ഭേളാചാര്യൻ എഴുത്തയ ഭേളസംഹിത

ആയുർവേദാചാര്യനായ അത്രേയപുനർവസുവിന്റെ പ്രമുഖരായ ആറു ശിഷ്യന്മാരിൽ ഒരാളായ ഭേളാചാര്യൻ എഴുത്തയ ഭേളസംഹിതയിലെ പതിനഞ്ചാം അദ്ധ്യായത്തിൽ ചില ശ്ലോകങ്ങളുടെ അർത്ഥമാണ് ആണ് ഞാൻ താഴെ കൊടുത്തിരിക്കുന്നത്  ഒഴുകുന്ന പുഴകളിലെ ശബ്ദതരംഗങ്ങൾ ഭൂമിയിലെ ചലനങ്ങൾ ഇവ വാതം അഥവാ വായുവിനെ സഹായം കൊണ്ടാണ് ഉണ്ടാവുന്നത്. വാതം അഥവാ വായു കൊണ്ടാണ് നീരാവിയും നീരാവിയിൽ നിന്ന് മേഘവും ഉണ്ടാകുന്നത്. അതേപോലെ മേഘത്തിൽ നിന്നും മഴയും, മഴ കൊണ്ട് ഭൂമിയിലെ സസ്യജാലങ്ങളും ഉണ്ടാകുന്നു. ഇതെല്ലാം വാതസഹായമില്ലാതെ അസാധ്യമാണ്. അതേപോലെതന്നെ ഉൽക്കയുടെ വീഴ്ച, ഇടിമിന്നൽ, ചന്ദ്രന്റെയും നക്ഷത്രങ്ങളെയും നിലനിൽപ്പ് ഇടിമിന്നൽ അടങ്ങിയിരിക്കുന്ന വിദ്യൽപ്രവാഹം ഇവയെല്ലാം വാതത്തിന്റെ പ്രവർത്തനം കൊണ്ടാണ് ഉണ്ടാക്കുന്നത്. അഗ്നി ജ്വലിക്കണമെങ്കിൽ വാതത്തിലെ സഹായം വേണം. നദികൾ ഒഴുകുന്നതിനും ഭൂമിയിൽ വെള്ളപ്പൊക്കം ഉണ്ടാകുന്നതിനും കാരണക്കാരൻ വാതം തന്നെയാണ്. ഈവക കാരണങ്ങളാൽ മനുഷ്യശരീരത്തിലെ പ്രധാന ദോഷം വാതം അഥവാ വായുഭഗവാൻ ആണ്. അതിനാൽ പഞ്ചഭൂതങ്ങളിൽ വച്ച് വായുവാണ് പ്രധാനഭൂതം.ശരീരത്തിലെ എല്ലാ പ്രവർത്തനങ്ങളും വായുവിനെ ആശ്രയിച്ചാണ് നടക്കുന്നത് എല്ലാം വായു നിർബദ്ധമാണ്. ശരീരത്തിൽ ഏതു സമയത്തും എല്ലാ ഭാഗത്തും ഈ വായുവിന്റെ സാന്നിധ്യമുണ്ട്. വായുവിനെ സാന്നിധ്യം ഈ ശരീരത്തിൽ സ്ഥാനഭേദം അനുസരിച്ച് 5 ആയി തരം തിരിച്ചിരിക്കുന്നു പ്രാണൻ, ഉദാനൻ, വ്യാനൻ ,സമാനൻ, അപാനൻ.

നന്ദി

🌹🌹🌹🌹🌹🌹🌹🌹🌹🌹

ഡോ. പൗസ് പൗലോസ് MS(Ay)

ദൈവത്തെ വിൽക്കുന്നവർ

ദൈവത്തെ വിൽക്കുന്നവർ
------------------------------------------

പറയാതെ വയ്യ വിശ്വാസം ഹോൾസെയിൽ ആയും റീട്ടെയിൽ ആയും വിൽക്കപ്പെടുന്ന ഒരു കാലഘട്ടത്തിലാണ് നമ്മൾ ജീവിക്കുന്നത്. ജനങ്ങളുടെ ആന്തരീക നേത്രങ്ങൾക്ക് തിമിരം ഉണ്ടാക്കുന്ന ഇത്തരത്തിലുള്ള അന്ധവിശ്വാസങ്ങൾ പ്രചരിപ്പിക്കുന്ന ആത്മീയ ആചാര്യന്മാർ ജനങ്ങളുടെ യഥാർത്ഥ ആത്മീയ വളർച്ചക്ക് ഹാനികരമാണ്. ഈശ്വരനിൽ വിശ്വാസം കൂടി കൂടി അവസാനം വിശ്വാസിക്ക് സമനില തെറ്റുന്ന നേരത്ത് അവിടെ അന്ധവിശ്വാസവും മതഭ്രാന്തും പൊട്ടി മുളയ്ക്കും. വിശ്വാസത്തിന്റെ പേരിൽ കൊലവിളി നടത്തുന്ന വിശ്വാസ സംരക്ഷകർ ഉള്ള നാടാണിത്, ഇതെല്ലാം അവർ ചെയ്യുന്നത് ദൈവത്തെ സംരക്ഷിക്കാൻ വേണ്ടിയാണ്. ദൈവത്തെ സംരക്ഷിക്കാൻ തോക്കും, ബോംബും, വടിവാളും ആയി ഇറങ്ങുന്ന ഇവരെ നോക്കി ചിലപ്പോൾ ദൈവം പൊട്ടി ചിരിക്കുന്നുണ്ടാവും. ഏതു മതത്തിലായാലും ശരി ദൈവവിശ്വാസത്തെ കാൾ കൂടുതൽ ജനങ്ങളെ ഇന്ന് സ്വാധീനിക്കുന്നത് മതഭ്രാന്തും, അന്ധവിശ്വാസമാണ്. അന്ധവിശ്വാസത്തിനാണ് ഇന്നത്തെ സമൂഹത്തിൽ കൂടുതൽ മാർക്കറ്റ് അതുകൊണ്ട് അത് കുപ്പികളിലാക്കിയും , പാക്കറ്റിലാക്കിയും വിൽക്കപ്പെടുന്നു, വിഡ്ഢികളായ നമ്മൾ അത് പൈസ കൊടുത്തു വാങ്ങി ഉപയോഗിക്കുന്നു. വിശ്വാസികൾക്ക് അനുഗ്രഹം പൈസ കൊടുത്തു വാങ്ങേണ്ട ഗതികേടാണ് ഇന്നുള്ളത്. കൊടുക്കുന്ന പൈസയുടെ കനം കൂടുന്തോറും കിട്ടുന്ന അനുഗ്രഹത്തിന്റെ വലിപ്പവും കൂടും എന്ന അവസ്ഥയിലേക്ക് ഈ സമൂഹത്തെ വിശ്വാസ വ്യാപാരികൾ മാറ്റിയിരിക്കുന്നു എന്നതാണ് യാഥാർത്ഥ്യം.

"മതമേതായാലും മനുഷ്യൻ നന്നായാൽ മതി
മതം മിതമാവണം അല്ലെങ്കിൽ മദം ആകും "

സിർകാഡിയൻ റിഥം അഥവാ "ബോഡി ക്ലോക്ക്"

"സിർകാഡിയൻ റിഥം" ⌛ അഥവാ "ബോഡി ക്ലോക്ക്"
-------------------------------------------------------------------

കുറെ നാളുകളായി എഴുതണം എഴുതണം എന്ന് വിചാരിച്ച ഒരു ലേഖനമാണിത് ഇപ്പോഴാണ് ഇത് എഴുതുവാനായി ഒരു മൂഡ് വന്നത് ചിലപ്പോൾ ഇത് എന്റെ സിർകാഡിയൻ റിഥത്തിന്റെ ഭാഗമാകാം 😀."ബോഡി ക്ലോക്ക്" ⌛എന്ന് പലപ്പോഴും വിളിക്കപ്പെടുന്ന സിർകാഡിയൻ റിഥം ഒരു 24 മണിക്കൂർ സൈക്കിളാണ് അതിന്റെ താളങ്ങൾക്ക് അനുസരിച്ചാണ് നിങ്ങൾ എപ്പോൾ ഉറങ്ങണം, എഴുന്നേൽക്കണം, ഭക്ഷണം കഴിക്കണം എന്ന് നിങ്ങളുടെ ശരീരം നിങ്ങളോട് പറയുന്നത്. ഈ ഭൂമിയിലുള്ള എല്ലാ ജീവജാലങ്ങൾക്കും അത്തരത്തിൽ ഉള്ള ഒരു താളക്രമം അവരുടെ മസ്തിഷ്കത്തിന്റെ അകത്തുണ്ട്.

നമ്മുടെ ശരീരത്തിലെ എല്ലാ ചയാപചയ പ്രക്രിയകളും നിയന്ത്രിക്കുന്നത് ഈ കൊച്ചു തലച്ചോറിന് അകത്തുള്ള ഒരു താളമാണ്. ഇത് കണ്ടുപിടിച്ചത് "മൈക്കൽ മോറിസ് റോസ്ബാഷ്" എന്ന് പേരുള്ള അമേരിക്കൻ ജെനറ്റിസിസ്റ്റും, ക്രോണോബയോളജിസ്റ്റുമാണ്. ഈ കണ്ടുപിടുത്തത്തിന് അദ്ദേഹത്തിന് 2017ൽ നോബൽ പ്രൈസ് ലഭിക്കുകയുണ്ടായി. അദ്ധേഹത്തിന്റെ അഭിപ്രായത്തിൽ നമ്മുടെ സെല്ലുകളിൽ ഒരു ആന്തരിക ക്ലോക്ക് ഉണ്ട് അത് രാവും പകലും ഉള്ള വ്യത്യസ്ത ഘട്ടങ്ങളുമായി നമ്മുടെ ജൈവ താളം പൊരുത്തപ്പെടുത്താൻ നമ്മുടെ ശരീരത്തെ സഹായിക്കുന്നു.

നിങ്ങളുടെ സിർകാഡിയൻ റിഥം അടിസ്ഥാനപരമായി നിങ്ങളുടെ തലച്ചോറിന്റെ പശ്ചാത്തലത്തിൽ പ്രവർത്തിക്കുന്നു, കൃത്യമായ ഇടവേളകളിൽ ഉറക്കവും ഉയർച്ചയും തമ്മിലുള്ള ചക്രങ്ങൾ അവിടെ നിന്നും നിയന്ത്രിക്കപ്പെടുന്നു. നിങ്ങളുടെ തലച്ചോറിന്റെ ഒരു ചെറിയ പ്രദേശത്ത് സ്ഥിതിചെയ്യുന്ന ഹൈപ്പോതലാമസിന്റെ ഒരു ഭാഗം ആയ "സുപ്രാചിയാസ്മാറ്റിക് ന്യൂക്ലിയസ്" എന്നറിയപ്പെടുന്ന ഒരു "മാസ്റ്റർ ക്ലോക്ക്" ആണ് നമ്മുടെ ശരീരത്തിന്റെ താളം നിയന്ത്രിക്കുന്നത്.

സിർകാഡിയൻ റിഥം നിങ്ങളുടെ ഭക്ഷണരീതി, ദഹനം, ശരീര താപനില, മസ്തിഷ്ക തരംഗ പ്രവർത്തനം, ഹോർമോൺ ഉത്പാദനം, സെൽ പുനരുജ്ജീവിപ്പിക്കൽ, മറ്റ് ജീവശാസ്ത്രപരമായ പ്രവർത്തനങ്ങൾ എന്നിവയെല്ലാം സ്വാധീനിക്കുന്നു. മനുഷ്യർ ഉൾപ്പെടെ എല്ലാ മൃഗങ്ങളുടെയും ഉറക്കവും ഭക്ഷണരീതിയും നിർണ്ണയിക്കുന്നതിൽ സർക്കാഡിയൻ താളം വളരെ പ്രധാനമാണ്. ഇതിനർത്ഥം നമ്മുടെ സ്വന്തം സർക്കാഡിയൻ താളത്തെക്കുറിച്ച് നാം ബോധവാന്മാർ ആയിരിക്കണം. നിങ്ങളുടെ സിർകാഡിയൻ റിഥത്തിന്റ താളം തെറ്റിയാൽ പലതരത്തിലുള്ള ശാരീരിക മാനസിക രോഗങ്ങൾ ഉണ്ടാകാൻ സാധ്യതയുണ്ട് അതിനാൽ അത് തെറ്റാതെ വളരെയധികം ശ്രദ്ധിക്കണം.

നമ്മുടെ ശരീരത്തിലെ സർക്കാഡിയൻ റിഥം മനസ്സിലാക്കി അതിന്റെ താളത്തിനനുസരിച്ച് ജീവിതശൈലി ഷെഡ്യൂൾ ചെയ്യണം. ചുരുക്കിപ്പറഞ്ഞാൽ നിങ്ങളുടെ ശരീരത്തിനും, മനസ്സിനും ഒരു താളമുണ്ട് (റിഥം) അതിന്റെ താളം തെറ്റാതെ നോക്കേണ്ടത് നിങ്ങളുടെ കടമയാണ്. നിങ്ങളുടെ ഉറക്ക സമയം, ഭക്ഷണ സമയം മുതലായവ നിങ്ങളുടെ സിർകാഡിയൻ റിഥത്തിന് അനുസരിച്ച് ക്രമപ്പെടുത്തണം എന്നാൽ മാത്രമേ നിങ്ങൾക്ക് നല്ല ഉറക്കവും വിശപ്പും ഉണ്ടാകൂ.

സിർകാഡിയൻ റിഥം ഒരു സ്വാഭാവിക, ആന്തരിക സംവിധാനമാണ് 24 മണിക്കൂർ കാലയളവിൽ ഉറക്കത്തിന്റെയും ഉണർവിന്റെയും വികാരങ്ങളെ നിയന്ത്രിക്കാൻ രൂപകൽപ്പന ചെയ്‌തിരിക്കുന്ന ഒരു ശരീര പ്രക്രിയ. മസ്തിഷ്കത്തിന് അകത്തുള്ള ഈ സർക്കാഡിയൻ റിഥം നിങ്ങളുടെ ജനനം മുതൽ മരണം വരെ ഉള്ള ഓരോ ദിവസവും എപ്രകാരമായിരിക്കണം എന്ന് നിശ്ചയിക്കുന്നതിൽ ഒരു പ്രധാന പങ്കു വഹിക്കുന്നു. അതിനാൽ ആരോഗ്യകരമായ ഒരു ജീവിതം നയിക്കുന്നതിന് നിങ്ങളുടെ സർക്കാഡിയൻ റിഥത്തിന്റ താളം തെറ്റാതെ കാത്തു പരിപാലിക്കേണ്ടത് നിങ്ങളുടെ ഉത്തരവാദിത്തമാണ്.

നന്ദി

🌹🌹🌹🌹🌹🌹🌹🌹🌹🌹

ഡോ. പൗസ് പൗലോസ് MS(Ay)

സീതാറാം ആയുർവേദ സ്പെഷ്യാലിറ്റി ഹോസ്പിറ്റൽ

ആയുർവേദത്തിൽ ഹൃദ്രോഗത്തിന് ചികിത്സ ഉണ്ടോ...💝..?

ആയുർവേദത്തിൽ ഹൃദ്രോഗത്തിന് ചികിത്സ ഉണ്ടോ...💝..?

