്ങി ജൈവവും അജൈവവും ആയ നിരവധി കീടനാശിനികളുണ്ട്. കൃഷി, ആരോഗ്യം, മൃഗ സംരക്ഷണം തുടങ്ങി വിവധ മേഖലകളിൽ ഇവയുടെ ഉപയോഗം സർവ സാധാരണമാണ്. കാർഷീകോല്പാദന വർധനയുടെ പ്രധാന കാരണം ഇവയുടെ ഉപയോഗമാണ്. വിഷതീവ്രതയുടെ അടിസ്‌ഥാനത്തിൽ, ഉപയോക്താക്കൾക്കും പൊതുജനങ്ങൾക്കും പെട്ടെന്ന് തിരിച്ചറിയുന്നതിലേക്കായി ഇവ സൂക്ഷിക്കുന്ന പാത്രങ്ങൾക്ക് പുറത്ത് ഉപയോഗിക്കുന്ന ലേബലുകൾക്കുള്ളിൽ , തീവ്രതയുടെ അവരോഹണ ക്രമമനുസ്സരിച്ചു ചുവപ്പ്‌, മഞ്ഞ, നീല ,പച്ച നിറങ്ങളിലുള്ള ചതുര അടയാളം പ്രാമുഖ്യമായി അച്ചടിക്കണമെന്ന് നിയമം നിഷ്ക്കർഷിക്കുന്നു. വിഷം കുറഞ്ഞ കീടനാശിനികളെ യാണ് പച്ച ലേബൽ അടയാളപ്പെടുത്തിയിരിക്കുന്നത് ( Lightly toxic).നിങ്ങൾ അറിഞ്ഞിരിക്കേണ്ട ഒരു പ്രധാനപ്പെട്ട വസ്തുത എന്തെന്നാൽ ലോക വ്യാപകമായി 30 ലക്ഷത്തോളം പേർക്ക് എല്ലാവർഷവും കീടനാശിനികളുടെ ഉപയോഗം മൂലം പല തരത്തിലുള്ള ഗുരുതര വിഷബാധ ഏൽക്കുകയും 2 ലക്ഷത്തോളം ജനങ്ങൾ മരണമടയുകയും ചെയ്യുന്നു. എന്റെ ചില കർഷക സുഹൃത്തുക്കൾ എന്നോട് വെള്ളപ്പൊക്കത്തിനു ശേഷം മണ്ണിന് പഴയ ഗുണമൊന്നുമില്ല എന്നും അതിനാൽ കീടനാശിനിയുടെ ഉപയോഗം കുറച്ചുകൂട്ടി അല്ലെങ്കിൽ വീട്ടാവശ്യത്തിന് ഉപയോഗിക്കാൻ പോലും പച്ചക്കറികൾ ലഭിക്കുന്നില്ല എന്നു പറഞ്ഞു.എനിക്ക് പറയാനുള്ളത് ഇത്തരത്തിൽ നമ്മൾ കീടനാശിനികൾ ഉപയോഗിക്കുമ്പോൾ കീടങ്ങളെയാണോ നമ്മളെയാണോ യഥാർത്ഥത്തിൽ കൊല്ലുന്നത് എന്ന് വീണ്ടും വിചാരം നടത്തേണ്ട സമയമായി.

അശാസ്ത്രീയമായ കീടനാശിനി ഉപയോഗം
.....................................................

അശാസ്ത്ര‍ീയമായ മരുന്നടിയാണ് മിക്കയിടങ്ങളിലും നടക്കുന്നത്. അതാണ് പ്രശ്നങ്ങൾ കൂടുതൽ വഷളാക്കുന്നതും. പലതരം കീടനാശിനികൾ കൂട്ടിക്കലർത്തി അടിക്കുന്നതും പതിവാണ്. ഇതു ദോഷകരമായ പ്രതിപ്രവർത്തനങ്ങൾക്ക് ഇടയ‍ാക്കാം. കൂടുതൽ വിഷമടിച്ചാൽ കൂടുതൽ വിളവു കിട്ടുമെന്ന ലാഭക്കൊതിയിൽ പച്ചക്കറിപ്പാടങ്ങൾ വിഷത്തിൽ മുങ്ങുന്ന കാഴ്ചയാണ് കാണുന്നത്. വളരെ കുറഞ്ഞ അളവിലാണെങ്കിൽ പോലും കീടനാശിനികളുടെ അംശം ദീർഘനാൾ ഉള്ളിലെത്തിയാൽ പല ആരോഗ്യപ്രശ്നങ്ങൾക്കും കാരണമാകും. മനുഷ്യരിലെ കൊഴുപ്പു കലകളിലാണ് വിഷാംശം അടിഞ്ഞുകൂടുന്നത്. ഇങ്ങനെ ഉള്ളിലെത്തുന്ന ചില രാസവസ്തുക്കൾ കാലക്രമേണ വിഘട‍ിച്ച് ശരീരത്തിൽ നിന്നും നീക്കപ്പെടുന്നു.എന്നാൽ ചില രാസവസ്തുക്കൾ ശരീരത്തിൽ നിന്ന് നീക്കം ചെയ്യാൻ കഴിയാതെയായി അവിടെത്തന്നെ കെട്ടികിടക്കുന്നു. ആയുർവേദശാസ്ത്രത്തിൽ ഇത്തരത്തിൽ കാലങ്ങളോളം ശരീരത്തിൽ തങ്ങി നിൽക്കുകയും വിവിധ കാലാവസ്ഥകളിലും, ശരീരത്തിലെ രോഗപ്രതിരോധശക്തി കുറയുമ്പോഴും മനുഷ്യശരീരത്തിൽ ആരോഗ്യപ്രശ്നങ്ങളുണ്ടാക്കുന്ന ഈ വിഷത്തെ "ദൂഷീവിഷം" എന്നാണ് പറയുന്നത്. ഇത്തരത്തിൽ ശരീരത്തിൽ കെട്ടികിടക്കുന്ന "ദൂഷീവിഷം" സപ്തധാതുക്കളേയും ദുഷിപ്പിക്കുന്നു. പലതരം വിഷയങ്ങളുടെ സംയുക്തം ശരീരത്തിൽ എത്തിയാൽ ഗരമെ എന്നും ഒക്കെ ആയുർവേദത്തിൽ പറയും, ഇത്തരത്തിലുള്ള വിഷങ്ങളെ ശരീരത്തിൽനിന്നും നിർഹരിക്കുവാൻ ശക്തമായ ആയുർവേദ ഔഷധങ്ങളും, പഞ്ചകർമ്മചികിത്സകളും ആവശ്യമാണ്. ഈ കാലഘട്ടത്തിൽ രണ്ടു തരത്തിലുള്ള കീടനാശിനികളാണ് പ്രധാനമായും ഉപയോഗിച്ചു കാണുന്നത്. ഒാർഗാനോഫോസ്ഫറസ് സംയുക്തങ്ങളും ഒാർഗാനോക്ലേ‍ാറിൻ സംയുക്തങ്ങളും. ഒർഗാനോഫോസ്ഫ‍േറ്റുകൾ കീടങ്ങളുടെ നാഡിവ്യൂഹത്തെ പ്രവർത്തനത്തെ തകരാറിലാക്കുന്നവയാണ്. സാമാന്യയുക്തിയിൽ ചിന്തിച്ചാൽ സമാനമായ ജൈവരാസഘടനയുള്ള മനുഷ്യരുടെ തലച്ച‍ോറിനും ഇവ ദോഷകരമായേക്കാമെന്നു മനസ്സിലാകും. ചില പഠനങ്ങൾ ഇതു സംബന്ധിച്ചു നടന്നിട്ടുമുണ്ട്.

കീടനാശിനികൾ ശരീരത്തിലുണ്ടാകുന്ന വിവിധങ്ങളായ രോഗങ്ങൾ
........................................................

ചില കീടനാശിനികൾ ശരീരത്തിലെത്തിയാൽ ചില ഹോർമോണുകളെ പോലെ പ്രവർത്തിക്കും. പല കീടനാശിനികൾക്കും ഈസ്ട്രജനു സമാനമായ ശേഷികളുണ്ടെന്നു കണ്ടെത്തിയിട്ടുണ്ട്.ഇത്തരം കീടനാശിനികൾ ശരീരത്തിലെത്തിയാൽ ശരീരം അതിനെ ഈസ്ട്രോജൻ എന്ന ഹോർമോൺ ആയി തെറ്റിദ്ധരിക്കും എന്നിട്ട് ഈസ്ട്രോജൻ ഹോർമോൺ ശരീരത്തിൽ കൂടിയാൽ ഉണ്ടാക്കാറുള്ള സമാനമായ ജൈവ മാറ്റങ്ങൾ ശരീരത്തിൽ ഉണ്ടാകും. ഇത് ഹോർമോൺ അസന്തുലിതാവസ്ഥയ്ക്കും അതുവഴി അർബുദങ്ങൾക്കും കാരണമാകും. ഇതിനു ചിലപ്പോൾ ദശാബ്ദങ്ങളെടുക്കാം.
കീടനാശിനികൾ നാഡീവ്യൂഹത്തിന്റെ പ്രവർത്തനത്തെ മന്ദ‍ീഭവിപ്പിക്കുന്നതിനാൽ കാലിലും കൈയിലും പെരുപ്പും, മരവിപ്പും പോലെ ന്യൂറോപ്പതിക്കു സമാനമായ പ്രശ്നങ്ങളുണ്ട‍ാക്കാം. അതുപോലെതന്നെ ഉദരസംബന്ധമായ പലരോഗങ്ങൾക്കും കീടനാശിനി ഒരു പ്രധാന കാരണമാണ് ആമാശയം, കുടൽ എന്നിവിടങ്ങളിൽ നീർവീക്കം, ഗ്യാസ്ട്രൈറ്റിസ്, ആമാശയവ്രണങ്ങൾ പോലുള്ള ഗുരുതര രോഗാവസ്ഥകൾ വന്നുചേരാം അതുപോലെതന്നെ തലച്ചോറിന്റെ പ്രവർത്തനത്തെ ബാധിക്കുകയും ഒാർമക്കുറവ്,പേശീതളർച്ച, ബലക്ഷയം എന്നിവയ്ക്കു കാരണമാകാം. അതിനാൽ നിങ്ങൾ വീട്ടാവശ്യങ്ങൾക്കുള്ള പച്ചക്കറികൾ കൃഷി ചെയ്യുകയാണെങ്കിൽ അവയിൽ കീടനാശിനികൾ പരമാവധി ഉപയോഗിക്കാതെ കൃഷി ചെയ്യാൻ ശ്രമിക്കുക. നിങ്ങൾ മാർക്കറ്റിൽ നിന്ന് വാങ്ങുന്ന പലതരം ഭക്ഷ്യോൽപന്നങ്ങളിൽ വളരെയധികം കീടനാശിനികൾ അളവിൽ അധികമായി ചേർത്ത് ഉത്പാദിപ്പിക്കുന്നവയാണ്. നമ്മുടെ രാജ്യത്ത് കീടനാശിനികൾ ഉപയോഗിക്കുന്ന അളവുകളെ സംബന്ധിച്ചുള്ള മാനദണ്ഡങ്ങൾ ഉണ്ടെങ്കിലും അമിതലാഭ കൊതി കാരണം പലരും അത് പാലിക്കാറില്ല.പലരാജ്യങ്ങളിലും നിരോധിച്ച കീടനാശിനികളാണ് നമ്മുടെ നാട്ടിൽ നാം യാതൊരു മാനദണ്ഡവുമില്ലാതെ ഉപയോഗിക്കുന്നത് അതിന് ദൂഷ്യവശങ്ങൾ എത്രത്തോളം ഭയാനകമാണെന്ന് നാം പലപ്പോഴും ചിന്തിക്കാറില്ല. വെറുതെയിരിക്കുമ്പോൾ നമുക്ക് ചുറ്റും നോക്കിയാൽ നമുക്ക് കിഡ്നിക്ക് സുഖം വന്ന രോഗികളെയും, കരളിന് അസുഖം വന്ന രോഗികളെയും നിഷ്പ്രയാസം കണ്ടെത്താൻ സാധിക്കും അതുപോലെതന്നെ അർബുദവും ഇന്ന് സർവ്വസാധാരണമായ ഒരു രോഗമായി മാറിയിരിക്കുന്നു, ജലവും വായുവും, മണ്ണും ഇത്തരത്തിൽ പല കീടനാശിനികളാൽ ദുഷിക്കുമ്പോൾ ആണ് പലപ്പോഴും നമ്മൾ രോഗികളാക്കുന്നത്. അതിനാൽ നിങ്ങൾ കൃഷി ചെയ്യുമ്പോൾ കീടനാശിനികൾ കുറിച്ച് ജൈവരീതിയിൽ കൃഷി ചെയ്യാൻ ശ്രമിക്കുക. നമ്മൾ കൃഷി ചെയ്തുണ്ടാക്കുന്ന ഭക്ഷ്യവസ്തുക്കൾ ഭക്ഷിച്ച് മറ്റൊരു വ്യക്തി രോഗി ആവാതിരിക്കട്ടെ അതിന് പ്രതിജ്ഞാബദ്ധരാവുക. ഇത്തരത്തിലുള്ള ഒരു ഭക്ഷ്യ സംസ്കാരം വളർത്തിയെടുക്കാൻ നമുക്ക് പരിശ്രമിക്കാം.