കുറച്ചുനാളുകൾക്കു മുമ്പ് എന്റെ അടുത്ത് മധ്യവയസ്കയായ ഒരു രോഗി വന്നു നടക്കുമ്പോൾ വളരെ കിതപ്പ്, ക്ഷീണം , തളർച്ച, ആയാസമുള്ള ജോലികൾ എടുത്താൽ ഉണ്ടാകുന്ന നെഞ്ചുവേദന, പിന്നെ ഇടയ്ക്കിടയ്ക്ക് വരുന്ന റുമറ്റോയ്ഡ് ആർത്രൈറ്റിസുമായി ബന്ധപ്പെട്ട വേദനകൾ ഇതെല്ലാമാണ് പ്രധാന ലക്ഷണങ്ങൾ. ഞാൻ സ്റ്റതസ്കോപ്പ് വെച്ച് രോഗിയുടെ ഹൃദയത്തിന്റെ താളം പരിശോധിച്ചപ്പോൾ അത്ര പന്തിയല്ലെന്ന് തോന്നി രോഗിയോട് ഉടനെ തന്നെ ഒരു ഹൃദ്രോഗ വിദഗ്ധനെ കണ്ട് ECG, treadmill test, ECHO എന്നിവ കേരളത്തിലെ പ്രശസ്തമായ ഹൃദ്രോഗ ആശുപത്രിയിൽ പോയി ചെയ്യാൻ പറഞ്ഞു.

രോഗി അതെല്ലാം ഡോക്ടറെ കണ്ട് ചെയ്തിട്ട് എന്റെ അടുക്കൽ വന്നു. സംഭവം പ്രതീക്ഷിച്ചപോലെ തന്നെ Moderate MR ( mitral regurgitation - In moderate mitral regurgitation around 30% of the blood in the heart is leaking backwards). അവിടെയുള്ള പ്രധാന ഡോക്ടർ രോഗിയോട് ഇപ്പോഴത്തെ രോഗാവസ്ഥ കൂടുതൽ മോശമാകാതെ ശ്രദ്ധിക്കണം എന്ന് പറഞ്ഞു. ഇതെല്ലാം കേട്ട് ഭയപ്പെട്ടാണ് രോഗി എന്റെ അടുത്ത് റിപ്പോർട്ടുകളുമായി വന്നത്. രോഗിയുടെ സമ്മതത്തോടുകൂടി രണ്ട് റിപ്പോർട്ടുകളും താഴെ ഫോട്ടോ എടുത്ത് അറ്റാച്ച് ചെയ്തിട്ടുണ്ട്. രോഗം പൂർണമായും സുഖപ്പെടുത്താൻ കഴിഞ്ഞില്ലെങ്കിലും രോഗലക്ഷണങ്ങൾ മാറ്റാൻ കഴിയുമെന്നും, ഹൃദയത്തെ ബലപ്പെടുത്താൻ ചില ഔഷധങ്ങൾ തരാമെന്നും രോഗിയോട് പറഞ്ഞ് അവരെ അന്ന് ആശ്വസിപ്പിച്ചു.

എന്റെ അടുത്ത് ഹൃദയത്തെ ബലപ്പെടുത്താൻ ഈ രോഗി ഒരു വർഷത്തോളമായി ചികിത്സ ചെയ്യുന്നു. ഞാൻ ചെയ്ത ചികിത്സാരീതികളും മരുന്നുകളൊന്നും തൽക്കാലം ഈ പോസ്റ്റിലൂടെ പങ്കുവെക്കുന്നില്ല കാരണം പങ്കുവെച്ചാൽ കുറെ വിദ്വാന്മാർ ആയുർവേദ മരുന്നുകൾക്ക് പാർശ്വഫലങ്ങളില്ല എന്നും പറഞ്ഞ് ഈ മരുന്നെല്ലാം മേടിച്ച് വായുഗുളിക പോലെ കഴിക്കാൻ തുടങ്ങും അതെന്തായാലും വേണ്ട. വളരെ കുറച്ചു മരുന്നുകൾ മാത്രമാണ് നിശ്ചയിച്ചത് ചികിത്സയുടെ പല ഘട്ടങ്ങളിലായി ചില ഗുളികകളും, കഷായവും ഒരു ചൂർണ്ണവും ആണ് ഞാൻ ഈ രോഗിക്ക് കൊടുത്തത്. പിന്നെ രോഗിക്ക് പാലിക്കാൻ കഴിയുന്ന രീതിയിലുള്ള അധികം കഠിനമല്ലാത്ത പത്ഥ്യങ്ങളും. ഏകദേശം ഒരു വർഷത്തോളം ചികിത്സ കഴിഞ്ഞപ്പോൾ രോഗിയുടെ കിതപ്പ് പൂർണ്ണമായി മാറി കൊളസ്ട്രോൾ നോർമൽ ആയി, ബി.പി നോർമൽ ആയി 150/90 ആയിരുന്ന ബിപി ഇപ്പോൾ 110/80 ആണ് കഴിഞ്ഞ ആറു മാസമായി രോഗിയുടെ ബി.പി പൂർണമായും നോർമലാണ്.

അത് നിങ്ങൾക്ക് റിപ്പോർട്ടിൽ കാണുവാൻ സാധിക്കും അതുപോലെ തന്നെ രോഗിയുടെ അവസ്ഥയിൽ കാര്യമായ മാറ്റം ഉണ്ടായി Moderate MR change to Mild MR. രോഗി വീണ്ടും പരിശോധിച്ച് റിപ്പോർട്ടുമായി ചെന്നപ്പോൾ ഹൃദ്രോഗ വിദഗ്ധൻ വളരെ അത്ഭുതത്തോടെ ചോദിച്ചു ഇതെങ്ങനെയാണ് ഒരു വർഷത്തിനുള്ളിൽ ഈ മാറ്റം ഉണ്ടായത് അവിടെയുണ്ടായിരുന്ന ജൂനിയർ ഡോക്ടർമാരും ആ റിപ്പോർട്ട് തിരിച്ചും മറിച്ചും നോക്കി. എന്നിട്ട് പ്രധാന ഡോക്ടർ ദിവസവും നടക്കുന്നുണ്ടല്ലോ അല്ല എന്തായാലും നടത്തം കുറയ്ക്കേണ്ട , ഡയറ്റ് അതേപോലെതന്നെ പിന്തുടരൂ എന്നും പറഞ്ഞ് നമ്മുടെ രോഗിയെ ഉപദേശിച്ചു വിട്ടു. ഞാൻ രോഗിയോട് ചോദിച്ചു നിങ്ങൾ ആയുർവേദ മരുന്ന് ഉപയോഗിക്കുന്ന കാര്യം അവരോട് പറഞ്ഞില്ലേ.

അപ്പോൾ അവരെന്നോട് പറഞ്ഞത് വളരെ രസകരമായി മറുപടിയാണ് "ഹൃദ്രോഗത്തിന് ആയുർവേദം ഉപയോഗിക്കുന്നു എന്ന് ആ ഡോക്ടറോട് പറഞ്ഞാൽ അദ്ദേഹം എന്നെ വഴക്ക് പറയും, വലിയ ഡിഗ്രി ഒക്കെ ഉള്ള ആളല്ലേ ആയുർവേദത്തിൽ തീരെ വിശ്വാസമില്ല. എന്തായാലും രോഗാവസ്ഥയിൽ എങ്ങനെയാണ് മാറ്റം ഉണ്ടായത് എന്ന് എനിക്കും എന്റെ വീട്ടിലുള്ളവർക്കും ഡോക്ടർക്കും അറിയാലോ അതുമതി''. ഈ രോഗി ഇപ്പോഴും എന്റെ ചികിത്സയിലാണ്, രോഗിയുടെ ഇപ്പോഴത്തെ അവസ്ഥ രണ്ടാമത്തെ റിപ്പോർട്ടിൽ Associated disease states എന്നതിൽ നിങ്ങൾക്ക് കാണാൻ കഴിയും. രണ്ടാമത്തെ പരിശോധനാഫലം കണ്ടപ്പോൾ എനിക്ക് ഇനിയും ഈ രോഗിയിൽ ചില മാറ്റങ്ങൾ ഉണ്ടാക്കാൻ കഴിയും എന്നുള്ള ഒരു വിശ്വാസമുണ്ട്.

ഇതര വൈദ്യ ശാസ്ത്രങ്ങളെ അപേക്ഷിച്ച് ആയുർവേദം പ്രാധാന്യം നൽകുന്ന ഒരു പ്രധാന സംഗതിയാണ് വേഗധാരണം. സ്വാഭാവികങ്ങളായ മല മുത്ര അധോവാത വേഗങ്ങളെ ബോധപൂർവം തടഞ്ഞുവെക്കുന്നതിനെയാണ് വേഗധാരണം എന്ന് പറയുന്നത്. ഇതുമൂലം പലതരത്തിലുള്ള രോഗങ്ങൾ ഒരു വ്യക്തിക്ക് ഉണ്ടാകുന്നു എന്ന് ആയുർവേദം പറയുന്നു.
രോഗാനുൽപാദനീയം എന്ന അധ്യായത്തിൽ "വേഗധാരണം" കൊണ്ട് ഉണ്ടാകുന്ന രോഗങ്ങളിൽ പ്രധാനമായും ആചാര്യൻ എടുത്തുപറയുന്ന ഒരു രോഗമാണ് ഹൃദ്രോഗം. ഹൃദയ വികാരങ്ങളുടെ പ്രധാന കാരണം നമ്മുടെ തെറ്റായ ജീവിത ശൈലി നിമിത്തവും, നാം സേവിക്കുന്ന അസാത്മ്യവും, വിരുദ്ധവുമായ ഭക്ഷണങ്ങളുടെ നിരന്തര ഉപയോഗം,അമിതാശനം മൂലവും നമ്മുടെ ശരീരത്തിലെ അഗ്നിയുടെ കർമ ശക്തി ദുർബലമാകുന്നു. ദുർബലമായ അഗ്നി തന്നെയാണ് സർവ രോഗങ്ങളുടെയും അടിസ്ഥാന കാരണം. ചയാപചയ തകരാറുകൾ നിമിത്തം ശരീരത്തിൽ അടിഞ്ഞ് കൂടുന്ന മാലിന്യങ്ങളെ ഇല്ലാതാക്കാനായി ഉചിതമായ ശോധന ചികിത്സകൾ കൃത്യമായ ഇടവേളകളിൽ ചെയ്താൽ ഒരു പരിധിവരെ ഹൃദ്രോഗത്തെ പ്രതിരോധിക്കാം. ചിലപ്പോൾ നിങ്ങളുടെ ഹൃദ്രോഗത്തിന് കാരണം കിടക്കുന്നത് നിങ്ങളുടെ കോഷ്ഠത്തിലും, പക്വാശയത്തിലും ആകാം എന്നത് ഒരു തിരിച്ചറിയപ്പെടാത്ത യാഥാർത്ഥ്യമാണ്. ഈ രോഗത്തെ വാതിക ഹൃദ്രോഗം ആയി എടുത്താണ് ഞാൻ ചികിത്സ ആരംഭിച്ചത് എന്റെ ചികിത്സയുടെ പ്രധാന ലക്ഷ്യങ്ങൾ പ്രധാനമായും അഗ്നിയെ ബലപ്പെടുത്തുക സ്രോതോരോധം മാറ്റുക,അപാന വായുവിന്റെയും, വ്യാന വായുവിന്റെയും പ്രവർത്തനം ക്രമപ്പെടുത്തുക, കൂടാതെ രോഗിയുടെ ആവരണം മാറ്റുകയും ചെയ്യുക എന്നതായിരുന്നു. പിന്നെ ചികിത്സയ്ക്കിടെ രോഗിക്ക് യാതൊരു വിധ ധാതുക്ഷയവും വരാതെ നോക്കി. ഒരു ഡോക്ടറിൽ രോഗി അർപ്പിക്കുന്ന വിശ്വാസമാണ് ഒരു ഡോക്ടർക്ക് ലഭിക്കുന്ന ഏറ്റവും വലിയ സമ്മാനം. 'ഡോക്ടേഴ്സ് ഡേ'👨‍⚕️ ആയിട്ട് ഇതൊന്നു പങ്കുവയ്ക്കണമെന്ന് തോന്നി.

നന്ദി

🌹🌹🌹🌹🌹🌹🌹🌹🌹🌹

ഡോ. പൗസ് പൗലോസ് MS(Ay)

സീതാറാം ആയുർവേദ സ്പെഷ്യാലിറ്റി ഹോസ്പിറ്റൽ

ചരകൻ

ചരകൻ
-------------

ആയുർവേദ ശാസ്ത്രത്തിലെ ഒരു പ്രധാന ആചാര്യനാണ് ചരകൻ. 'സഞ്ചാരി', 'ചികിത്സകൻ' എന്നൊക്കെയാണ്‌ 'ചരകൻ' എന്ന വാക്കിന്റെ അർത്ഥം. ചരകൻ ആരായിരുന്നു എന്നതിനെക്കുറിച്ച് പല അഭിപ്രായങ്ങളാണ് നിലവിലുളളത്. ഒരു വൈദ്യകുലത്തിന്റെ പൊതുനാമമാണ്‌ ചരകനെന്ന്‌ ചില ചരിത്ര പണ്ഡിതൻമാർ കരുതുന്നു. കുശാന സാമ്രാജ്യത്തിൽ ക്രിസ്തുവിനു മുൻപ് രണ്ടാം ശതകത്തിനും ക്രിസ്തുവിനു ശേഷം ഒന്നാം ശതകത്തിനും മിടയിൽ ജീവിച്ചിരുന്നു എന്നും, യോഗ ദർശനവും മഹാഭാഷ്യവും രചിച്ച പതഞ്ജലി മഹർഷി തന്നെയാണ് ചരകനെന്നും , കനിഷ്കൻ രാജാവിന്റെ ഭിഷഗ്വര സുഹൃത്തായിരുന്നു ചരകൻ എന്നും ഒരോ വിഭാഗം പണ്ഡിതന്മാർ അഭിപ്രായപ്പെടുന്നു.

അതുപോലെതന്നെ എ.ഡി. 100-നടുപ്പിച്ച്‌ കനിഷ്ക രാജാവിന്റെ കൊട്ടാരം വൈദ്യനായിരുന്ന ചരകനെപ്പറ്റി ബൗദ്ധ ഗ്രന്ഥമായ 'ത്രിപിടക'ത്തിൽ പറയുന്നുണ്ട്‌. മറ്റൊരു വിഭാഗം, അഥർവ്വ വേദം പരിഷ്കരിച്ച് "ചാരണ വിദ്യ" എന്ന കൃതി പ്രചരിപ്പിച്ചിരുന്ന ഭിഷഗ്വര സഞ്ചാരികളുടെ സംഘത്തിലെ ഒരു അംഗമായിരുന്നു ചരകൻ എന്ന് വിശ്വസിക്കുന്നു. എന്നാൽ ചരക സംഹിതയിൽ നിന്ന് ലഭിക്കുന്ന തെളിവുകളെ ആസ്പദമാക്കി ചരകൻ, ബൌദ്ധാനന്തര കാലഘട്ടത്തിൽ ഇന്ത്യയുടെ വടക്കു പടിഞ്ഞാറു ഭാഗത്ത് ഹിമാലയ താഴ്വരയിൽ ജീവിച്ചിരുന്നു എന്ന് അനുമാനിക്കാം. കനിഷ്കന്റെ രാജധാനിയിൽ ബി.സി.രണ്ടാം ശതകത്തിനും എ.ഡി.ഒന്നാം ശതകത്തിനും മധ്യേ ജീവിച്ചിരുന്ന കൊട്ടാരം വൈദ്യനായ കബിലബലൻ രചിച്ചതാണ്‌ ചരക സംഹിതയെന്നാണ്‌ പൊതുവെ ഉള്ള നിഗമനം.നാഷണൽ സയൻസ്‌ ഇൻസ്റ്റിട്ട്യൂട്ടിന്റെ കാലഗണന കമ്മറ്റി എത്തിയിട്ടുള്ള നിഗമനം ഇതാണ്‌: കനിഷ്കന്റെ കൊട്ടാരം വൈദ്യൻമാർക്ക്‌ നൽകിയിരുന്ന സ്ഥാനപ്പേരാണ്‌ 'ചരകൻ' എന്നത്‌.