ഈ ലേഖനം നിങ്ങൾക്ക് ഇഷ്ടപ്പെടും എന്ന് പ്രതീക്ഷിക്കുന്നു. ഇതിലുള്ള ആശയങ്ങൾ അർത്ഥവത്താണെന്ന് തോന്നുകയാണെങ്കിൽ മറ്റുള്ളവരിലേക്കും പങ്കുവച്ച് എത്തിക്കുക.

നന്ദി

ഡോ. പൗസ് പൗലോസ് BAMS, MS(Ay)

എന്തുകൊണ്ടാണ് മനസ്സ് "ഹൃദയത്തിൽ" ആണെന്ന് ആയുർവേദത്തിൽ പറയുന്നത്

എന്തുകൊണ്ടാണ് മനസ്സ് "ഹൃദയത്തിൽ" ആണെന്ന് ആയുർവേദത്തിൽ പറയുന്നത്
.....................................................

ഈ പുതുവർഷം ആയിട്ട് എന്തെങ്കിലും പുതുമയുള്ള ലേഖനം എഴുതണം എന്ന് തോന്നി. അതിനാലാണ് ഒരുപാട് നാളായി എന്റെ ചിന്തയിൽ കുടുങ്ങിക്കിടക്കുന്ന ഒരു ആശയം ഈ പുതുവർഷം നിങ്ങളുമായി പങ്കു വയ്ക്കുന്നത്. ആയുർവേദ ശാസ്ത്രത്തിൽ "മനസ്സ്" ഹൃദയത്തിൽ ആണെന്ന് പലഭാഗങ്ങളിലും പറയുന്നുണ്ട്, ഞാൻ പലപ്പോഴും ചിന്തിച്ചിട്ടുണ്ട് ചിന്തയുടെ ഇരിപ്പിടം ശിരസ്സാണ് എന്ന് ആചാര്യൻ പറയുന്നുണ്ടെങ്കിലും എന്തുകൊണ്ടാണ് "ഞാൻ എന്ന ഭാവത്തിന്റെ" ഇരിപ്പിടമായ ശിരസ്സിനെ അവഗണിച്ചു കൊണ്ട് ആചാര്യൻ "മനസ്സ്" നിങ്ങളുടെ ഹൃദയത്തിലാണ് സ്ഥിതി ചെയ്യുന്നതെന്ന് പറഞ്ഞതെന്ന്. എന്നെ പലപ്പോഴും ചിന്താക്കുഴപ്പത്തിൽ ആഴ്ത്തിയ ഒരു ഒരു സംശയമാണിത് പലപ്പോഴും ഉത്തരം കിട്ടാത്ത ഒരു സംശയം. നമ്മൾ പലപ്പോഴും ചിലർ അവരുടെ ജീവിതത്തിലുണ്ടാകുന്ന സമ്മർദ്ദ ഘട്ടങ്ങളിൽ അല്ലെങ്കിൽ ചില സംഘർഷ ഘട്ടങ്ങളിൽ "ആ വ്യക്തി ഹൃദയം പൊട്ടി മരിച്ചു" എന്നും ജീവിതത്തിൽ ചില വ്യക്തികൾക്ക് പ്രതിസന്ധികളിൽ ഉണ്ടാകുന്ന ഭാരം "ഹൃദയത്തിന് താങ്ങാൻ കഴിയുന്നില്ല എന്നും"ചില അപ്രതീക്ഷിത സംഭവങ്ങൾക്ക് സാക്ഷ്യം വഹിക്കേണ്ടി വരുമ്പോൾ "ഹൃദയം നിശ്ചലമായ അവസ്ഥയുണ്ടായി"എന്നും ചില വ്യക്തികൾ "ശിലാഹൃദയം" ഉള്ളവരാണെന്നും എന്നൊക്കെ ഒരുപക്ഷേ വളരെ കാവ്യാത്മകമായി പറഞ്ഞുകേട്ടിട്ടുണ്ട്. ജീവിതയാത്രയിൽ പലതരത്തിലുള്ള അനുഭവങ്ങളിലൂടെ രൂപപ്പെടുന്ന ചിന്തകളും ആ ചിന്തകൾ മൂലം നമ്മളിൽ രൂപാന്തരപ്പെടുന്ന വികാരങ്ങളും ആ വികാരങ്ങളിൽ നിന്നും ഉടലെടുക്കുന്ന പ്രവർത്തികളും പരസ്പരം ബന്ധപ്പെട്ടിരിക്കുന്നു. നമ്മുടെ ജീവിതത്തിലെ ചില പ്രതികൂല നിമിഷങ്ങൾ അല്ലെങ്കിൽ ചില അപ്രതീക്ഷിത സംഭവങ്ങൾക്ക് സാക്ഷ്യം വഹിക്കേണ്ട സന്ദർഭങ്ങളിൽ
നമ്മളിൽ രൂപപ്പെടുന്ന ചിന്തകളെയും ആ ചിന്തകളിൽ നിന്നുടലെടുക്കുന്ന വികാരങ്ങളെയും നമുക്ക് ഒന്ന് വിചിന്തനം ചെയ്യാം ഉദാഹരണത്തിന് അമിതമായ ദേഷ്യം,അമിതമായ സങ്കടം, അമിതമായ ഉത്കണ്ഠ, അമിതമായ മാനസിക സമ്മർദ്ദം മുതലായവ ഈ വൈകാരിക ഘട്ടങ്ങളിലെല്ലാം ചില പ്രത്യേക ഹോർമോണുകൾ നമ്മുടെ ശിരസ്സിലും, അഡ്രീനൽ ഗ്രന്ഥിയും പുറപ്പെടുവിക്കുന്നു ഈ ഹോർമോണുകൾക്ക് നമ്മുടെ രക്തത്തിലെ ജൈവഘടനയിൽ (blood biochemistry) മാറ്റം വരുത്തുവാൻ സാധിക്കും. അതുപോലെതന്നെ നമ്മുടെ ശരീരത്തിലെ രക്തമാണ് ഈ ഹോർമോണുകളെ ലക്ഷ്യസ്ഥാനത്ത് എത്തിക്കുന്നത്. ഈ ഉദ്യമത്തിന് നമ്മുടെ രക്തത്തെ സഹായിക്കുന്നത് നമ്മുടെ ഈ കൊച്ച് ഹൃദയവും, നമ്മൾ ജനിച്ച അന്നുമുതൽ ഒരുനിമിഷംപോലും വിശ്രമിക്കാതെ ആ ഹൃദയം നമുക്കുവേണ്ടി ഇടിച്ചു കൊണ്ടിരിക്കയാണ്. നമ്മൾ അടിയന്തരമായി നേരിടേണ്ട ചില ഘട്ടങ്ങളിൽ നമ്മുടെ ശരീരത്തിൽ ഉൽപാദിപ്പിക്കുന്ന ഒരു ഹോർമോണാണ് അഡ്രിനാലിനും , നോർഅഡ്രിനാലിനും ഈ ഹോർമോണുകൾ ഉത്പാദിപ്പിക്കപ്പെടുമ്പോൾ നിങ്ങളുടെ ബ്ലഡ് പ്രഷർ വർദ്ധിക്കുന്നു അതോടൊപ്പം നിങ്ങളുടെ