ആയുർവേദത്തിന്റെ അടിസ്ഥാന ഗ്രന്ഥങ്ങളിൽ മുഖ്യമാണ്‌ ചരകസംഹിത. ആയുർവേദ ചികിത്സയെപ്പറ്റിയും ഔഷധങ്ങളെപ്പറ്റിയും 'ചരകസംഹിത'യിൽ പറയുന്നത്‌ രണ്ട്‌ സഹസ്രാബ്ദം കഴിഞ്ഞ്‌ ഇന്നും പ്രസക്തമാണെന്ന് പറയുമ്പോൾ, ചരകന്റെ പ്രാധാന്യം മനസ്സിലാക്കാം. ദഹനം, ഉപാപചയ പ്രവർത്തനങ്ങൾ, ശരീരപ്രതിരോധം തുടങ്ങിയവ സംബന്ധിച്ച ആദ്യധാരണകൾ രൂപപ്പെടുത്തിയത്‌ ചരകനാണ്‌. വാതം, പിത്തം, കഫം എന്നിങ്ങനെ ആയുർവേദത്തിലെ ത്രിദോഷ സങ്കൽപ്പം ശാസ്ത്രീയമായി ആദ്യം അവതരിപ്പിച്ചതും അദ്ദേഹമാണ്‌. ത്രിദോഷങ്ങൾ തമ്മിലുള്ള തുലനാവസ്ഥ താളംതെറ്റുമ്പോഴാണ്‌ രോഗങ്ങളുണ്ടാകുന്നതെന്ന്‌ അദ്ദേഹം വാദിച്ചു. ആയുർവേദം ഇന്നും പിന്തുടരുന്ന ചികിത്സാരീതി ഈ കഴ്ചപ്പാട്‌ ആധാരമാക്കിയുള്ളതാണ്‌.

ഇന്ത്യൻ തത്ത്വശാ‍സ്ത്ര സിദ്ധാന്തങ്ങളുടെ വളർച്ചയിലെ സുവർണ്ണ കാലഘട്ടത്തിലാണ് ചരകൻ ജീവിച്ചിരുന്നത്. അന്ന് സാംഖ്യ, ന്യായം, വൈശേഷികം, മീമാംസ, യോഗ, വേദാന്തം എന്ന തത്ത്വശാസ്ത്ര വിഭാഗങ്ങൾ വളർച്ചയുടെയും അവകലനത്തിന്റെയും വിവിധ ഘട്ടങ്ങളിലായിരുന്നു. അതുകൊണ്ടുതന്നെ, വേദങ്ങളുടെ ആധികാരികതയെ ചോദ്യം ചെയ്തിരുന്ന ബൌദ്ധ-ജൈന സിദ്ധാന്തങ്ങളുമായി നിരന്തരം ആശയ സംഘട്ടനങ്ങൾ നടന്നിരുന്ന കാലഘട്ടം കൂടിയായിരുന്നു. ബുദ്ധമത ആശയങ്ങൾ കുറച്ചൊക്കെ ചരകനെ സ്വാധീനിച്ചിട്ടുണ്ട് എന്ന "ചരകസംഹിത" വായിച്ചാൽ നമുക്ക് തോന്നാം എന്നാൽ ഈ വിഷയം ഇപ്പോഴും ചരിത്രകാരന്മാർക്കിടയിൽ ഒരു തർക്കവിഷയമായി നിലകൊള്ളുന്നു

മാനസിക/ശാരീരിക രോഗാവസ്ഥ മനുഷ്യന്റെ അടിസ്ഥാന പ്രകൃതിയാണ് എന്ന് വിശ്വസിച്ചിരുന്ന ചരകൻ, കാലാന്തരത്തിൽ ചുറ്റുപാടുകൾക്ക് മാറ്റമുണ്ടായാലും അതേ മാറ്റത്തെ അതിജീവിക്കുന്ന ശക്തമായ തത്ത്വശാസ്ത്ര അടിത്തറയുള്ള ഒരു വൈദ്യശാസ്ത്ര ശാഖ ഉരുത്തിരിയണമെന്ന് ആഗ്രഹിക്കുകയും അതിനു വേണ്ടി പ്രവർത്തിക്കുകയും ചെയ്തു. ചരക സംഹിതയ്ക്കും നൂറ്റാണ്ടുകൾ മുൻപ് പ്രചാരത്തിലിരുന്ന വൈദ്യ ഗ്രന്ഥമായിരുന്ന അഗ്നിവേശതന്ത്രം സൃഷ്ടിപരമായ പുന്നഃസംശോധനം നടത്തി ചരകസംഹിതയിൽ ഉൽപ്പെടുത്തിയിട്ടുണ്ട്.

ചരകസംഹിതയിൽ ഏകദേശം 149 രോഗങ്ങളെക്കുറിച്ചും അവയുടെ ലക്ഷണങ്ങളും ചികിത്സയും വിശദമായി പ്രതിപാദിക്കുന്നുണ്ട്. അതുകൂടാതെ 341 സസ്യങ്ങളെപ്പറ്റിയും, അതുകൂടാതെ ധാതുലവണങ്ങൾ അവയിൽ നിന്നുണ്ടാക്കാവുന്ന ഔഷധങ്ങളെക്കുറിച്ചും ചരക സംഹിതയിൽ വിവരിക്കുന്നു. സംസ്കൃതത്തിൽ ലഭ്യമായ ആദ്യ വൈദ്യശാസ്ത്ര ഗ്രന്ഥമെന്ന്‌ വിശേഷിപ്പിക്കാവുന്നത്‌ ചരക സംഹിതയാണ്‌. സൂത്രസ്ഥാനം, നിദാനസ്ഥാനം, വിമാനസ്ഥാനം, ശാരിരസ്ഥാനം, ഇന്ദ്രിയസ്ഥാനം, കൽപസ്ഥാനം, സിദ്ധിസ്ഥാനം, ചികിത്സാസ്ഥാനം എന്നിങ്ങനെ എട്ടു ഭാഗങ്ങളിലായി 120 അധ്യായങ്ങളുള്ള 'ചരകസംഹിത' അറബിയും, ഗ്രീക്ക് ഉൾപ്പെടെ ഒട്ടേറെ വിദേശ ഭാഷകളിലേക്കു വിവർത്തനം ചെയ്യപ്പെട്ടിട്ടുണ്ട്. ചികിത്സിക്കുന്നതിൽ കേമൻ ചരകൻ തന്നെയാണ് എന്നത് എല്ലാ ആചാര്യന്മാരും അംഗീകരിച്ച കാര്യം ആണ് "ചരകസ്തു ചികിത്സിതേ" എന്ന വരി തന്നെ അത് സൂചിപ്പിക്കുന്നു. പ്രശസ്ത ഹൃദ്രോഗ വിദഗ്ധൻ ഡോ.എം.എസ് വല്യത്താൻ ചരകസംഹിതയെ അടിസ്ഥാനമാക്കി എഴുതിയ പ്രശസ്ത ഗ്രന്ഥമാണ് ‘ലെഗസി ഓഫ് ചരക അല്ലെങ്കിൽ ചരക്ക് പൈതൃകം' കഴിയുമെങ്കിൽ വായിക്കുക ചരകനെക്കുറിച്ച് ഒരു വ്യക്തമായ ധാരണ ഈ പുസ്തകത്തിലുട നിങ്ങൾക്ക് ലഭിക്കും.

നന്ദി

🌹🌹🌹🌹🌹🌹🌹🌹🌹🌹

ഡോ. പൗസ് പൗലോസ് BAMS, MS(Ay)

സീതാറാം ആയുർവേദ സ്പെഷ്യാലിറ്റി ഹോസ്പിറ്റൽ. തൃശ്ശൂർ

"വ്യാജന്മാർ" ദുരുപയോഗം ചെയ്യുന്ന "വൈദ്യൻ" എന്ന പദം.

"വ്യാജന്മാർ" ദുരുപയോഗം ചെയ്യുന്ന "വൈദ്യൻ" എന്ന പദം.
..................................................................

കുറച്ച് പച്ച മലയാളത്തിൽ പറയുന്നതിൽ ആർക്കും വിഷമം ഒന്നും തോന്നരുത് "വൈദ്യൻ" എന്ന 'പദം' ഏത് അണ്ടനും അടകോടനും ഉപയോഗിക്കാം എന്ന നിലയിലാണ് ഇന്നത്തെ നിയമങ്ങൾ. യഥാർത്ഥത്തിൽ ആയുർവേദ ശാസ്ത്രവും, സിദ്ധവൈദ്യവും, ഹോമിയോയും, നാച്ചുറോപതിയും (B.S.M.S/ B.A.M.S/B.N.Y.S/ B.U.M.S./ B.H.M.S.) കോളേജിൽ പോയി അഞ്ചര വർഷം കഷ്ടപ്പെട്ട് പഠിച്ച് പാസ്സായവർക്ക് മാത്രം അർഹതപ്പെട്ട ഒരു വാക്കാണ് "വൈദ്യൻ" എന്ന പദം.

ഇവിടെ അഞ്ചാം ക്ലാസ്സും ഗുസ്തിയും അറിയാവുന്ന പതിനായിരക്കണക്കിന് "വ്യാജന്മാർ" അവരുടെ പേരോടു കൂടി ജനങ്ങളെ ചൂഷണം ചെയ്യാനും പറ്റിക്കാനും വേണ്ടി കൂട്ടി ചേർക്കുന്ന ഒരു പദമാണ് "വൈദ്യൻ" ഉദാഹരണത്തിന് നാട്ടുവൈദ്യൻ, കാട്ടു വൈദ്യൻ, പാരമ്പര്യ വൈദ്യൻ മുതലായവ. നമ്മളെ മാറിമാറി ഭരിക്കുന്ന സർക്കാരുകൾ ഇതുവരെ ആർക്കാണ് "വൈദ്യൻ" എന്ന പദം ഉപയോഗിക്കാൻ കഴിയുക ആരാണ് ഇതിന് അർഹരായിട്ട് ഉള്ളത് എന്നത് വ്യക്തമായി പ്രതിപാദിക്കുന്ന ഒരു നിയമ നിർമ്മാണവും ഇന്നേവരെ നടത്തിയിട്ടില്ല. അതിന്റെ ധൈര്യത്തിലാണ് ഇവർ സമൂഹത്തിൽ യഥേഷ്ടം അഴിഞ്ഞാട്ടി നടക്കുന്നത്.

അതുകൊണ്ട് ഏത് അലവലാതിക്കും അവരുടെ പേരോടുകൂടി ചേർക്കാൻ കഴിയുന്ന പദമായി മാറിയിരിക്കുന്നു "വൈദ്യൻ" എന്ന പരിപാവനമായ ഒരു പദം. ഇത് നിങ്ങളോട് പറയുമ്പോൾ എനിക്ക് വളരെയധികം വിഷമവും അതിലുപരി ധാർമിക രോഷവും ഉണ്ട് കാരണം ആയുര്‍വേദ ശാസ്ത്രത്തില്‍ വിദഗ്ധനായ വ്യക്തിയെ ആ ശാസ്ത്രത്തിലെ വിദ്വാൻ എന്ന അര്‍ത്ഥത്തില്‍ "വൈദ്യന്‍" എന്നാണ് ഭാരതീയ സംസ്കാരത്തിൽ വിളിക്കുന്നത്. എന്തുകൊണ്ടാണ് വൈദ്യൻ എന്ന പദം "ശാസ്ത്രം" കഷ്ടപ്പെട്ട് പഠിച്ചവർ മാത്രം ഉപയോഗിക്കാൻ പാടുള്ളൂ എന്ന് കൃത്യമായി പ്രതിപാദിക്കുന്ന ഒരു നിയമനിർമ്മാണം നമ്മുടെ സർക്കാർ നടത്താത്തത്.

ഇത്തരമൊരു നിയമനിർമ്മാണം നടക്കാത്തതു കൊണ്ട് മാത്രമാണ് "വൈദ്യൻ" എന്ന പദം തന്റെ പേരിനോടൊപ്പം ചേർത്ത ധാരാളം "വ്യാജ വൈദ്യന്മാർ" ഇന്ന് ദൈവത്തിന്റെ സ്വന്തം നാടായ കേരളത്തിൽ ഉണ്ടാകാൻ കാരണം. ഒരു സുപ്രഭാതത്തിൽ സ്വന്തം പേരിനൊപ്പം "വൈദ്യൻ" എന്ന് ഏത് അലവലാതിക്കും ചേർക്കാവുന്ന "വ്യാജന്മാരുടെ സ്വന്തം നാടായി" കേരളം മാറിയിരിക്കുന്നു. ആർക്കാണ് "വൈദ്യൻ" എന്ന 'പദം' അവരുടെ പേരോടുകൂടി ചേർക്കാൻ അർഹതയുള്ളത് എന്നത് വ്യക്തമായി പ്രതിപാദിക്കുന്ന ഒരു നിയമനിർമ്മാണം നമ്മുടെ സർക്കാർ നടത്തിയാൽ മാത്രമേ ഇത്തരത്തിലുള്ള വ്യാജന്മാർ ജനങ്ങളെ ചൂഷണം ചെയ്യുന്നതിൽ നിന്നും നമ്മുടെ സമൂഹത്തെ സംരക്ഷിക്കുവാൻ സാധിക്കുകയുള്ളൂ.

ഒരു സുപ്രഭാതത്തിൽ "വൈദ്യൻ" എന്ന പദം സ്വന്തം പേരിനൊപ്പം ചേർത്ത് ജനങ്ങളെ വഞ്ചിക്കുന്ന ഒരു കൂട്ടം വഞ്ചകരെ തടയുന്നതിൽ ശക്തമായ ഒരു നിയമത്തിന്റെ അഭാവം മൂലം ഇന്നേവരെ സാധിച്ചിട്ടില്ല എന്ന യാഥാർത്ഥ്യം ജനങ്ങൾ തിരിച്ചറിയുക. ഒരുകൂട്ടം "വ്യാജ വൈദ്യന്മാർ" ഉൾപ്പെടുന്ന "വോട്ടുബാങ്കുകളെ" സംരക്ഷിക്കുക എന്നതിലുപരി ജനങ്ങളുടെ ജീവനും, സ്വത്തിനും ഭീഷണിയായ ഒരു കൂട്ടം സാമൂഹ്യദ്രോഹികൾ "വൈദ്യൻ" എന്ന പദം ദുരുപയോഗം ചെയ്യുന്നത് തടയുക എന്ന നിലപാട് നമ്മുടെ സർക്കാർ കൈക്കൊള്ളേണ്ടി ഇരിക്കുന്നു. എനിക്കൊന്നേ പറയാനുള്ളൂ ഇത്തരത്തിൽ ജനങ്ങളെ കബളിപ്പിച്ച് "വൈദ്യൻ" എന്ന 'പദം' ദുരുപയോഗം ചെയ്ത് ജീവിക്കുന്ന ഈ ജനവഞ്ചകർ സമൂഹത്തെ കാർന്നുതിന്നുന്ന "കാൻസർ" തന്നെയാണ് അതിനെ വേരോടു കൂടി പിഴുതെറിയേണ്ട സമയമായിരിക്കുന്നു.

“കുവൈദ്യോ നൃപ ദോഷത:”

ശ്ലോകാർത്ഥം:- “വ്യാജ വൈദ്യൻമാർ ഉണ്ടാകുന്നത് ഭരണാധികാരിയുടെ കഴിവുകേടു കൊണ്ടാണ്"

നന്ദി

🌹🌹🌹🌹🌹🌹🌹🌹🌹🌹🌹🌹🌹

ഡോ. പൗസ് പൗലോസ് BAMS, MS(Ay)

സീതാറാം ആയുർവേദ സ്പെഷ്യാലിറ്റി ഹോസ്പിറ്റൽ. തൃശ്ശൂർ

വിപ്ലവാത്മക ഗവേഷണം "പനി വന്നാൽ ബിയർ ചുമ വന്നാൽ റം "

വിപ്ലവാത്മക ഗവേഷണം 😋 "പനി വന്നാൽ ബിയർ 🍺 ചുമ വന്നാൽ റം  "
...................................................................

ഈ അടുത്തിടെ ഒരു പുതിയ പഠനം നടന്നു "പനി 🤒 വന്നാൽ പാരസിറ്റമോൾ കഴിക്കുന്നതിനു പകരം ബിയർ കുടിക്കണമെന്ന് ബ്രിട്ടീഷ് സർവ്വകലാശാല" 🍺 . ഇതേപോലെയുള്ള വിപ്ലവാത്മക പഠനങ്ങൾ തൊണ്ട തൊടാതെ വിഴുങ്ങി അത് അതേപടി അനുസരിക്കുന്ന ഒരു കൂട്ടം "ആധുനിക വാദികൾ" നമ്മുടെ ഇടയിലുണ്ട് ഇവരെ നമുക്ക് സ്യൂഡോ ബുദ്ധിജീവികൾ എന്ന് വിളിക്കാം. ഇംഗ്ലീഷുകാർ എന്തുപറഞ്ഞാലും അത് അവർക്ക് ആപ്തവാക്യം ആണ്, അതങ്ങ് അക്ഷരംപ്രതി അനുസരിക്കും. ഇതേ പോലെയുള്ള ഓരോ പഠനങ്ങൾ പലപ്പോഴും ആയി പല വിദേശ സർവകലാശാലകളും ഇറക്കിയിട്ടുണ്ട്. അതിൽ ഒന്നാണ് വെളിച്ചെണ്ണ ഹൃദ്രോഗത്തിന് കാരണമാകുമെന്ന് നടന്ന പഠനം അതറിഞ്ഞപ്പോൾ എല്ലാവരും വെളിച്ചെണ്ണ നിർത്തി റിഫൈൻഡ് ഓയിലുകൾ ആയ സൺഫ്ലവർ ഓയിൽ, പാമോയിൽ മുതലായവ ഉപയോഗിക്കാൻ തുടങ്ങി. പിന്നീട് വെർജിൻ കോക്കനട്ട് ഓയിൽ നല്ല കൊളസ്ട്രോൾ കൂട്ടും എന്ന് വേറെ ഒരു വിദേശ സർവകലാശാല പറഞ്ഞപ്പോൾ അത് ഡെയിലി ഓരോ ടീസ്പൂൺ കഴിക്കാൻ തുടങ്ങി. അതുപോലെതന്നെ മൂലക്കുരു ഉള്ള രോഗികൾക്ക് വളരെ ആശ്വാസം നൽകിയ ഒരു വിദേശ സർവ്വകലാശാലയുടെ പഠനം ആയിരുന്നു കോഴിമുട്ടയും, ബ്രോയിലർ ചിക്കനും കഴിച്ചാൽ പൈൽസ് വരില്ല എന്നത്, അത് കേട്ട പാതി എല്ലാ മൂലവ്യാധി രോഗികളും ധൈര്യമായി കോഴിയിറച്ചിയും, കോഴിമുട്ടയും കഴിക്കാൻ തുടങ്ങി. ഇനി വേറെ ഏതെങ്കിലും വിദേശ സർവകലാശാല പഠനം നടത്തി കോഴി കഴിക്കുന്നത് മൂല വ്യാധികൾ ഉണ്ടാക്കും എന്ന് പറഞ്ഞാൽ മാത്രമേ അവർ കോഴിത്തീറ്റ നിർത്തൂ.മാംസാഹാരം കഴിച്ച് എങ്ങനെ തടി കുറക്കാം എന്ന് ചിന്തിച്ചിരുന്നവർക്ക് "കീറ്റോ ഡയറ്റ്" ഒരു ആശ്വാസമായിരുന്നു. ഇതുപോലെ ഒരു വിദേശ സർവകലാശാല നടത്തിയ വിപ്ലവാത്മക പഠനം ആണ് കഫക്കെട്ടും, ചൂമയും മാറാൻ കരിമ്പുല്പന്നങ്ങളായ മൊളാസ്സസ്, കരിമ്പുനീര് തുടങ്ങിയവ പുളിപ്പിച്ചും വാറ്റിയും ഉണ്ടാക്കുന്ന "റം" കഴിക്കുന്നത് വളരെ നല്ലതാണ്. ഇത് വായിച്ചറിഞ്ഞ എന്റെ ഒരു സുഹൃത്ത് കഫക്കെട്ട് വന്നാൽ RUM 🥃ആണ് കഴിക്കാറ് മേമ്പൊടിക്ക് കുറച്ച് കുരുമുളക് പൊടിയും ചേർക്കും. ബ്രിട്ടീഷ് സർവകലാശാലയുടെ ബിയറുമായി🍻 ബന്ധപ്പെട്ട പഠനം വായിച്ച് പനി 🤒വന്നാൽ നേരെ ബിവറേജസ്സിലേക്ക് ഓടുന്ന ഒരു കൂട്ടം സ്യൂഡോ ബുദ്ധിജീവികളെ അധികം വൈകാതെ നമുക്ക് കാണുവാൻ സാധിക്കും 🤠.

നന്ദി

Dr.Pouse Poulose MS(Ay)

അന്താരാഷ്ട്ര യോഗ ദിനം ( ജൂൺ 21)

അന്താരാഷ്ട്ര യോഗ ദിനം ( ജൂൺ 21)

ഭാരതത്തിന്റെ പൗരാണികമായ ആരോഗ്യപരിപാലന സമ്പ്രദായങ്ങളിൽ ഒന്നാണ്‌ യോഗ. ഭാരതം ലോകത്തിന് നൽകിയ സംഭാവനയാണിത്. മനുഷ്യനെ ശാരീരികവും മാനസികവും ആത്മീയവുമായ ഉന്നതിയിലേക്ക് നയിക്കുക എന്ന ഉദ്ദേശത്തൊട് കൂടി രചിക്കപ്പെട്ട കൃതിയാണ് പതഞ്ജലി മഹർഷിയുടെ യോഗസൂത്രം എന്ന ഗ്രന്ഥം.യോഗം കൊണ്ട് ചിത്തത്തിന്‍റെയും (മനസ്സിന്റെയും) വ്യാകരണ ശാസ്ത്രം കൊണ്ട് ശബ്ദങ്ങളുടെയും വൈദ്യശാസ്ത്രം കൊണ്ട് ശരീരത്തിന്‍റെയും മാലിന്യങ്ങൾ നശിപ്പിച്ച മഹർഷി ശ്രേഷ്ഠനായ പതഞ്ജലിക്ക് പ്രണാമങ്ങൾ അർപ്പിച്ചു കൊള്ളുന്നു,

ന്യൂജൻ കാമുകീ കാമുകന്മാർ

ന്യൂജൻ കാമുകീ കാമുകന്മാർ
...................................................

മരംചുറ്റി പ്രണയത്തിന്റെ കാലം ഒക്കെ പോയ ഇപ്പോൾ സൈക്കോ കമിതാക്കളുടെ കാലമാണിത്. ഈ നവയുഗത്തിൽ സ്വന്തം ഉൾക്കിടിലമായ സ്നേഹം പ്രകടിപ്പിക്കാൻ ഒരു ലിറ്റർ പെട്രോളും, വെട്ടുകത്തിയും നല്ല ഒരു ചേരുവ ആയിട്ടാണ് ഇവർ കരുതുന്നത്. അതുമാത്രമല്ല പ്രണയ നൈരാശ്യം എന്ന "കാമ ജ്വരം" പിടിച്ചാൽ മുകളിൽ പറഞ്ഞ ഐറ്റംസ് ഉപയോഗിക്കാനും സൈക്കോ കമിതാക്കൾക്ക് യാതൊരു മടിയുമില്ല. ഇത് സാധിച്ചില്ലെങ്കിൽ പിന്നെ ഓൺലൈൻ ആയി ഫേസ്ബുക്കിൽ തന്റെ ആത്മഹത്യ തൽസമയം സംപ്രേഷണം ചെയ്യുക, ആത്മഹത്യ ചെയ്യുന്ന വീഡിയോ വാട്സ്ആപ്പ് സന്ദേശമായി കമിതാവിന് അയച്ചുകൊടുക്കുക മുതലായ ന്യൂജൻ രീതികൾ സൈക്കോ കമിതാക്കൾ അനുവർത്തിച്ചു പോരുന്നു.

പൈൽസിൽ "ബംഗാളി കെട്ട്" കെട്ടി പൊട്ടിക്കുന്ന ബംഗാളി ഭായ്

പൈൽസിൽ "ബംഗാളി കെട്ട്" കെട്ടി പൊട്ടിക്കുന്ന ബംഗാളി ഭായ്
.......................................................................

ഇന്ന് പൈൽസിന്റെ കലശലായ വേദനയും, രക്തം പോക്കും കാരണം ക്ലിനിക്കിൽ ഒരാൾ വന്നിരുന്നു ഒരു ബംഗാളിയുടെ അടുത്തുപോയി പൈൽസിന് "ബംഗാളി കെട്ട്"📿 കെട്ടി പൊട്ടിച്ച കഥ പറഞ്ഞാണ് വന്നത്. ഒരു കെട്ട് കെട്ടാൻ ഏകദേശം 10000 രൂപ അങ്ങേര് വാങ്ങിച്ചു, നമ്മുടെ ബംഗാളി ഭായ് കെട്ടിയ കെട്ട് ഒക്കെ പോയി എന്നാൽ മൂലക്കുരു അതേപോലെ അവിടെ തന്നെ ഉണ്ട്. എന്തായാലും നമ്മുടെ രോഗിയുടെ പോക്കറ്റിലെ പൈസ പോയത് മിച്ചം ചുരുക്കിപ്പറഞ്ഞാൽ "കയ്യിലെ പൈസ കൊടുത്ത് കടിക്കുന്ന പട്ടിയെ വാങ്ങി" എന്ന അവസ്ഥയാണ് പാവത്തിന് ഇപ്പോൾ. ജനങ്ങൾക്ക് ഒരു തെറ്റിദ്ധാരണ ഉണ്ട് മൂലക്കുരുവിൽ (പൈൽസ്) ഒരു കെട്ട് ഇട്ടാൽ അത് സുഖപ്പെടും, അത് "ബംഗാളി കെട്ട്" ആണെങ്കിൽ അടിപൊളി. നാലാം ക്ലാസ്സും ഗുസ്തിയും അറിയാവുന്ന ബംഗാളിയുടെ അടുത്ത് പോയി പൈൽസിൽ കെട്ട് ഇട്ടവർ ജനങ്ങൾക്കിടയിൽ പറഞ്ഞ് പരത്തുന്ന ഒരു തെറ്റിദ്ധാരണ ഉണ്ട് ബംഗാളി ഭായ് ഒരു "ബംഗാളി കെട്ട്" അങ്ങ് ഇട്ടാൽ മൂന്ന് ദിവസത്തിനുള്ളിൽ പൈൽസ് പൊട്ടി ചോര പോകും, പിന്നീട് അത് ഉണങ്ങിക്കഴിഞ്ഞാൽ മൂലക്കുരുവിന്റെ പൊടി പോലും കാണില്ല എന്നതാണ് ആ തെറ്റായ പ്രചരണം. ഇത് വേദവാക്യമായി എടുത്ത് ബംഗാളി ഭായിമാരുടെ അടുത്ത് പോയി ആരും അറിയാതെ ബംഗാളി കേട്ട് ഇട്ട് പോക്കറ്റിലെ പൈസ കളയുന്നവർ ധാരാളമാണ് പിന്നീട് നാണക്കേട് കാരണം അത് പുറത്ത് പറയാറുമില്ല. പൈൽസ് എന്ന് പറയുന്നത് ഒരു ജീവിതശൈലി രോഗമാണ് എന്നത് ആദ്യം മനസ്സിലാക്കുക, ഈ രോഗം മാറാൻ ആദ്യം ചെയ്യേണ്ടത് ജീവിതശൈലി ചിട്ടപ്പെടുത്തുക എന്നതാണ്. ആയുർവേദ ശാസ്ത്രത്തിൽ പൈൽസിനെ "അർശസ്സ്" എന്നാണ് പറയുന്നത്. അർശസ്സ് വന്നാൽ അതിനെ എങ്ങനെ ചികിത്സിക്കണം എന്നത് ആയുർവേദത്തിൽ വ്യക്തമായി പറയുന്നുണ്ട്. മൂലക്കുരുവിൽ ഒരു കെട്ട് ഇട്ട് കഴിഞ്ഞാൽ അത് അവിടെ നിന്നും പോകില്ല എന്നത് ദയവുചെയ്ത് മനസ്സിലാക്കുക, അത് കളയാൻ അതിന്റെതായ മാർഗ്ഗങ്ങൾ ആയുർവേദ ശാസ്ത്രത്തിലും മറ്റ് വൈദ്യശാസ്ത്ര ശാഖകളിലും ഉണ്ട്. ഇങ്ങനെ "ബംഗാളി കെട്ട്" കെട്ടി കുളമായ രോഗികളെ ഇടയ്ക്കിടയ്ക്ക് കാണാറുണ്ട് അതാണ് ഈ പോസ്റ്റ് ഇടുന്നത്. അതുകൊണ്ട് ഇനിയെങ്കിലും ആരെങ്കിലും പറയുന്നത് കേട്ട് ബംഗാളികളുടെ അടുത്തുപോയി "ബംഗാളി കെട്ടും" കെട്ടി ഉള്ള രോഗാവസ്ഥ കുളം ആകുന്നതിന് മുമ്പ് ഈ കാര്യങ്ങൾ കൂടി ഒന്ന് മനസ്സിൽ ഓർത്താൽ നന്നായിരിക്കും.

നന്ദി

🌹🌹🌹🌹🌹🌹🌹🌹🌹🌹

ഡോ. പൗസ് പൗലോസ് MS(Ay)

സീതാറാം ആയുർവേദ സ്പെഷ്യാലിറ്റി ഹോസ്പിറ്റൽ. തൃശ്ശൂർ

അട്ടകളുടെ ലീലാവിലാസങ്ങൾ

അട്ടകളുടെ ലീലാവിലാസങ്ങൾ
............................................................................

ഈ കഥ എന്നോട് പറഞ്ഞത് ഞങ്ങളുടെ ഹോസ്പിറ്റലിലെ ഭഗവതിഅമ്മാൾ ഡോക്ടർ ആണ്. എന്നാൽ ഡോക്ടറോട് ഈ കഥ പറഞ്ഞത് പണ്ട് കാലത്തെ പേരുകേട്ട ഒരു വൈദ്യരാണ് അതിനാൽ ഈ കഥയ്ക്ക് ഒരുപാട് പഴക്കമുണ്ട്. ഇനി ഞാൻ കഥ പറയാം ഒരിക്കൽ ഒരു പെൺകുട്ടി ഈ വൈദ്യരെ കാണാൻ വന്നു 👩 വയസ്സ് ഏകദേശം ഒരു 18 നും 20 നും ഇടയിൽ വരും, വൈദ്യന്റെ അടുക്കൽ വരുമ്പോൾ കുട്ടി വളരെ ക്ഷീണിതയാണ് കഴിഞ്ഞ ഒരു രണ്ടാഴ്ചയ്ക്കുള്ളിൽ ശരീരമെല്ലാം വല്ലാതെ അങ്ങ് ചടച്ചു, വിശപ്പില്ല എന്നും വയറുവേദന, ചർദ്ദി, പിന്നെ ചെറിയ പനിയുണ്ട്, മൊത്തത്തിൽ വായു കോപിച്ച് വയർ എല്ലാം അങ്ങ് വീർത്തു നിൽക്കുന്നു കണ്ടാൽ ഗർഭിണി ആണെന്ന് തോന്നും.