ഹൃദയമിടിപ്പും കൂടുന്നു.നിങ്ങൾ ഒരു പ്രത്യേക സാഹചര്യത്തെ നേരിടാൻ നിങ്ങളെ ശക്തരാക്കും വിധം നിങ്ങളുടെ ശരീരത്തിലെ രക്തയോട്ടം കൂടുന്നു. അത് നമുക്കു വേണ്ടി ആ സാഹചര്യത്തിൽ ചെയ്യുന്നത് നമ്മുടെ ഹൃദയമാണ് . അതുപോലെതന്നെ നിങ്ങൾ സമ്മർദ്ദ ജനകമായ ഒരു സാഹചര്യത്തിൽ ജീവിക്കുമ്പോൾ അല്ലെങ്കിൽ സമ്മർദ്ദ ജനകമായ സാഹചര്യത്തിലൂടെ കടന്നു പോകേണ്ട ഒരു അവസരം ജീവിതത്തിൽ ഉണ്ടാകുമ്പോൾ നിങ്ങളുടെ ശരീരത്തിൽ ഉല്പാദിപ്പിക്കുന്ന ഒരു പ്രധാന ഹോർമോണാണ് "കോർട്ടിസോൾ" ഇത് നിങ്ങളുടെ ബ്ലഡ് പ്രഷർ ഉയർത്തുന്നതിനു വേണ്ടി നിങ്ങളുടെ ഹൃദയത്തിലും രക്തധമനികളിലും സമ്മർദ്ദം ചെലുത്തുന്നു. അതുമൂലം നിങ്ങളുടെ ബ്ലഡ് പ്രഷർ ഉയരുന്നു ഇവിടെയും ഈ സമ്മർദത്തെയും മുഴുവൻ താങ്ങേണ്ടി വരുന്നത് നിങ്ങളുടെ കൊച്ചു ഹൃദയത്തിലാണ്. നിങ്ങൾ നിങ്ങളുടെ പഞ്ചേന്ദ്രിയങ്ങളിലൂടെ നേടിയെടുക്കുന്ന അറിവുകളും അതിൽ നിന്നും ഉടലെടുക്കുന്ന ചിന്തകളും ആ ചിന്തകളിൽ നിന്നും ഉടലെടുക്കുന്ന നല്ലതും/മോശവുമായ അല്ലെങ്കിൽ നെഗറ്റീവും/പോസിറ്റീവും ആയ വികാരങ്ങളുടെ സമ്മർദ്ദങ്ങൾ മുഴുവൻ അനുഭവിക്കേണ്ടി വരുന്നത് ഈ പാവം ഹൃദയത്തിലാണ്.നിങ്ങൾ അറിഞ്ഞിരിക്കേണ്ട മറ്റൊരുകാര്യം ഉണ്ട് നിങ്ങൾ സന്തോഷവാനാ/ സന്തോഷവതിയാ ആയിരിക്കുമ്പോൾ നിങ്ങളുടെ ശരീരത്തിൽ ഉല്പാദിപ്പിക്കപ്പെടുന്ന രണ്ടു ഹോർമോണുകളാണ് എൻഡോർഫിനും, ഡോപ്പാമിനും ഈ രണ്ടു ഹോർമോണുകളും നിങ്ങളുടെ ഹൃദയത്തിൻറെ ആരോഗ്യത്തിന് സഹായിക്കുന്ന രണ്ടു ഹോർമോണുകളാണ്. അതുപോലെതന്നെ പുരുഷ ശരീരത്തിൽ ടെസ്റ്റോസ്റ്റിറോൺ അമിതമായി കൂടിയാലും, അതുപോലെതന്നെ സ്ത്രീകളുടെ ശരീരത്തിൽ ഈസ്ട്രോജൻ കുറഞ്ഞാലും ഹൃദയത്തിന് നല്ലതല്ല. അതിനാലാണ് ആർത്തവ വിരാമത്തിൽ ഈസ്ട്രോജൻ കുറയുമ്പോൾ സ്ത്രീകളിൽ ഹൃദ്രോഗസാധ്യത കൂടുന്നത്. ചില ആളുകൾ ജിമ്മിൽ പോകുമ്പോൾ മസിൽ പെരുപ്പിക്കാൻ ടെസ്റ്റോസ്റ്റിറോൺ ഇൻജക്ഷൻ കുത്താറുണ്ട് അത് ഹൃദയത്തിന്റെ ആരോഗ്യത്തിന് നല്ലതല്ല അതു നിങ്ങളിൽ ഹൃദ്രോഗസാധ്യത വർധിപ്പിക്കുന്നു. ഈ ഹോർമോണുകൾ നല്ല ഒരു അളവിൽ (അമിതമായി കൂടുകയോ വളരെ ചെറിയ അളവിൽ കുറയുകയോ ചെയ്യാതെ) നിങ്ങളുടെ ശരീരത്തിൽ കൃത്യമായ അളവിൽ ഉണ്ടാകുന്നതിന് ചെറു വ്യായാമങ്ങളും , നിങ്ങളെ പൊട്ടിച്ചിരിപ്പിക്കുന്ന ഏതെങ്കിലും ടിവി പ്രോഗ്രാം കാണുന്നതും, ഇഷ്ടപ്പെടുന്ന ഏതെങ്കിലും വ്യക്തികളുടെ കൂടി നിങ്ങളുടെ ഒഴിവ് സമയങ്ങൾ ചിലവഴിക്കുക,ഗാർഡനിംഗ്, സ്വിമ്മിംഗ്, ഡാൻസിങ്, യോഗ, ഏറോബിക് എക്സർസൈസുകൾ മുതലായി നിങ്ങൾ ആസ്വദിച്ചു ചെയ്യുന്ന പ്രവർത്തികളെല്ലാം സഹായിക്കും. ഇത്തരത്തിൽ നിങ്ങൾ ചെയ്യുന്ന പ്രവൃത്തികൾ നിങ്ങളുടെ ഹൃദയത്തെ സംരക്ഷിക്കും അതുമൂലം നിങ്ങളുടെ ആയുസ്സ് വർദ്ധിക്കും. പഞ്ചേന്ദ്രിയങ്ങളുടെ നിങ്ങൾക്ക് ലഭിക്കുന്ന അറിവുകളിൽ നിന്ന് നിങ്ങളുടെ ചിന്തകളെ ഉത്പാദിപ്പിക്കുക (cognitive process)എന്നതും ആ ചിന്തകളിൽ നിന്നും ഉടലെടുക്കുന്ന വികാരങ്ങളെ നിയന്ത്രിക്കുക എന്നതും മാത്രമാണ് "ഞാൻ എന്ന ഭാവം നിങ്ങൾക്ക് നൽകുന്ന" ശിരസ്സിന്റെ പ്രധാന ധർമ്മം. എന്നാൽ നിങ്ങളിൽ ഉടലെടുക്കുന്ന ആ ചിന്തകൾ കാരണം നിങ്ങളുടെ വിവിധ ഗ്രന്ഥികൾ ഉത്പാദിപ്പിക്കുന്ന ഹോർമോണുകളുടെ സമ്മർദ്ദം മുഴുവൻ താങ്ങേണ്ടത് ഈ പാവം ഹൃദയമാണ് അതിനാൽ ആകാം ഈ "സമ്മർദ്ദം താങ്ങിയായ" ഹൃദയത്തെ ആചാര്യൻ "മനസ്സ്" എന്ന ഓമനപ്പേരിട്ട് വിളിച്ചത്. അതിനാൽ നിങ്ങൾ നിങ്ങളുടെ ഹൃദയത്തെ സമ്മർദ്ദത്തിലാക്കുന്ന പ്രവർത്തികളിൽ നിന്നും പരമാവധി വിട്ടു നിൽക്കുക അല്ലെങ്കിൽ നിങ്ങളുടെ ഹൃദയത്തിന്റെ ആരോഗ്യത്തെ സംരക്ഷിക്കുന്ന യോഗയും മറ്റു വ്യായാമങ്ങളും ചെയ്യുക.നിങ്ങൾക്ക് വേണ്ടിയും നിങ്ങളെ സ്നേഹിക്കുന്നവർക്ക് വേണ്ടിയും ഒരു മനുഷ്യായുസ്സ് മുഴുവൻ നിർത്താതെ ഇടിക്കുന്ന നിങ്ങളുടെ ഹൃദയത്തെ സംരക്ഷിക്കുക.