കഴിഞ്ഞവട്ടം ആർത്തവമുണ്ടായതിനു ശേഷം ആണ് ഈ ബുദ്ധിമുട്ടുകൾ എല്ലാം തുടങ്ങിയത്. ഓരോ ദിവസം ചെല്ലും തോറും കുട്ടിയുടെ ആരോഗ്യം ക്ഷയിച്ചു വരുന്നു വേറെ രണ്ട് വൈദ്യന്മാരെ കാണിച്ചു എന്നാലും ആരോഗ്യസ്ഥിതി വഷളാവുക അല്ലാതെ യാതൊരു ഫലമില്ല."വൈദ്യരെ എങ്ങനെ എങ്കിലും എന്നെ ഒന്ന് രക്ഷിക്കണം" വളരെ ദയനീയമായി അദ്ദേഹത്തിന്റെ നോക്കി കൊണ്ട് ആ കുട്ടി പറഞ്ഞു. രോഗിയെ സമാധാനിപ്പിക്കാൻ വേണ്ടി "പേടിക്കേണ്ട ഒക്കെ ശരിയാക്കാം" എന്ന് പറഞ്ഞ് വൈദ്യർ കുട്ടിയുടെ ജീവിതരീതികളും രോഗം വരാൻ ഉണ്ടായ സാഹചര്യവും എല്ലാം ചോദിച്ചു മനസ്സിലാക്കി, അതിനു ശേഷം കുറച്ച് മരുന്ന് കുറിച്ചു കൊടുത്തു. മരുന്നു കൂടാതെ അദ്ദേഹം മറ്റൊരു ചികിത്സ കൂടി നിശ്ചയിച്ചു അതെന്താണ് എന്ന് വെച്ചാൽ വൈദ്യൻ കുട്ടിയോട് പുകയില കഷായം ഉണ്ടാക്കി ഒരു പാത്രത്തിൽ ഒഴിച്ച് ഗുഹ്യ ഭാഗങ്ങളിൽ ആവി കൊള്ളും വിധം അതിനുമുകളിൽ ഇരിക്കാൻ പറഞ്ഞു.

എന്തായാലും നമ്മുടെ രോഗി വൈദ്യർ പറഞ്ഞത് പോലെ മരുന്ന് എല്ലാം സേവിച്ചതിനു ശേഷം പുകയില കഷായത്തിന്റെ മുകളിൽ ഗുഹ്യഭാഗങ്ങളിൽ ആവി കൊള്ളും വിധം ഇരുന്നു. ഏകദേശം ഒരു പതിനഞ്ചു മിനിട്ട് ഇരുന്നു കാണും, കുട്ടിയുടെ യോനി ദ്വാരത്തിലും മറ്റും നന്നായി ആവി തട്ടിയപ്പോൾ യോനി ദ്വാരത്തിലൂടെ കുളയട്ടകൾ പുറത്തു ചാടാൻ തുടങ്ങി. ഏകദേശം പത്തോളം ചെറിയ കുളയട്ടകൾ 🐛 നേരെ വന്ന് പുകയില കഷായത്തിൽ വീണു. ഇതേപോലെ ആ പെൺകുട്ടി മൂന്ന് ദിവസം അടുപ്പിച്ച് പുകയില കഷായം കൊണ്ട് ഗുഹ്യഭാഗങ്ങളിൽ ആവി കൊള്ളിച്ചു എന്നാൽ രണ്ടാം ദിവസം, മൂന്നാം ദിവസവും പുതിയ അട്ടകൾ ഒന്നും പുറത്തു ചാടിയില്ല.

ആദ്യദിവസം തന്നെ പുകയില കഷായത്തിന്റെ തീഷ്ണമായ ആവി തട്ടിയപ്പോൾ അട്ടകളെല്ലാം 🐛 ജീവനും കൊണ്ട് പുറത്തു ചാടി നേരെ പുകയില കഷായത്തിൽ വീണു വീര ചരമം പ്രാപിച്ചു. ഇനി ഞാൻ ഈ കുളയട്ടകൾ എങ്ങനെ യോനി ദ്വാരത്തിൽ കൂടെ ഗർഭാശയത്തിൽ കടന്നു എന്ന് പറയാം. ആ പെൺകുട്ടിയുടെ നാട് ഒരു മലമ്പ്രദേശമാണ് അവിടെ എല്ലാം ധാരാളം അട്ടകൾ ഉള്ള സ്ഥലമാണ്. ഈ പെൺകുട്ടി ദിവസവും കുളിക്കാൻ പോകുന്നത് വീടിനടുത്തുള്ള ഒരു കുളത്തിലാണ് ഈ കുളത്തിൽ ആകട്ടെ ധാരാളം അട്ടകളും ഉണ്ട്. ആർത്തവ സമയത്തും കുളത്തിൽ ഈ പെൺകുട്ടി കുളിക്കാൻ പോയിരുന്നു. ഈ സമയം ആർത്തവ രക്തത്തിൽ ആകൃഷ്ടരായ ചില കുളയട്ടകൾ ആവൾ പോലും അറിയാതെ യോനി ദ്വാരത്തിലൂടെ ഗർഭാശയത്തിൽ കടന്നു എന്നിട്ട് സുഭിക്ഷമായി രക്തം എല്ലാം കുടിച്ച് അവിടെ സ്ഥിരതാമസമാക്കി.

കുട്ടിയുടെ ഗർഭാശയത്തിൽ കുളയട്ടകൾ ഉണ്ടാകും എന്നത് ആർത്തവസമയത്ത് കുട്ടി കുളത്തിൽ കുളിക്കാൻ പോയി എന്നു പറഞ്ഞപ്പോൾ വൈദ്യർ ഊഹിച്ചു കാണും. ഇവിടെ വൈദ്യന്റെ യുക്തിയാണ് രോഗിയുടെ ജീവൻ രക്ഷിക്കുന്നത് പുകയിലക്കഷായം, കല്ലുപ്പ്, മഞ്ഞൾ, കടുക് മുതലായവ അട്ടക്ക് അലർജിയാണ്, ഇതിൽ തന്നെ ഏറ്റവും തീക്ഷ്ണമായ പുകയില കഷായത്തിന്റെ ആവി തട്ടിയാൽ അട്ടകൾ പുറത്തു ചാടും എന്ന യുക്തിയിൽ നിന്നാണ് പുകയില കഷായത്തിന്റെ ആവി ഗുഹ്യഭാഗങ്ങളിൽ കൊള്ളാൻ വൈദ്യർ രോഗിക്ക് ചികിത്സയായി നിശ്ചയിച്ചത്.

എന്തായാലും ചികിത്സ ഫലിച്ചു നമ്മുടെ കഥയിലെ പ്രധാന കഥാപാത്രമായ "കുളയട്ട'' 🐛 പുറത്തു ചാടി ഒരാഴ്ച കഴിഞ്ഞപ്പോൾ തന്നെ കുട്ടിക്ക് നല്ല ശക്തമായി ആർത്തവം വന്നു. എന്നാൽ ആ ആർത്തവ ദിവസങ്ങളിൽ പഴയതുപോലെ കുട്ടി കുളത്തിൽ ഒന്നും കുളിക്കാൻ പോയില്ല. അതിനുശേഷം കുറച്ചു ദിവസങ്ങൾക്കകം തന്നെ ക്ഷീണമെല്ലാം മാറി ആവൾ പൂർണ്ണ ആരോഗ്യവതിയായി തീർന്നു എന്നാണ് കഥ. എന്തായാലും ആർത്തവ സമയത്ത് സ്ത്രീകൾ ആരും അട്ടകൾ ധാരാളം ഉള്ള കുളത്തിലും, കായലിലും പോയി കുളിക്കാതെ ഇരിക്കുന്നതാണ് നല്ലത് ചിലപ്പോൾ രക്തദാഹികളായ അട്ടകൾ 🐛 പണി തരാൻ സാധ്യതയുണ്ട്.

നന്ദി

🌹🌹🌹🌹🌹🌹

ഡോ. പൗസ് പൗലോസ് BAMS, MS(Ay)

സീതാറാം ആയുർവേദ സ്പെഷ്യാലിറ്റി ഹോസ്പിറ്റൽ. തൃശ്ശൂർ

ഒരു തുമ്മൽ രോഗിയുടെ കഥ

ഒരു തുമ്മൽ രോഗിയുടെ കഥ
--------------------------------------------

ഈ കഥ എന്നോട് പറഞ്ഞത് എന്റെ പ്രിയപ്പെട്ട ഗുരുനാഥൻ ആയ ഡോ.മന്നച്ഛൻ സാറാണ്. ഞാൻ ഒഴിവു കിട്ടുമ്പോൾ സാറിന്റെ അടുത്തു പോയി സൊറ പറഞ്ഞിരിക്കും അതിനിടയിൽ ആയുർവേദ ശാസ്ത്രവുമായി ബന്ധപ്പെട്ട എന്റെ സംശയങ്ങൾ ചോദിച്ചു സംശയനിവാരണം നടത്തും ഇത് ഒരു സ്ഥിരം പരിപാടിയാണ്.

ഒരിക്കൽ ഞാൻ സാറിനോട് ചോദിച്ചു "സാർ ഈ വേഗങ്ങൾ നിരോധിച്ചാൽ ( suppression of natural urges) ഒരുപാട് രോഗങ്ങൾ ഉണ്ടാകുമെന്ന് ശാസ്ത്രത്തിൽ പറയുന്നില്ല അതിനു കുറച്ചു ഉദാഹരണം പറഞ്ഞ് തരണം"..... അപ്പോഴാണ് സാർ നമ്മുടെ കഥയിലെ പ്രധാന കഥാപാത്രമായ ആശാരിയുടെ കഥ പറഞ്ഞ് തന്നത്.

ഈ ആശാരി സാറിന്റെ അടുത്ത് അർദ്ദിതം ചികിത്സിക്കാനായി കുറച്ച് വർഷങ്ങൾക്ക് മുമ്പ് സമീപിച്ചതാണ്. സാർ, രോഗിയുടെ കേസ് ദോഷ നിരൂപണം ചെയ്തു വിശദമായി പഠിച്ചു പിന്നീട് മുമ്പുണ്ടായ അസുഖങ്ങളെക്കുറിച്ച് എല്ലാം ചോദിച്ചു മനസ്സിലാക്കി ഇതിൽ നിന്നും ഒരു രസകരമായ വസ്തുത സാർ കണ്ടെത്തി അതിനെ ചികിത്സിച്ചു അദ്ദേഹത്തിന്റെ രോഗം മാറി. ഇനി ഞാൻ ആ സസ്പെൻസ് എന്താണെന്ന് പറയാം.

ഈ രോഗിക്ക് പൊടി അലർജി ആണ് മരപ്പണി ആയതിനാൽ സ്ഥിരം പൊടി യുമായുള്ള സംസർഗം ഉണ്ടാകും അതുകൊണ്ട് എപ്പോഴും തുമ്മി കൊണ്ടിരിക്കും. തുമ്മൽ ഉണ്ടാകാതിരിക്കാൻ ആൻറി-ഹിസ്റ്റമിൻ ദിവസവും കാലങ്ങളായി ഇദ്ദേഹം കഴിക്കുന്നു. ഈ മരുന്നു കഴിച്ചു തുമ്മൽ മാറിയെങ്കിലും അദ്ദേഹത്തിന് വേറെ പല ശാരീരിക അസ്വസ്ഥതകളും അപ്പോൾ ഉണ്ട്.

അതിനു ശേഷം കുറച്ചു നാളുകൾക്കു മുമ്പ് അദ്ദേഹത്തിന് അർദ്ദിതം വന്നു മുഖവും കണ്ണും കോടി. അർദ്ദിതം മാറാൻ ഇദ്ദേഹം ചികിത്സകൾ ഒരുപാട് ചെയ്തു എന്നാലും വായുടെ കോടൽ പൂർണ്ണമായും മാറിയിട്ടില്ല. അതുപോലെതന്നെ കണ്ണ് പൂർണമായി തുറക്കാനും പറ്റില്ല അടക്കാനും പറ്റില്ല. രോഗിയെ വിശദമായി പഠിച്ചതിനു ശേഷം സാർ അദ്ദേഹത്തിന് ആവശ്യമായ മരുന്നുകൾ എല്ലാം കുറച്ചു കൊടുത്തു. പിന്നെ ദിവസവും പ്രതിമർശ നസ്യം ചെയ്യാനും പറഞ്ഞു. അതുകൂടാതെ ആൻറി-ഹിസ്റ്റമിൻ ഉപയോഗം പൂർണമായി നിർത്താനും പറഞ്ഞു.

ഇതിനുപുറമേ സാർ ഒരു രസകരമായ ചികിത്സ കൂടി നിശ്ചയിച്ചു അതാണ് ഈ ചികിത്സയിലെ രസം, അതെന്താണെന്നു വച്ചാൽ രോഗിയോട് കാർപ്പാസാസ്ഥ്യാദി തൈലം തലയിലും, മുഖത്തും പുരട്ടി കണ്ണടച്ച് രാവിലെ സൂര്യനെ നോക്കി നിൽക്കാൻ പറഞ്ഞു സംഗതി രണ്ടു ദിവസം കഴിഞ്ഞപ്പോൾ അദ്ദേഹം തുമ്മാൻ തുടങ്ങി. ഇവിടെ ഈ രോഗി ചെയ്തത് എന്താണെന്ന് വെച്ചാൽ പൊടി അലർജി കൊണ്ടുള്ള തുമ്മൽ ഉണ്ടാകാനുള്ള കാരണം ചികിത്സിച്ചു സുഖപ്പെടുത്താൻ തയ്യാറാകാതെ ഒരു എളുപ്പ പണിക്ക് ആൻറി-ഹിസ്റ്റമിൻ തുടർച്ചയായി കഴിച്ച് തുമ്മൽ എന്നു വേഗത്തെ നിരോധിക്കുകയാണ് ചെയ്തത്.

പിന്നീട് കുറച്ചു ദിവസം സൂര്യനെ നോക്കിയാൽ അദ്ദേഹം നിർത്താതെ തുമ്മാൻ തുടങ്ങും. കൂടെ പ്രതിമർശ നസ്യം കൂടിയായപ്പോൾ കഫം എല്ലാം അങ്ങ് കുറഞ്ഞു പിന്നീട് തുമ്മൽ തന്നെ നിന്നു ഇപ്പോൾ അദ്ദേഹത്തിന് പൊടിയുടെ അലർജി ഒന്നുമില്ല. പിന്നെ ചികിത്സയും ഫലിച്ചു അർദ്ദിതം പൂർണ്ണമായും സുഖപ്പെട്ടു.

ഞാൻ സാറിനോട് ചോദിച്ചു "എന്തിനാണ് സാർ കാർപ്പാസാസ്ഥ്യാദി തൈലം പുരട്ടി സൂര്യൻ കണ്ണടച്ചു നോക്കി നിൽക്കാൻ പറഞ്ഞത്" അതിന് അദ്ദേഹം ഇങ്ങനെയാണ് മറുപടി പറഞ്ഞത് "തുമ്മൽ എന്ന വേഗം നിരോധിച്ചാൽ അർദ്ദിതം ഉണ്ടാകും എന്ന് ശാസ്ത്രത്തിൽ പറഞ്ഞിട്ടുണ്ട് ആ തടഞ്ഞുനിർത്തിയ വേഗത്തെ വീണ്ടും പുറപ്പെടുവിക്കാൻ സൂര്യനെ നോക്കാനും വേഗ നിരോധനത്തിന്റെ ചികിത്സയിൽ പറഞ്ഞിട്ടുണ്ട് അതെ ഞാൻ ചെയ്തുള്ളൂ കൂടെ ചില മരുന്നു അകത്ത് കൊടുത്തു രോഗിയുടെ രോഗം മാറി.."