ഈ ലേഖനം നിങ്ങൾക്ക് ഇഷ്ടപ്പെടും എന്ന് പ്രതീക്ഷിക്കുന്നു. ഇതിലുള്ള ആശയങ്ങൾ അർത്ഥവത്താണെന്ന് തോന്നുകയാണെങ്കിൽ മറ്റുള്ളവരിലേക്കും പങ്കുവച്ച് എത്തിക്കുക.

നന്ദി

ഡോ. പൗസ് പൗലോസ് BAMS, MS(Ay)

സീതാറാം ആയുർവേദ സ്പെഷ്യാലിറ്റി ഹോസ്പിറ്റൽ. തൃശ്ശൂർ

നിത്യജീവിതത്തിൽ നമ്മേ പിടിപെടാറുള്ള രോഗങ്ങളെ തടയാൻ ചില പൊടിക്കൈകൾ

നിത്യജീവിതത്തിൽ നമ്മേ പിടിപെടാറുള്ള രോഗങ്ങളെ തടയാൻ ചില പൊടിക്കൈകൾ

1 പനി

ഏതു തരാം പനി വന്നാലും വിശ്രമം ആവശ്യമാണ്.പനിയുടെ ചൂട് കൂടുതൽ ആണെങ്കിൽ തുണി നനച്ചു ശരീരം മുഴുവൻ തുടക്കണം.ഇടവിട്ടുണ്ടാകുന്ന പനി അകറ്റാന്‍ തുളസിയിലനീരില്‍ കുരുമുളകുപൊടി ചേർത്ത് ‌ കഴിച്ചാല്‍ മതി.ഇഞ്ചി, ചുവന്നുള്ളി, തുളസി ഇവയുടെ നീരെടുത്ത്‌ തേന്‍ ചേർത്ത് ‌ കഴിച്ചാല്‍ പനി, ശ്വാസംമുട്ടല്‍, ചുമ എന്നിവ ശമിക്കും.മുത്തങ്ങ അരച്ച്‌ പാലില്‍ ചേർത്ത് ‌ കഴിക്കുന്നത്‌ പനിയും, നീർക്കെകട്ടും മാറാന്‍ ഉത്തമമാണ്‌.പര്‍പ്പടകം, മുത്തങ്ങാ, ചിറ്റമൃത്, ചുക്ക് ഇവ കഷായം വച്ച് കഴിക്കുക. കിരിയാത്ത് കഷായം സമൂലം വെച്ച് കഴിക്കുന്നതും പനി മാറാൻ നല്ലതാണ്.

ചുക്ക്കാപ്പി

കാട്ടുതുളസി,കൃഷ്ണതുളസി, പനികൂർക്കയില, ചുവന്ന ഉള്ളി, ചുക്ക്,കുരുമുളക് എന്നിവ തിളപ്പിച്ച് അതിൽ തെങ്ങിൻ ചക്കര ചേർത്ത് അൽപം കാപ്പിപ്പൊടിയും ഇട്ട് തിളപ്പിച്ച് ചുക്കുകാപ്പി പനി പെട്ടെന്ന് വിട്ടു മാറാൻ നല്ലതാണ്.

2 ജലദോഷം

ചെറുനാരങ്ങാനീരില്‍ തേന്‍ചേര്‍ത്തു കഴിക്കുക.അല്പം മഞ്ഞള്‍പൊടി വെള്ളത്തില്‍ കലര്‍ത്തി തിളപ്പിച്ച് ആവി കൊള്ളുക. ജലദോഷത്തെ തുടര്‍ന്നുള്ള തലയുടെ ഭാരം കുറയും.തുളസിയിലനീര്‌, ചുവന്നുള്ളിനീര്‌, ചെറുതേന്‍ ഇവ ചേര്ത്ത് ‌ സേവിക്കുക.തുളസിയില, ചുക്ക്‌, തിപ്പലി ഇവയെല്ലാംകൂടി ഇട്ട്‌ കഷായംവച്ച്‌ കൂടെക്കൂടെ കുടിക്കുക.യൂക്കാലി തൈലം വെള്ളത്തിലൊഴിച്ച്‌ ആവിപിടിച്ചാല്‍ മൂക്കടപ്പ്‌, പനി, ജലദോഷം, കഫക്കെട്ട്‌ എന്നിവ മാറാന്‍ സഹായിക്കും.

3 തൊണ്ടവേദന

കല്‍ക്കണ്ടവും, ചുക്കും , ജീരകവും ഒന്നിച്ചു പൊടിച്ചു ഇടവിട്ടു കഴിക്കുക.ഉപ്പിട്ട് തിളപ്പിച്ച് ഇളം ചുടുവെള്ളം കവിൾകൊള്ളുന്നത് നല്ലതാണ്. മുയൽച്ചെവി, കല്ലുപ്പും അരച്ച് തൊണ്ട വേദനയുള്ള ഭാഗത്ത് ലേപനം ഇടുന്നത് നല്ലതെന്ന്.

4ചുമ

തേനും, നെയ്യും, കുരുമുളക് പൊടിച്ചതും ചേര്‍ത്ത് കഴിച്ചാല്‍ ചുമയ്ക്ക് ആശ്വാസം ലഭിക്കും.
ആടലോടകം, ശര്‍ക്കര, കുരുമുളക് ചേര്‍ത്ത് കഷായം വെച്ചു കുടിക്കുക. ആടലോടകത്തിന്റെ ഇല, വറുത്തു മലരും സമം കൂട്ടിപൊടിച്ച് ആ പൊടി പഞ്ചസാര കൂട്ടി കഴിക്കുക. ആടലോടകത്തിൻറെ ഇല വാട്ടിപ്പിഴിഞ്ഞ് തേനിൽ കഴിക്കുക.

5:തലവേദന

കടുക് അരച്ചു നെറ്റിയില്‍ പുരട്ടുക.
ചുവന്നുള്ളിയും, കല്ലുപ്പും അരച്ചു നെറ്റിയില്‍ പുരട്ടുക.ചെറുനാരങ്ങ നീരില്‍ ചന്ദനവും കര്‍പ്പൂരവും ചാലിച്ച് നെറ്റിയിലിടുന്നത് ആശ്വാസമേകും. ചുക്ക്, കുരുമുളക്, മഞ്ഞള്‍ എന്നിവ തുല്യ അളവിലെടുത്ത് പൊടിച്ച് തുണിയില്‍ വെച്ച് തിരിയാക്കി നെയ്യില്‍ മുക്കി കത്തിച്ച് പുക ശ്വസിക്കുന്നത് സൈനസൈറ്റിസ് തലവേദനക്ക് ഫലപ്രദമാണ്. മുലപ്പാല്‍ കൊണ്ട് നസ്യം ചെയ്യുന്നതും നല്ലതാണ്. നെല്ലിക്കയുടെ തൊലി പശുവിന്‍ പാലിലരച്ച് നെറ്റിയിലിടുന്നതും ആശ്വാസം നല്‍കും.

6:രക്തസമ്മര്‍ദ്ധം

മുരിങ്ങയില നിത്യവും കഴിക്കുക.
ജീരകം, വെളുത്തുള്ളി, ഉലുവാ,എന്നിവ വറുത്തു അതിട്ട് വെള്ളം തിളപ്പിച്ച് നിത്യവും കുടിക്കുക.മുരിങ്ങയിലയും വെളുത്തുള്ളിയും കൂടി ചതച്ചിട്ട് പാല് കാച്ചി ദിവസവുംഅത്താഴത്തിനു ശേഷം കുടിക്കുക.ഏത്തവാഴയുടെ (നേന്ത്രവാഴ) പോളയുടെ നീര് (പിണ്ടി അല്ല) 30 ml വെച്ച് ദിനവും കഴിച്ചാല്‍ കുറച്ചു ദിവസങ്ങള്‍ കൊണ്ട് ബി.പി. ശരിയാകും.

7:മൂതാശയത്തില്‍ കല്ല്

ഒരു ഗ്ലാസ്സ് വാഴപ്പിണ്ടി നീര് നിത്യവും കുടിക്കുക ( പാളയന്‍കോടന് വാഴയുടെതാണ് ഉത്തമം).കല്ലുരുക്കി സമൂലം കഷായം വെച്ചു കഴിക്കുക.മുരിങ്ങയുടെ വേരിലെ തൊലി കഷായം വെച്ച് ചെറു ചൂടോടുകൂടി കഴിക്കുക.ചെറൂള്ളയും, ഞെരിഞ്ഞിലും ഇട്ട് വെന്ത വെള്ളം കുടിക്കുക. കരിക്കിൻ വെള്ളത്തിൽ ഏലക്കായ ചതച്ചിട്ട് 12 മണിക്കൂർ വച്ച ശേഷം അതിരാവിലെ ഏഴുദിവസം തുടർച്ചയായി കഴിക്കുക.

8: പ്രമേഹം

പച്ചനെല്ലിക്ക ഇടിച്ച് പിഴിഞ്ഞ നീരില്‍ മഞ്ഞള്‍പൊടിയും ചേര്‍ത്തു കഴിക്കുക.തൊട്ടാവാടി നീരില്‍ പാല്‍ ചേര്‍ത്തു കഴിക്കുക.ബ്രെഹ്മി ഉണക്കിപോടിച്ചു ഓരോ സ്പൂണ്‍ പാലില്‍ ചേര്‍ത്തു കഴിക്കുക. ചിറ്റമൃത് നാരും മൊരിയും കളഞ്ഞ് ചതച്ചു നീരെടുത്ത്, നല്ലതുപോലെ തേനും ചേര്‍ത്ത് കഴിക്കുന്നതും പ്രമേഹത്തിന് ഉത്തമമാണ്.

9: ഗ്യാസ്ട്രബിൾ

വെളുത്തുള്ളി ചുട്ടുതിന്നുന്നത് നല്ലതാണ്.ഇഞ്ചി ചതച്ചിട്ട് ചായ കുടിക്കുന്നത് നല്ലതാണ്. വെളുത്തുള്ളി ചതച്ചിട്ട് കാച്ചിയ പാല്‍ രാത്രി കിടക്കുന്നതിനു മുന്‍പ് കുടിക്കുക. അല്പം അയമോദകം ഇട്ട് തിളപ്പിച്ച വെള്ളം കുടിക്കുക.

10:മഞ്ഞപിത്തം

കീഴാര്‍നെല്ലി അരച്ചു പാലില്‍ കഴിക്കുക
വെളുത്ത.ആവണക്കിന്‍റെ തളിരില പറിച്ച്, അല്‍പ്പം ജീരകവും, അല്‍പ്പം മഞ്ഞളും ചേര്‍ത്തരച്ച്, സൂര്യോദയത്തിനു മുമ്പ്, പാലില്‍ കലക്കി കഴിക്കുക. ഈ മരുന്നു കഴിക്കുന്ന ദിവസവും അതിനോടു ചേര്‍ന്നുള്ള മൂന്നു ദിവസങ്ങളിലും ഉപ്പ്, എണ്ണ, മത്സ്യം, മരച്ചീനി എന്നിവ ഉപയോഗിക്കരുത്. മരച്ചീനി ഒട്ടും ഉപയോഗിക്കരുത്.കയ്യോന്നി അരച്ചു പാലില്‍ കഴിക്കുക. വെള്ളപ്പൂവും മഞ്ഞപ്പൂവും ഉള്ള കയ്യോന്നി ഉണ്ട്. രണ്ടും ഉപയോഗിക്കാം.
വെളുത്ത ആവണക്കിന്‍റെ തളിരില (മുകുളം) അല്‍പ്പം ജീരകവും അല്‍പ്പം മഞ്ഞളും ചേര്‍ത്തരച്ചു പാലില്‍ കൊടുത്താല്‍ മഞ്ഞപ്പിത്തം മാറും. ഒരൊറ്റത്തവണ കൊണ്ടുതന്നെ മഞ്ഞപ്പിത്തം മാറും.കീഴാര്‍നെല്ലി പറിച്ചു പാലില്‍ അരച്ചു സേവിച്ചാല്‍ മഞ്ഞപ്പിത്തം മാറും.