ഈ കഥയിലൂടെ എനിക്ക് നിങ്ങളോട് പറയാനുള്ളത് നമ്മുടെ ശരീരത്തിലെ പ്രധാന വേഗങ്ങളാണ് മൂത്രം, മലം, അധോവായു, തുമ്മല്‍, വിശപ്പ്, ദാഹം, ഉറക്കം, ചുമ, എക്കിട്ടം, കോട്ടുവായ, കണ്ണീര്‍, ഛര്‍ദി, ശുക്ലം എന്നിവ ഈ വേഗങ്ങള്‍ (natural urges) നിങ്ങളുടെ ജൈവശരീരത്തിലെ ധര്‍മ നിര്‍വഹണ ശേഷിക്ക് അത്യന്താപേക്ഷിതമായ പ്രേരക ഘടകങ്ങളാണ് അതിനാൽ അവയെ തടുക്കാൻ പാടില്ല. ശരീരത്തിന്റെ സന്തുലിതാവസ്ഥയ്ക്ക് ഇത് ശരിയായ രീതിയിൽ പ്രവർത്തിച്ചേ മതിയാവൂ ഇതിനു വിഘാതം സംഭവിക്കുന്ന രീതിയിലുള്ള പ്രവര്‍ത്തനങ്ങള്‍ സങ്കീര്‍ണമായ രോഗാവസ്ഥകള്‍ക്ക് കാരണമാകും.

വേഗങ്ങളെ ധരിക്കരുത് (തടയരുത്) എന്നാണ് ആയുർവേദം അനുശാസിക്കുന്നത്. വേഗധാരണംമൂലം ഉണ്ടായേക്കാവുന്ന അസ്വസ്ഥതകളെയും രോഗങ്ങളെയും കുറിച്ച് ഒരു പട്ടിക ആയുര്‍വേദ ഗ്രന്ഥങ്ങളില്‍ കാണാം. ചില ഉദാഹരണങ്ങള്‍ താഴെ കൊടുക്കുന്നു. തുമ്മല്‍ തടുത്താല്‍ തലവേദന, കാഴ്ചക്കുറവ്, കേൾവിക്കുറവ്, കഴുത്തിന് പിടുത്തവും വേദനയും, മുഖപേശികള്‍ ഒരുവശത്തേക്ക് വലിവ്, അർദ്ദിതം എന്നിവയും ഉണ്ടാകും. ഛര്‍ദി വേഗം തടഞ്ഞാൽ ത്വക്രോഗങ്ങള്‍, പനി, ചുമ, ശ്വാസംമുട്ടല്‍, മുഖത്ത് നീര്, നെഞ്ചിനകത്ത് വിമ്മിട്ടം എന്നിവയാണ് ഉണ്ടാകുക. ഇതേപോലെ അതാത് വേഗങ്ങൾ തടഞ്ഞാൽ പല തരത്തിലുള്ള രോഗങ്ങളും ഉണ്ടാകും. അതിനാൽ നിങ്ങൾ നിങ്ങളുടെ വേഗങ്ങള്‍ (natural urges) അനാവശ്യമായി ധരിക്കരുത് (തടയരുത്) കാരണം അത്തരം പ്രവർത്തികൾ നിങ്ങളെ ഒരു രോഗിയാക്കി മാറ്റും.

നന്ദി

🌹🌹🌹🌹🌹🌹🌹🌹🌹🌹🌹🌹🌹

ഡോ. പൗസ് പൗലോസ് BAMS, MS(Ay)

സീതാറാം ആയുർവേദ സ്പെഷ്യാലിറ്റി ഹോസ്പിറ്റൽ. തൃശ്ശൂർ

കേരളത്തിൽ വർധിച്ചുവരുന്ന ആത്മഹത്യാ പ്രവണതയും അതിന്റെ കാരണങ്ങളും

കേരളത്തിൽ വർധിച്ചുവരുന്ന ആത്മഹത്യാ പ്രവണതയും അതിന്റെ കാരണങ്ങളും
....................................................................

നീറ്റ് പരീക്ഷയിൽ മാർക്ക് കുറഞ്ഞതിനാൽ ഒരു കുട്ടി ആത്മഹത്യ ചെയ്ത വാർത്ത ടി.വി യിൽ കണ്ടപ്പോൾ വളരെയധികം വിഷമം തോന്നി അതുകൊണ്ടാണ് ഈ പോസ്റ്റ് ഇടുന്നത്. ഞാൻ അതിനുശേഷം "ആത്മഹത്യ"എന്ന വാക്ക് ഗൂഗിളിൽ തിരഞ്ഞപ്പോൾ എനിക്ക് കിട്ടിയ സെർച്ച് റിസൾട്ടുകൾ ആണ് ഞാൻ സ്ക്രീൻഷോട്ട് ആയി ഇവിടെ കൊടുത്തിരിക്കുന്നത്. ഇത്രയും അഭ്യസ്തവിദ്യരായ യുവജനങ്ങൾ ഉള്ള ഈ നാട്ടിൽ എന്തുകൊണ്ട് ഇത്രയധികം ആത്മഹത്യ നടക്കുന്നു എന്നത് ചിന്തിക്കേണ്ട ഒരു വസ്തുതയാണ്.

ഇന്ന് വളരെ സുലഭമായി ലഭിക്കുന്ന ഇന്റർനെറ്റ് ഉൾപ്പെടെ മറ്റു പല സാമൂഹ്യ മാധ്യമങ്ങളും ആത്മഹത്യ നിരക്ക് കൂട്ടുന്നതിൽ ഒരു പ്രധാന പങ്കു വഹിക്കുന്നു എന്നതിന് ഞാൻ കൊടുത്ത സ്ക്രീൻഷോട്ട് തന്നെ ഒരു തെളിവാണ്. ആത്മഹത്യ ചെയ്യാൻ ആഗ്രഹിക്കുന്നവർക്ക്, എങ്ങനെ ആത്മഹത്യ ചെയ്യാം അതുകൂടാതെ ഏതെല്ലാം തരത്തിൽ ആത്മഹത്യ ചെയ്യാം എന്നതിനെ സംബന്ധിച്ച് വിശദമായി പ്രതിപാദിക്കുന്ന വെബ്സൈറ്റുകളും, ബ്ലോഗുകളും ഉള്ളപ്പോൾ ആത്മഹത്യകളുടെ എണ്ണം കൂടുന്നതിൽ അത്ഭുതപ്പെടാനില്ല.

സാധാരണഗതിയിൽ വിഷാദരോഗം, ബൈപോളാർ ഡിസോർഡർ , സ്കീസോഫ്രീനിയ, മദ്യപാനം, മയക്കുമരുന്നുപയോഗം തുടങ്ങിയ മാനസിക രോഗങ്ങൾ കാരണമുണ്ടാകുന്ന നിരാശയാണ് ആത്മഹത്യയിലേയ്ക്ക് നയിക്കുന്നത്. അതുകൂടാതെ സാമ്പത്തിക ബുദ്ധിമുട്ടുകൾ, മനുഷ്യർ തമ്മിലുള്ള ബന്ധങ്ങളിലെ പാകപ്പിഴകൾ, കുറ്റബോധം, രോഗം, പ്രണയനൈരാശ്യം, ബലാത്സംഗം, പരീക്ഷയിലെ പരാജയം തുടങ്ങിയവ മൂലമുണ്ടാകുന്ന സംഘർഷങ്ങൾ തുടങ്ങി പല കാരണങ്ങളും ആത്മഹത്യകൾക്കു പിന്നിലുണ്ട്.

ആധുനിക വൈദ്യശാസ്ത്രം ആത്മഹത്യയെ ഒരു മാനസിക രോഗം ആയിട്ടാണ് കാണുന്നത്. ആത്മഹത്യാ ശ്രമങ്ങൾ നടത്തി ക്കൊണ്ടിരിക്കുന്നവരെ അവരുടെ സമ്മതത്തോടെയോ അല്ലാതെയോ മാനസികരോഗ ചികിത്സയ്ക്കായി ആശുപത്രിയിൽ പ്രവേശിപ്പിക്കാവുന്നതാണ്. ആത്മഹത്യ ചെയ്യുന്നവരിൽ "സീറോടോണിൻ"
എന്ന ന്യൂറോ ട്രാൻസ്മിറ്റർ വളരെ കുറഞ്ഞ അളവിലാണ് കാണപ്പെടുന്നത്. അതുപോലെതന്നെ തലച്ചോറിൽ ബ്രെയിൻ ഡിറൈവ്ഡ് ന്യൂറോട്രോപിക് ഫാക്റ്റർ (ബി.ഡി.എൻ.എഫ്.) എന്ന വസ്തുവിന്റെ അളവ് കുറവായിരിക്കുന്ന അവസ്ഥയ്ക്ക് ആത്മഹത്യയുമായി ബന്ധമുണ്ടെന്ന് കണ്ടിട്ടുണ്ട്.

ആത്മഹത്യ ചെയ്യുന്നവരിൽ പകുതിപ്പേർക്കും വിഷാദരോഗം കാണാറുണ്ട്.വിഷാദരോഗമോ ബൈപോളാർ അസുഖം പോലെ മാനസികനിലയെ ബാധിക്കുന്ന അസുഖങ്ങളോ ഉള്ളവർ ആത്മഹത്യ ചെയ്യാനുള്ള സാദ്ധ്യത 20 മടങ്ങാണ്. സ്കീസോഫ്രീനിയ (14%), വ്യക്തിത്വസംബന്ധമായ അസുഖങ്ങൾ(14%), ബൈപോളാർ അസുഖം, പോസ്റ്റ് ട്രൊമാറ്റിക് സ്ട്രെസ് ഡിസോർഡർ എന്നീ അസുഖങ്ങളുള്ളവരും ആത്മഹത്യ ചെയ്യാനുള്ള സാദ്ധ്യത കൂടുതലാണ്. സ്കീസോഫ്രീനിയ ബാധിച്ചവരിൽ 5% ആത്മഹത്യയിലൂടെയാണ് മരിക്കുന്നത്.

ഇനി നിങ്ങൾ അറിഞ്ഞിരിക്കേണ്ട ചില ആത്മഹത്യ കണക്കുകൾ നിങ്ങളുടെ അറിവിലേക്കായി ആയി പങ്കുവയ്ക്കുന്നു. നമ്മുടെ ഭാരതത്തിൽ ആത്മഹത്യാ നിരക്കില്‍ കേരളം എട്ടാം സ്ഥാനത്ത്. കേരളത്തില്‍ നടക്കുന്ന ആത്മഹത്യകള്‍ കൂടുതലും കുടുംബ പ്രശ്നങ്ങളെ തുടര്‍ന്നാണെന്ന് പല പഠനങ്ങളും വ്യക്തമാക്കുന്നു. വിവാഹ ജീവിതത്തിലെ പിരിമുറുക്കങ്ങളും വിട്ടുവീഴ്ചാ മനോഭാവമില്ലാത്തതുമാണ് മിക്കപ്പോഴും ആത്മഹത്യകളിലേയ്ക്ക് നയിക്കുന്നത്. അത്തരം പിരിമുറുക്കമുള്ള സാഹചര്യങ്ങളിൽ വളരുന്ന കുട്ടികളും പിന്നീട് അവരുടെ ജീവിതത്തിൽ പ്രശ്നങ്ങളും, പ്രതിസന്ധികളും ഉണ്ടാവുമ്പോൾ ആത്മഹത്യ ഒരു പോംവഴി തെരഞ്ഞെടുക്കുന്നു.

കേരളത്തില്‍ പ്രതിദിനം 24 പേര്‍ ആത്മഹത്യ ചെയ്യുന്നു. 15-45 വയസ്സിനിടയ്ക്കുള്ളവരാണ് കൂടുതലും ആത്മഹത്യ ചെയ്യുന്നത്. ആത്മഹത്യ ചെയ്തവരില്‍ 78 ശതമാനവും വിവാഹിതരാണ്. ഓരോ വർഷവും എട്ട് ലക്ഷത്തോളം ആളുകൾ ലോകത്താകമാനം ആത്മഹത്യ ചെയ്യുന്നുണ്ടെന്നാണ് ലോകാരോഗ്യ സംഘടനയുടെ കണക്ക്. അതായാത് ഓരോ നാൽപത് സെക്കന്റിലും ഒരു ആത്മഹത്യ സംഭവിക്കുന്നു.
നിങ്ങൾക്കിടയിലും കാണും ചിലപ്പോൾ ആത്മഹത്യ ചിന്താഗതികളുമായി നടക്കുന്നവർ. അവരെ ആ ഉദ്യമത്തിൽ നിന്നും പിന്തിരിപ്പിക്കാൻ നിങ്ങൾക്ക് കഴിഞ്ഞാൽ നഷ്ടപ്പെടാൻ സാധ്യതയുള്ള ഒരു വിലപ്പെട്ട ജീവനെ നിങ്ങൾക്ക് സംരക്ഷിക്കാനാകും.

നന്ദി


ഡോ.പൗസ് പൗലോസ്

ഒരു അപ്പാപ്പന്റെ "രഹസ്യ കൂട്ടിന്റെ"🍵 കഥ

ഒരു അപ്പാപ്പന്റെ "രഹസ്യ കൂട്ടിന്റെ"🍵 കഥ

---------------------------------------------------------------

കുറച്ചുനാളുകൾക്കു മുമ്പ് ഞാൻ പരിചയപ്പെട്ട നല്ല ചുറുചുറുക്കുള്ള അപ്പാപ്പന്റെ കഥയാണ് ഇത്. ഈ കഥയിലെ നായകൻ എന്ന് പറയുന്നത് നമ്മുടെ അപ്പാപ്പൻ ഉണ്ടാക്കിയ ഒരു "രഹസ്യ കൂട്ട്"ആണ്. പ്രായം കുറയ്ക്കുന്ന ആ "രഹസ്യ കൂട്ട്"🍵 അദ്ദേഹം എനിക്ക് പറഞ്ഞ് തന്നു ആ ആരോഗ്യ രഹസ്യമാണ് 🤫 ഈ കഥയിലൂടെ നിങ്ങളുമായി പങ്കു വെക്കുന്നത്.......

നമ്മുടെ കഥാപാത്രമായ അപ്പാപ്പനെ കുറിച്ച് പറയുകയാണെങ്കിൽ അദ്ദേഹം 82 വയസ്സായ ഇതേവരെ വാർദ്ധക്യം ബാധിക്കാത്ത നല്ല ചുറുചുറുക്കുള്ള ഒരു വല്യപ്പൻ ആണ്. വയസ്സായിട്ടും അദ്ദേഹത്തിന്റെ ചർമം യുവാക്കളുടെ ചർമം മാതിരി ഒരു ചുളിവ് പോലും ബാധിക്കാതെ ഇരിക്കുന്നത് കണ്ട് അതിന്റെ രഹസ്യം അറിയാൻ ഒരു എനിക്ക് ആകാംക്ഷ തോണി. ഈ വയസ്സാൻ കാലത്തും ഇത്രയും ഉന്മേഷവാനായി ഇരിക്കുന്നതിനെ രഹസ്യം ഒന്ന് ചോർത്തി എടുക്കണം എന്ന് തോന്നി അതുകൊണ്ട് ഞാൻ അദ്ദേഹത്തോട് അതിനെക്കുറിച്ച് വളരെ ഓപ്പൺ ആയിട്ട് തന്നെ ചോദിക്കാൻ തീരുമാനിച്ചു.

''അങ്കിളേ എങ്ങനെയാണ് ഈ വയസ്സാൻ കാലത്ത് ഇങ്ങനെ എപ്പോഴും ഉന്മേഷവാനായി ഇരിക്കുന്നത്...... ഞാൻ മുഖസ്തുതി പറയുകയാണെന്ന് വിചാരിക്കരുത് ഒരു ചുളിവ് പോലുമില്ലാത്ത ചർമത്തോട് കൂടി ഇരിക്കാൻ എങ്ങനെ താങ്കൾക്ക് സാധിക്കുന്നു...... ഇത്രയും കാലത്തിനിടയ്ക്ക് ഇങ്ങനെ വയസ്സാകുന്തോറും ചെറുപ്പക്കാരനായ വരുന്ന മമ്മൂട്ടിയെപ്പോലെ പോലുള്ള ഒരു അപ്പാപ്പൻ മുമ്പിൽ വന്നിരിക്കുന്നത് എന്റെ ജീവിതത്തിൽ ആദ്യത്തെ ഒരു അനുഭവമാണ്.... അതുകൊണ്ട് ഈ ചുറുചുറുക്കിന്റെ രഹസ്യം അങ്കിൾ എന്നോടും കൂടി പറയണം...''