11:ഒച്ചയടപ്പ്‌

ഇഞ്ചിയും ശര്ക്കരയും ഒരേ അനുപാതത്തില്‍ ചേര്ത്ത് ‌ കഴിക്കുക.ഇഞ്ചിയും തിപ്പലിയും ഇട്ടു കാച്ചിയ പാല്‍ കുടിക്കുക.വയമ്പ്‌ തേനില്‍ അരച്ച്‌ കഴിക്കുക.മുയല്ച്ചെവിയന്‍ അല്‌പം ഉപ്പും വെളുത്തുള്ളിയും ചേര്ത്തരച്ച്‌ കണ്‌ഠത്തില്‍ പുരട്ടുക.

12:ചെന്നികുത്ത്

പൂവാം കുരുന്നിലയുടെ നീര് 10ml ഒരാഴ്ച ദിവസം വെറും വയറ്റിൽ കുടികുക.ഒരു ചുവടു മുക്കുറ്റി വേരോടെ പറിച്ച് കഴുകി അരച്ച് ചെന്നിയിൽ പുരട്ടുക.പൂവ്വംകുരുന്നൽ പിഴിഞ്ഞ നീരു സൂര്യോദയത്തിന് മുൻപ് ശിരസ്സിൽ തേയ്ക്കുക.ഈ ദിവസങ്ങളിൽ തലകുളിയ്ക്കുന്നത് ഒഴിവാക്കണം

13:അകാലനര

കറിവേപ്പില ധാരാളം ചേർത്ത് ശുദ്ധമായ വെളിച്ചെണ്ണയില്‍ കാച്ചി പതിവായി തലയില്‍ തേക്കുക.നെല്ലിക്കയിട്ടു തിളപ്പിച്ചാറിയ വെള്ളം കൊണ്ടു പതിവായി തല കഴുകുക.നീലയമരിയില നീര്,കീഴാര്‍നെല്ലി നീര് ഇവയില്‍ ഏതെങ്കിലും ഒന്ന് തലയില്‍ പുരട്ടി അര മണിക്കൂര്‍ കഴിഞ്ഞതിനു ശേഷം കഴുകി കളയുക. അതുപോലെതന്നെ ത്രിഫല ചൂർണം പതിവായി കഴിക്കുക.

14:ഉളുക്കിന്

സമൂലം തോട്ടാവാടിയും കല്ലുപ്പും അരച്ച് അരിക്കാടിയില്‍ കലക്കി തിളപ്പിച്ച് പുരട്ടുക.

15:മൂത്രതടസ്സത്തിന്

ഏലയ്ക്ക പൊടിച്ച് കരിക്കിന്‍ വെള്ളത്തില്‍ ചേര്ത്ത് കഴിക്കുക

16:വളം കടിക്ക്

വെളുത്തുള്ളിയും മഞ്ഞളും ചേര്‍ത്തരച്ച് ഉപ്പുനീരില്‍ ചാലിച്ച് പുരട്ടുക

17:പല്ലുവേദന-മോണപഴുപ്പ്

വേപ്പിന്‍ കുരു എണ്ണയില്‍ വറുത്തെടുത്തു പുരട്ടുക.
ഗ്രാമ്പു ചതച്ച്‌ തേനും ഇഞ്ചിനീരും ചേര്‍ത്ത്‌ വേദന ഭാഗത്ത്‌ വെയ്ക്കുക.ഗ്രാമ്പു, കുരുമുളക്, ഉപ്പ്, ഇവ സമം ചേര്‍ത്ത് ചതച്ച് കടിച്ചുപിടിച്ചാലും ശമനം കിട്ടും.

18:ചുണങ്ങിന്

കടുകും,ആര്യവെപ്പിലയും ,പച്ചമഞ്ഞളും,ചിറ്റമൃതും കൂടി അരച്ചിടുക.

19:അസ്ഥിസ്രാവത്തിന്

പുളിങ്കുരുപ്പരിപ്പ് തലേന്നു വെള്ളത്തിലിട്ടു വെച്ചു പിറ്റെന്നെടുത്തു പാലില്‍ അരച്ചു സേവിച്ചാല്‍ സ്ത്രീകളുടെ അസ്ഥിസ്രാവം ശമിക്കും.
നെല്ലിമരത്തിന്‍റെ തൊലി ഇടിച്ചുപിഴിഞ്ഞ നീരില്‍ മഞ്ഞളരച്ചതും തേനും ചേര്‍ത്തു സേവിച്ചാല്‍ അസ്ഥിസ്രാവം ശമിക്കും. ലോഹം തൊടാതെ നെല്ലിമരത്തിന്‍റെ തൊലി എടുക്കുന്നത് നന്ന്.

20: ലൈംഗികക്ഷമത കൂട്ടുന്നതിന്

അമുക്കുരം ശുദ്ധി ചെയ്തത്, പാൽമുതുക്കിൻ കിഴങ്ങ് ഉണങ്ങിയത്, ശതാവരി കിഴങ്ങ് ഉണങ്ങിയത്,അടപതിയൻ കിഴങ്ങ്,
നായ്ക്കുരണവിത്ത് ശുദ്ധി ചെയ്തത്,
ബദാം പരിപ്പ് എന്നിവ സമമായി എടുത്ത് ഉണക്കി പൊടിച്ച് 1 സ്പൂൺ വീതം പഞ്ചസാര ചേർത്ത പാലിൽ കലക്കി കുടിക്കുക. 2 നേരം ഭക്ഷണശേഷം

21:ചൊറി, ചുണങ്ങു മാറുന്നതിന്

കണിക്കൊന്ന ഇല,ആരിവേപ്പില, പച്ചമഞ്ഞൾ,ചിറ്റമൃത് സമമെടുത്ത് അരച്ച് ലേപനം ചെയ്ത ആറു മണിക്കൂറിനു ശേഷം കഴുകിക്കളയാം ചൊറിയൻ ചുണങ്ങു മാറുന്നതിന് നല്ലതാണ്.

22: അമിതമായ ആർത്തവം

തൊട്ടാവാടിയുടെ 20 ഇല നുള്ളി അതിന്റെ ഒപ്പം മുക്കുറ്റി സമൂലം അരച്ച് കഴുകിവൃത്തിയാക്കി വെണ്ണ പോലെ അരച്ച് എടുത്തു രണ്ടു നേരം കഴിക്കുക. ഒപ്പം ചുവന്ന ചെമ്പരത്തിയുടെ വിരിഞ്ഞ മൊട്ടു കൂട്ടി അരക്കാം എന്നാൽ പ്രസവിക്കാത്ത സ്ത്രീകൾ ചെമ്പരത്തി മൊട്ടു ഉപയോഗിക്കരുത് , അത് ഗർഭധാരണം തടുക്കും

23:നെഞ്ചെരിച്ചില്‍

ഏഴ് കൊത്തമല്ലി, ഏഴ് ആര്യവേപ്പില, ഒരു ചെറിയ കഷണം പച്ചമഞ്ഞള്‍ എന്നിവ അരച്ച് കഴിച്ചാല്‍ നെഞ്ചെരിച്ചില്‍ ശമിക്കും. വയറ്റിലെ അള്‍സര്‍ മാറാനും ഇത് സഹായകമാണ്. പുളിയാരൽ ഇട്ട് മോര് കാച്ചി കുടിക്കുന്നതും നല്ലതാണ്.

24: കൊളസ്ട്രോൾ

വെളുത്തുള്ളി ചതച്ചിട്ട് പാൽ കാച്ചി കുടിച്ചൽ കൊളസ്ട്രോള്‍ കുറയും. കാന്താരിമുളക്, ഇഞ്ചി, കറിവേപ്പില, വെളുത്തുള്ളി, വെളിച്ചെണ്ണ ഇവ ചമ്മന്തി ഉണ്ടാക്കി ഇടയ്ക്ക് കഴിക്കുന്നത് കൊളസ്ട്രോൾ കുറയ്ക്കാൻ സഹായിക്കും. വേങ്ങാ കാതൽ ,ഉലുവ ഇട്ട് തിളപ്പിച്ച വെള്ളം കുടിക്കുക. കുടാതെ ദിവസവും അതിരാവിലെ അരമണിക്കൂർ നടക്കുക.

25: ആസ്തമ

മഞ്ഞളും ,കറിവേപ്പിലയും കൂടി അരച്ച് ഒരു നെല്ലിക്കാ വലുപ്പത്തില്‍ ഒരു മാസം തുടര്‍ച്ചയായി കഴിച്ചാല്‍ ആസ്തമയ്ക്കു വളരെ കുറവുണ്ടാകും.ആടലോകത്തിന്റെ ഇല വാട്ടിപ്പിഴിഞ്ഞ നീരില്‍ തേന്‍ ചേര്‍ത്തു കഴിക്കുക.

26:കൊടിഞ്ഞി

ജീരകം ചതച്ചിട്ട് പാല്‍ കാച്ചി രാവിലെ കുടിച്ചാല്‍ കൊടിഞ്ഞിക്ക് ശമനമുണ്ടാകും.മുക്കൂറ്റി സമൂലമെടുത്ത് (വേരും തണ്ടും ഇലയും പൂക്കളുമെല്ലാം) അരച്ച് കൊടിഞ്ഞിയുണ്ടാകുമ്പോള്‍ നെറ്റിയുടെ ഇരുവശങ്ങളിലും ഇട്ടാല്‍ വളരെ എളുപ്പത്തില്‍ ശമനമുണ്ടാകും.ചുക്കും കൂവളത്തിന്റെ വേരും കാടിവെള്ളത്തില്‍ അരച്ചുപുരട്ടിയാല്‍ കൊടിഞ്ഞിക്ക് വളരെ ആശ്വാസമുണ്ടാകും. പച്ചമഞ്ഞള്‍ ഓടില്‍ ചൂടാക്കി നെറ്റിയുടെ ഇരുവശവും ചൂട്പിടിപ്പിക്കുക

27:സോറിയാസിസ്

ഏഴിലംപാല, ദന്തപ്പാല, കുടകപ്പാല, ഇവയുടെ ഇല ചെമ്പുപാത്രത്തില്‍ ഇട്ടു പഴവെളിച്ചെണ്ണയൊഴിച്ച് പതിന്നാലു ദിവസം സൂര്യപ്രകാശത്തില്‍ വെച്ച് ചൂടാക്കി ജലാംശം വറ്റിച്ച് തയാറാക്കിയ തൈലം സോറിയാസിസ് ബാധിച്ച ഭാഗത്തു പുരട്ടുക.
ഈ തൈലം തയാറാക്കി കുപ്പിയില്‍ സൂക്ഷികുക.

28: മുഖക്കുരു

തേന്‍ മുഖക്കുരുവുള്ള ഭാഗത്ത് പുരട്ടിയ ശേഷം 30 മിനിറ്റ് കഴിഞ്ഞ് ചെറുചൂടുവെള്ളത്തില്‍ കഴുകിക്കളയണം. മുഖക്കുരു പെട്ടന്നുമാറും.ആര്യവേപ്പില, മഞ്ഞള്‍ എന്നിവ അരച്ച് മുഖത്ത് പുരട്ടുന്നത് നല്ലതാണ്. ഉണങ്ങിയ ശേഷം കഴുകിക്കളയാം.ഉലുവ അരച്ച് മുഖത്ത് പുരട്ടുന്നത് മുഖക്കുരുവിനെ പ്രതിരോധിക്കും. ഇത് ഉണങ്ങിയ ശേഷം കഴുകിക്കളയുക.

29:അള്‍സര്‍

കറിവേപ്പില, ചുവന്നുള്ളി,പച്ചമഞ്ഞൾ, കൊടകൻ (മുത്തിൾ) , കശുമാവിന്റെ തളിരില സമാസമം അരച്ച് യോചിപ്പിച്ച് ഒരു ചെറുനാരങ്ങ വലുപ്പത്തിൽ കഴിക്കുക വെറും വയറ്റിൽ രണ്ടാഴ്ച കഴിക്കുക (വെള്ളത്തിൽ കലക്കിയും കുടിക്കാം)

30:മൂത്രക്കടച്ചിലിന്

ഞെരിഞ്ഞില്‍ പൊടിച്ച് ശീലപ്പൊടിയാക്കി തേന്‍ ചേര്‍ത്ത് കൊടുക്കുക.തമിഴാമ ഇടിച്ച്പിഴിഞ്ഞ നീര് സമം തേന്‍ ചേര്‍ത്ത് കൊടുക്കുക.

ഞാൻ മുകളിൽ പറഞ്ഞ ഔഷധപ്രയോഗങ്ങൾ നിങ്ങൾ വൈദ്യ നിർദേശാനുസരണം കഴിക്കുക, സ്വയംചികിത്സ ആപൽക്കരമാണ്.ഈ ലേഖനം നിങ്ങൾക്ക് ഇഷ്ടപ്പെടും എന്ന് പ്രതീക്ഷിക്കുന്നു. ഇതിലുള്ള ആശയങ്ങൾ അർത്ഥവത്താണെന്ന് തോന്നുകയാണെങ്കിൽ മറ്റുള്ളവരിലേക്കും പങ്കുവച്ച് എത്തിക്കുക.

നന്ദി

ഡോ. പൗസ് പൗലോസ് BAMS, MS(Ay)

സീതാറാം ആയുർവേദ സ്പെഷ്യാലിറ്റി ഹോസ്പിറ്റൽ. തൃശ്ശൂർ