ഇത് കേട്ടതും അദ്ദേഹം അങ്ങ് പൊട്ടിച്ചിരിച്ചു ഞാനും കൂടെ അങ്ങ് ചിരിച്ചു.എന്തായാലും എന്റെ ചോദ്യത്തിന് വളരെ ആവേശത്തോടു കൂടി തന്നെ നമ്മുടെ അപ്പാപ്പൻ ഉത്തരം പറഞ്ഞു ''അതേ ഡോക്ടറേ ഇതിന് പിന്നിൽ ഒരു രഹസ്യമുണ്ട് ഉണ്ട്...... അത് ഞാൻ ഡോക്ടറോട് പറയാം...ഡോക്ടർക്ക് ഒരു കാര്യം അറിയോ എനിക്ക് 82 വയസ്സായി എന്ന കാര്യം ഞാൻ ആരോടും പറയാറില്ല...... കാരണം ആരെങ്കിലും 'കണ്ണുവച്ച്' പോയാലോ എന്ന പേടി ഉണ്ട് അതുകൊണ്ട് ഒരു 70 വയസ്സ് എന്നേ പറയൂ ഡോക്ടർ നോക്കിയേ എന്റെ ചർമത്തിൽ ഒരു ചുളിവ് പോലുമില്ല..... എന്റെ എൺപത്തിരണ്ടാം വയസ്സിലും ഞാൻ ഇങ്ങനെ ഇരിക്കുന്നത് എന്ന് പറഞ്ഞാൽ നമ്മുടെ പ്രായത്തിലുള്ളവർ അസൂയപ്പെടും അതുകൊണ്ടാ അത് പറയാതെ...പിന്നെ എന്റെ സമപ്രായക്കാർ പലരും മരിച്ചുപോയി പക്ഷേ ദൈവം നല്ല ആരോഗ്യം തന്ന് എന്നെ അനുഗ്രഹിച്ചു"

സംഗതി നമ്മുടെ അപ്പൂപ്പൻ പറഞ്ഞത് ശരിയാ ആള് ഒരു "മമ്മൂട്ടി" തന്നെയാണ് വയസ്സാകുന്തോറും പ്രായം കുറഞ്ഞുവരുന്ന ഒരു പ്രകൃതം. ചർമം എല്ലാം നല്ല ചെറുപ്പക്കാരെ പോലെ ഇരിക്കുന്നു.
അപ്പോ ഞാൻ പറഞ്ഞു "സംഗതിയൊക്കെ അംഗീകരിച്ചു അപ്പാപ്പന്റെ ആരോഗ്യ രഹസ്യം ഒരു സംഭവം തന്നെ പക്ഷേ ആ രഹസ്യം എനിക്കും അറിയണം"

എന്റെ ചോദ്യത്തിന് യാതൊരു മടിയും കൂടാതെ നമ്മുടെ അപാപ്പൻ ഉത്തരം തന്നു "ഡോക്ടറെ അതിരാവിലെ അഞ്ചു മണിക്ക് ഞാൻ എണീക്കും അതിനുശേഷം കുറച്ചു നേരം ശുദ്ധവായു ഒക്കെ ശ്വസിച്ച് നടക്കും...... പിന്നീട് ആട്ടിൻ പാലിന്റെ 🐐 ഒരു ചായ..... പ്രാഥമിക കർമ്മങ്ങൾ എല്ലാം നിർവഹിച്ച തിന് ശേഷം രണ്ടുമണിക്കൂർ പറമ്പിൽ പണിയെടുക്കും ഇതാണ് എന്റെ പ്രധാന വ്യായാമം.... പിന്നെ ഡോക്ടറോട് ഞാനൊരു രഹസ്യം പറയട്ടെ ഈ വയസ്സാൻ കാലത്തും ഞാൻ ഭാര്യയുമായി ശാരീരിക ബന്ധത്തിൽ ഏർപ്പെടാറുണ്ട് എന്നിട്ട് എന്നെ നോക്കി ഉറക്കെ ഒന്ന് പൊട്ടിച്ചിരിച്ചു ഹഹഹ ഹാ ......... എനിക്ക് 82 വയസ്സും എന്റെ ഭാര്യയെ 75 വയസാണ് ഡോക്ടർക്ക് വിശ്വസിക്കാൻ കഴിയുന്നുണ്ടോ....." ഇതുകേട്ടപ്പോൾ സത്യം പറഞ്ഞാൽ എന്റെ കിളി ✨🌟പോയി ഞാൻ തുറന്നു തന്നെ ചോദിച്ചു ''അതെ അങ്കിളെ ഇതൊക്കെ ഈ പ്രായത്തിലും എങ്ങനെ സാധിക്കുന്നു എന്തായാലും അങ്കിൾ ഒരു സംഭവം തന്നെ"

അതിനുശേഷം നമ്മുടെ അപ്പാപ്പൻ അദ്ദേഹത്തിന്റെ ഈ ചുറുചുറുക്കിന്റെ രഹസ്യ കൂട്ട് എന്നോട് പറഞ്ഞു

"അതേ ഞാൻ ഒരു പ്രത്യേക മരുന്നിന്റെ കൂട്ട് ദിവസവും കഴിക്കും അത് ഞാൻ പറഞ്ഞു തരാം അത് എന്താണെന്ന് വെച്ചാൽ
മുരിങ്ങാ കുരു 1 kg(നല്ലത് നമ്മുടെ ജയ്ഹിന്ദ് മാർക്കറ്റിൽ കിട്ടും),അശ്വഗന്ധം 1kg,
നിലപ്പന കിഴങ്ങ് 1kg, നായ്ക്കുരണ പരിപ്പ് ശുദ്ധി ചെയ്തത് 1 kg...... ഡോക്ടറെ ഇതെല്ലാം കഴുകി ഉണക്കി പൊടിച്ച് ഞാൻ വച്ചിട്ടുണ്ട്.... ഇത് ഒരു 4 kg പൊടിപ്പിച്ച് വെച്ചാൽ ഒരു വർഷത്തേക്ക് ഉണ്ടാകും.... അത് ദിവസവും ഓരോ ടീസ്പൂൺ പാലിൽ കലക്കി ഞാൻ കഴിക്കും.... അര ടീ സ്പൂൺ പാലിൽ കലക്കി എന്റെ 75 വയസ്സുകാരിയായ ഭാര്യയ്ക്കും കൊടുക്കും.... പിന്നെ സംഗതിയൊക്കെ ഉഷാറാണ് അവൾക്കും ഇതിനെല്ലാം താല്പര്യം ഉള്ളതുകൊണ്ട് ഞങ്ങൾക്ക് ഈ വയസ്സാം കാലത്തും ഇതൊക്കെ യാതൊരു മുടക്കവുമില്ലാതെ ചെയ്യാൻ കഴിയുന്നു അതും ഒരു ക്ഷീണമോ തളർച്ചയോ ഇല്ലാതെ ഡോക്ടറും ഇത് ഉപയോഗിക്കണം..... അതിനു ഞാൻ മെല്ലെ ഒന്ന് തലയാട്ടി...... പിന്നെ ഡോക്ടറെ ഒരു രഹസ്യം കൂടിയുണ്ട് ''കുതിരവാലി'' എന്നു പറഞ്ഞ ഒരു അരിയുണ്ട് സൂപ്പർമാർക്കറ്റിൽ ഒക്കെ കിട്ടും ...... എന്നാലും ചിലപ്പോൾ കിട്ടാൻ പ്രയാസമാണ് ഞാനത് കോയമ്പത്തൂർ പോയി വാങ്ങിക്കും കുറച്ചു വില കൂടുതലാണ് ..... പിന്നെ എന്നും വൈകീട്ട് അതിന്റെ കഞ്ഞിയാണ് ഞങ്ങൾ കുടിക്കുന്നത്... ഞാൻ വെറുതെ പറയല്ലേ അത് കഴിച്ചാൽ കുതിരയുടെ ശക്തിയാണ് ...... ഇതൊക്കെയാണ് ഈ പാവം വയസ്സന്റെ ആരോഗ്യ രഹസ്യം ഇത് ഡോക്ടർ ആരെങ്കിലും വന്നാൽ പറഞ്ഞുകൊടുക്കണം അവർക്കും ഇത് ഉപകാരപ്പെടട്ടെ" ............

ഇതൊക്കെ കേട്ട് അന്തംവിട്ടിരിക്കുന്ന എന്നെ നോക്കി വയസ്സായ നമ്മുടെ അപ്പാപ്പൻ ഒന്നു പുഞ്ചിരിച്ചു ഞാൻ പറഞ്ഞു "നിങ്ങളെ ഞാൻ സമ്മതിച്ചിരിക്കുന്നു ഈ വയസ്സാൻ കാലത്തും ഇതൊക്കെ സാധിക്കണമെങ്കിൽ ആന്തരിക ആന്തരികാവയവങ്ങൾ ഒക്കെ നല്ല സ്ട്രോങ്ങ് ആയിരിക്കണം.... പ്രത്യേകിച്ച് "ഹൃദയം" ശാരീരിക ബന്ധത്തിൽ ഏർപ്പെടുമ്പോൾ ഹൃദയാഘാതം വന്ന് മരിച്ച ആൾക്കാരുണ്ട് എന്തായാലും അപ്പാപ്പൻ സൂപ്പർ ആണ്...." ഞാനിത് പറഞ്ഞപ്പോൾ അദ്ദേഹം വളരെ വിശാല മനസ്സോടുകൂടി എനിക്ക് ഒരു ഉപദേശം തന്നു "ഡോക്ടർ എന്റെ ഈ ആരോഗ്യ രഹസ്യം മറ്റുള്ളവർക്കും പറഞ്ഞുകൊടുക്കും ആർക്കെങ്കിലും ഇത് ഉപകാരപ്പെടട്ടെ എന്റെ പല സുഹൃത്തുക്കൾക്കും ഞാനിത് പറഞ്ഞുകൊടുത്തു അവരെല്ലാം ഇന്ന് സന്തോഷവാന്മാരായി ജീവിക്കുന്നു". ഇതു പറഞ്ഞശേഷം അദ്ദേഹം എന്നെ നോക്കി ഒന്ന് ഉറക്കെ പൊട്ടിച്ചിരിച്ചു...ഒരുപക്ഷേ ഉള്ളി തുറന്നുള്ള ഈ ചിരിയും അദ്ദേഹത്തിൻറെ ആരോഗ്യവും, ആയുസ്സും വർധിപ്പിക്കുന്നതിന് ഒരു പ്രധാന പങ്കുണ്ടെന്ന് എനിക്ക് തോന്നി.

ഇങ്ങനെ ഏകദേശം ഒരു മണിക്കൂർ ഞങ്ങൾ സംസാരിച്ചിരുന്നു ഇതിനിടയിൽ ഇതേപോലെ ഒരുപാട് ഔഷധക്കൂട്ടുകൾ അദ്ദേഹം എനിക്ക് വാതോരാതെ പറഞ്ഞു തന്നു. ശേഷം ഞങ്ങൾ ബൈ ബൈ പറഞ്ഞ് പിരിഞ്ഞു...... എന്തായാലും അദ്ദേഹത്തോടു കൂടി ചെലവഴിച്ചത് വളരെ മനോഹരമായ നിമിഷങ്ങൾ ആയിരുന്നു.... എനിക്ക് നിങ്ങളോട് പറയാനുള്ളത് ഈ ചെറിയ ജീവിതം ആസ്വദിക്കണമെങ്കിൽ നല്ല ആരോഗ്യം എന്നത് വളരെ അനിവാര്യമായ ഘടകമാണ്..... ആരോഗ്യമുള്ള ഒരു ശരീരവും, മനസ്സും,ആത്മാവും നമുക്കുണ്ടാവണം അതാണ് നമ്മുടെ ഏറ്റവും വലിയ സമ്പത്ത് ...... അത് സ്വന്തം ജീവിതം കൊണ്ട് കാട്ടി തന്ന ഒരു വ്യക്തിയാണ് ഈ അപ്പാപ്പൻ .......

എന്തായാലും ഞാൻ ഈ ആരോഗ്യ രഹസ്യങ്ങൾ നിങ്ങളുമായി പങ്കുവയ്ക്കുന്നു ചിലപ്പോൾ നമ്മുടെ അപ്പാപ്പന്റെ 👴 "രഹസ്യ കൂട്ട്" 🍵നിങ്ങൾക്കും ഉപകാരപ്പെടും....


നന്ദി

🌹🌹🌹🌹🌹🌹🌹🌹🌹🌹

ഡോ. പൗസ് പൗലോസ് MS(Ay)

ഒരു അലൂമിനിയം പാത്രത്തിന്റെ കഥ

ഒരു അലൂമിനിയം പാത്രത്തിന്റെ കഥ
-------------------------------------------------------

ഇന്ന് ഞാൻ നിങ്ങളോട് പറയാൻ പോകുന്നത് ഒരു കുടുംബത്തിൽ വില്ലനായി തീർന്ന ഒരു പാവം "അലൂമിനിയം പാത്രം" പിന്നീട് ആ വീട്ടിലെ ഹീറോ ആയ കഥയാണ്. ഇത് ഒരു രോഗി എന്നോട് പറഞ്ഞ വളരെ രസകരമായ ഒരു ജീവിത കഥയാണ്. ഒരുപക്ഷേ ആ രോഗിയുടെ സ്വന്തം അനുഭവക്കുറിപ്പ് ആയതിനാൽ ഈ കഥയിൽ അല്പം പോലും മായം ഇല്ല. ഞാനിവിടെ രോഗിയുടെ പേര് ഒന്നും പറയുന്നില്ല ഒരു മധ്യവയസ്ക, ആള് നല്ലൊരു പാചകക്കാരി ആണ് വളരെ നന്നായിട്ട് ഭക്ഷണമൊക്കെ പാകം ചെയ്യുന്ന ഒരു ചേട്ടത്തി. ഭക്ഷണത്തിൽ ഒക്കെ നന്നായിട്ട് എരിവും, പുളിയും, ഉപ്പും ഒക്കെ ചേർത്ത് വെക്കുന്ന തൃശ്ശൂരിൽ സ്ഥിരതാമസമാക്കിയ നല്ല കോട്ടയംകാരി അച്ചായത്തി. 🙅

നന്നായി പാചകം ചെയ്യുന്ന നമ്മുടെ ചേട്ടത്തി വീട്ടിലുള്ളവരെ എല്ലാം സ്വന്തം പാചക മികവുകൊണ്ട് കയ്യിലെടുക്കുന്ന ഒരു വ്യക്തി ആണ്. നല്ലൊരു കുടുംബിനിയായ ചേട്ടത്തി വീട്ടിലുള്ളവർക്ക് കാലത്തൊരു ഭക്ഷണം, ഉച്ചയ്ക്ക് വേറെ ഭക്ഷണം വൈകിട്ട് വേറെ ഭക്ഷണം ഇങ്ങനെ സുഭിക്ഷമായ ഒരു ഭക്ഷണക്രമമാണ് ഭവതിയുടെ വീട്ടിൽ. പക്ഷേ ഒരു കുഴപ്പം എന്താണെന്ന് വെച്ചാൽ ഈ വീട്ടിലുള്ളവർക്ക് എപ്പോഴും ഓരോ അസുഖങ്ങളാണ്. 🗣️

നമ്മുടെ കഥാപാത്രമായ ചേട്ടത്തിക്ക് മാത്രമല്ല ആ വീട്ടിലുള്ള എല്ലാവർക്കും പല തരത്തിൽ ഉള്ള അസുഖങ്ങൾ ആണ് പ്രധാനമായും കഫ സംബന്ധമായ രോഗങ്ങളാണ് ഉള്ളത്. അത് എന്തൊക്കെയാണെന്ന് വെച്ചാൽ ത്വഗ്രോഗങ്ങൾ, കഫക്കെട്ട്, അലർജി, ശരീരത്തിൽ നീർക്കെട്ട്, ബ്ലഡ് പ്രഷർ, ഹൃദയസംബന്ധമായ അസുഖങ്ങൾ, പ്രമേഹം എന്നിങ്ങനെ പറയാൻ ഒരുപാടുണ്ട് .പക്ഷേ നമ്മുടെ ചേട്ടത്തിക്കും വീട്ടിലുള്ളവരും ഒരു പ്രത്യേക വാശിയിലാണ് മരുന്ന് എത്ര വേണേലും കഴിക്കാം എന്നാലും ഭക്ഷണരീതി യാതൊരു കാരണവശാലും മാറ്റില്ല. 🤷

എന്താല്ലേ ഓരോരോ വാശികളെ എനിക്ക് തോന്നി ഇവർ തിന്നാൻ വേണ്ടിയാണ് പ്രധാനമായും ജീവിക്കുന്നത് എന്ന്, അതെന്തെങ്കിലുമാവട്ടെ അതൊക്കെ ഓരോരുത്തരുടെ വ്യക്തിപരമായ കാര്യങ്ങൾ ഇനിയാണ് ഞാൻ കഥയിലേക്ക് കടക്കുന്നത്. നമ്മുടെ കഥയിലെ പ്രധാന കഥാപാത്രം ഒരു ''അലൂമിനിയം പാത്രമാണ്" 🥗 നല്ല അടിപൊളി കഥാപാത്രം അല്ല നിങ്ങൾ ചിലപ്പോൾ അതായിരിക്കും ഇപ്പോ ചിന്തിക്കാ. ഈ ചേട്ടത്തിക്ക് ഒരു പ്രത്യേകതയുണ്ട് ചോറ് ഉണ്ടാക്കുമ്പോൾ അരിയിൽ ഉപ്പിട്ടു വേവിക്കും അരി വേവിക്കാൻ ഉപയോഗിക്കുന്നത് ഒരു അലൂമിനിയം പാത്രത്തിലും ആണ്.

ഇവിടെ എന്താണ് പ്രശ്നം എന്നുവെച്ചാൽ ഇടയ്ക്കിടയ്ക്ക് ഭവതിയുടെ അലൂമിനിയം പാത്രത്തിൽ ഓട്ട വീഴും. അതുകൊണ്ട് നമ്മുടെ ചേട്ടത്തിക്ക് ഇടയ്ക്കിടയ്ക്ക് പുതിയ അലൂമിനിയം പാത്രം മേടിക്കേണ്ടി വരും. ഇതൊക്കെ വീട്ടിൽ വലിയ സാമ്പത്തിക ഭാരം ഉണ്ടാക്കി, കാര്യം നല്ല പാചകക്കാരി ആണെങ്കിലും ഇതിന്റെ പേരിൽ വീട്ടിൽ ഇടയ്ക്കിടയ്ക്ക് ഭർത്താവും ആയി കശപിശ ഉണ്ടാകും. ഇതെന്താണ് ഈ അലൂമിനിയം പാത്രത്തിൽ ചോറു വയ്ക്കുമ്പോൾ പാത്രം ഓട്ട ആകുന്നത് എന്ന് നമ്മുടെ ചേട്ടത്തി ഗവേഷണം നടത്തിയപ്പോഴാണ് മനസ്സിലായത് ചോറിൽ ഉപ്പിട്ട് വേവിക്കുന്നത് കൊണ്ട് സംഭവിക്കുന്ന ഒരു പ്രതിഭാസമാണ് ഇതെന്ന ദുഃഖകരമായ യാഥാർഥ്യം.

പിന്നീട് നമ്മുടെ ചേട്ടത്തി ഒരു "ഭീഷ്മ ശപഥം" അങ്ങ് ചെയ്തു ''ഇനി ഞാൻ ചോറിൽ ഉപ്പിട്ടു വെക്കില്ല അലൂമിനിയം പാത്രത്തിൽ ഓട്ടയായതിന്റെ പേരിൽ എന്നെ വഴക്കു കേൾപ്പിച്ച 'ഉപ്പ്' ഇനിമുതൽ എന്റെ ബദ്ധ ശത്രുവാണ് ഇത് സത്യം, സത്യം, സത്യം". പിന്നീട് ഉപ്പിനെ ശത്രുവായി കണ്ട ഭവതി ഒരു വാശി എന്നോണം ചോറിലും, കറിയിലും ഉപ്പിന്റെ ഉപയോഗം മനപ്പൂർവ്വം അങ്ങ് കുറച്ചു.

സംഗതി നമ്മുടെ ചേട്ടത്തി ഉപ്പിനെ വെറുത്തു എന്നുള്ള കാര്യം വീട്ടിൽ എല്ലാവർക്കും മനസ്സിലായി ഉപ്പിന്റെ അഭാവത്തിൽ ചോറിന്റെ രുചി കുറഞ്ഞു, ഒരു കറിക്കും രുചി ഇല്ല, എന്താ ചെയ്യാ വീട്ടിലുള്ളവരെല്ലാം ഇതൊക്കെ സഹിച്ച് ഉള്ളതുകൊണ്ട് അങ്ങ് തൃപ്തിപ്പെട്ടു.
ഇപ്പോഴാണ് എനിക്ക് ഒരു പ്രശസ്ത ഡയലോഗ് ഓർമ്മ വരുന്നത് "നീയില്ലാത്ത ജീവിതം എനിക്ക് ഉറപ്പില്ലാത്ത കഞ്ഞി പോലെയാണ്" അത് ഒരു പക്ഷെ ശരിയായിരിക്കും.

എന്തായാലും അത്തരത്തിലുള്ള ഭക്ഷണക്രമം ശീലിച്ചപ്പോൾ ആ വീട്ടിൽ നമ്മുടെ ചേട്ടത്തിക്ക് "നല്ല പാചകക്കാരി" എന്നുള്ള ആസ്ഥാന പട്ടം നഷ്ടപ്പെട്ടെങ്കിലും കുടുംബത്തിൽ എല്ലാവരുടെയും ആരോഗ്യത്തിന് കാര്യമായ മാറ്റം ഉണ്ടായി 👨‍👨‍👧‍👧. നമ്മുടെ ചേട്ടത്തിയുടെ ഇടയ്ക്കിടയ്ക്ക് വരുന്ന കഫക്കെട്ട് മാറി പിന്നെ കൂടിയ ബ്ലഡ് പ്രഷറും അങ്ങ് കുറഞ്ഞു, കുട്ടിക്ക് ഇടയ്ക്കിടയ്ക്ക് ഉണ്ടാകുന്ന ത്വക്ക് രോഗങ്ങളും അലർജിയും കുറഞ്ഞു, ഭർത്താവിന്റെ ഹൃദയസംബന്ധമായ കിതപ്പിന് നല്ല കുറവുണ്ട്, പിന്നെ വീട്ടിലുള്ള അമ്മാമ്മയുടെ കുറെ നാളായി നിയന്ത്രണ വിധേയമല്ലാത്ത ഡയബറ്റിസ് കൺട്രോളായി.

ഇതെല്ലാം വളരെ ആവേശത്തോടെയാണ് നമ്മുടെ ചേട്ടത്തി എന്നോട് പറഞ്ഞത് കാര്യം ഒരു വാശി പുറത്താണ് ഉപ്പിന്റെ ഉപയോഗം കുറച്ചെങ്കിലും ആ വാശി കാരണം വീട്ടിലേക്ക് ആരോഗ്യത്തിന്റെ രൂപത്തിൽ "മഹാലക്ഷ്മി" കടന്നുവന്നു. എല്ലാത്തിനും കാരണക്കാരൻ നമ്മുടെ ഹീറോ "അലൂമിനിയം പാത്രമാണ്"പണ്ട് ദേഷ്യത്തോട് കൂടി വീടിന്റെ ഒരു മൂലയിലേക്ക് വലിച്ചെറിഞ്ഞ അലൂമിനിയം പാത്രത്തെ ഇപ്പോൾ വളരെ സ്നേഹത്തോടു കൂടി നമ്മുടെ ചേട്ടത്തി നോക്കാറുണ്ട് എന്നറിഞ്ഞപ്പോൾ എനിക്കും ആ പാവം അലൂമിനിയം പാത്രത്തിനോട് ഒരു ബഹുമാനം ഒക്കെ തോന്നി.

ചിലപ്പോൾ നമ്മുടെ ചേട്ടത്തി വീടിന്റെ പടിവാതിൽക്കൽ എഴുതി ഒട്ടിച്ചിട്ടുണ്ടാകും "ഈ വീടിന്റെ ഐശ്വര്യം ഓട്ടയായ അലൂമിനിയം പാത്രം". അതിനാൽ പ്രിയപ്പെട്ടവരെ എനിക്ക് നിങ്ങളോട് പറയാനുള്ളത് ഉപ്പിന്റെ ഉപയോഗം കുറയ്ക്കുന്നതിൽ നമുക്കും ഈ ചേട്ടത്തിയെ മാതൃകയാക്കാം. അനാരോഗ്യകരമായ അമിതമായ ഉപ്പിന്റെ ഉപയോഗം കുറയ്ക്കൂ അത് നിങ്ങളുടെ ആരോഗ്യത്തെ നശിപ്പിക്കും.

നന്ദി

🌹🌹🌹🌹🌹🌹🌹🌹🌹🌹

ഡോ. പൗസ് പൗലോസ് MS(Ay)

ജീവിതശൈലിയിൽ മാറ്റം വരുത്തി "കരൾ രോഗങ്ങൾ" പ്രതിരോധിക്കാം

ജീവിതശൈലിയിൽ മാറ്റം വരുത്തി "കരൾ രോഗങ്ങൾ" പ്രതിരോധിക്കാം
____________________________________________

ലോക ആരോഗ്യ സംഘടനയുടെ കണക്കുകള്‍ പ്രകാരം ലോകത്ത് മരണ കാരണമായ രോഗങ്ങളില്‍ പത്താം സ്ഥാനത്താണ് കരള്‍ രോഗങ്ങൾ. ശരീരത്തിന്റെ പ്രവര്‍ത്തനങ്ങളിൽ പ്രധാന പങ്കുവഹിക്കുന്ന കരള്‍ മനുഷ്യ ശരീരത്തിലെ ഏറ്റവും വലിയ അവയവമാണ്. "എന്റെ കരളേ" എന്ന പ്രയോഗം മലയാളികൾ ആയ നമുക്കെല്ലാം വളരെയധികം സുപരിചിതമാണ്.ജീവന് ആവശ്യം വേണ്ട അഞ്ഞൂറിലധികം അതിസങ്കീര്‍ണ ശാരീരിക പ്രവര്‍ത്തനങ്ങള്‍ കരള്‍ നടത്തുന്നുണ്ട്.

പരമ്പരാഗതമായ രീതിയില്‍ നിന്നും വ്യത്യസ്തമായ തെറ്റായ ഭക്ഷണ ശീലങ്ങള്‍, അശ്രദ്ധമായ ജീവിത ശൈലി, ജനിതക കാരണങ്ങള്‍ എന്നിവ മൂലവും കരള്‍ രോഗങ്ങള്‍ ഇന്ന് വര്‍ധിക്കാന്‍ ഇടയാക്കുന്നു.
നിറയെ നേർത്ത സുഷിരങ്ങളുള്ള കോശങ്ങളാലാണ് കരൾ നിർമിച്ചിരിക്കുന്നത്. നേർത്ത രക്തലോമികകളാൽ സമ്പന്നമാണ് കരളിന്റെ ഉപരിതലം. പ്രാണവായുവും പോഷകങ്ങളും നിറഞ്ഞ രക്തത്തെ രക്തലോമികകളിൽ പിടിച്ചുനിർത്തി അഞ്ഞൂറിലധികം വ്യത്യസ്ത ധർമങ്ങൾ കരൾ നിർവഹിക്കുന്നു.

ശരീരത്തിന്റെ വലതുവശത്തു ശ്വാസകോശത്തിനു തൊട്ടുതാഴെ ആമാശയത്തിനു മുകളിലായാണു കരൾ. മനുഷ്യശരീരത്തിലെ ഏറ്റവും വലിയ ഗ്രന്ഥിയും കരളാണ്, ഇതിന് ഏകദേശം ഒന്നര കിലോയോളം തൂക്കം വരും . നല്ല അവയവം എന്നു കരളിനെ വിളിക്കാം. കാരണം, സ്വയം വളർന്നു വലുതാകാനുള്ള കഴിവ് ഇതിലുണ്ട്, 70 ശതമാനത്തോളം മുറിച്ചു മാറ്റിയാലും ബാക്കി ഭാഗം വളർന്നു പൂർണരൂപത്തിലെത്തും.

അതുകൊണ്ടാണല്ലോ കരളിന്റെ ഒരു ഭാഗം ദാനം ചെയ്യാൻ കഴിയുന്നത്.രക്തത്തിലെ പ്രധാനഘടകങ്ങളായ പ്ലാസ്മ പ്രോട്ടീനുകൾ, പ്രോത്രോംബിൻ തുടങ്ങിയവ ഉൽപാദിപ്പിക്കുക, രക്തത്തിൽ നിന്നു വിഷാംശങ്ങളെ വേർതിരിക്കുക, ഭക്ഷണത്തിൽ നിന്നുള്ള ഊർജത്തെ ഗ്ലൂക്കോസാക്കി മാറ്റുകയും ആ ഗ്ലൂക്കോസിനെ ഗ്ലൈക്കൊജനാക്കി മാറ്റി സംഭരിക്കുകയും ചെയ്യുക, ശരീരത്തിന്റെ ആവശ്യത്തിനനുസരിച്ചു ഗ്ലൈക്കൊജനെ ഗ്ലൂക്കോസ് ആക്കി വീണ്ടും ശരീരത്തിലേക്കു തിരിച്ചു നൽകുക, ഒട്ടേറെ എൻസൈമുകളെ ഉൽപാദിപ്പിക്കുക, വിറ്റാമിനുകളും ധാതുലവണങ്ങളും സംഭരിക്കുക തുടങ്ങി കരളിനു നൂറുകൂട്ടം ജോലികളുണ്ട്.

കരള്‍ രോഗത്തിന്‍റെ പ്രധാന ലക്ഷണങ്ങള്‍
___________________________________________

കരളിനുണ്ടാകുന്ന ചില്ലറ പ്രശ്‌നങ്ങള്‍ അത് സ്വയം പരിഹരിക്കുകയാണ് പതിവ്. അതിനാല്‍ മിക്ക കരള്‍രോഗങ്ങളും തുടക്കത്തില്‍ കാര്യമായ ലക്ഷണങ്ങള്‍ കാട്ടാറില്ല. കരൾ രോഗത്തിന്റെ പ്രധാന ലക്ഷണങ്ങൾ ഇവയെല്ലാമാണ് അമിത ക്ഷീണം, അരുചി, ഛര്‍ദി, ശ്വാസത്തിന് ദുര്‍ഗന്ധം, ശരീരം മെലിച്ചില്‍, ചൊറിച്ചില്‍, വയറിനകത്തെ പലതരം അസ്വസ്ഥതകള്‍, പനി, മഞ്ഞപ്പിത്തം, രോമം കൊഴിയുക, വയറ്റില്‍ വെള്ളം കെട്ടിനില്‍ക്കുക, വിശപ്പില്ലായ്മ, കാലിലെ നീര് , എല്ലായ്‌പ്പോഴുമുള്ള മയക്കം, അമിത ക്ഷീണം മുതലായവയാണ് കരൾരോഗത്തിന്റെ പ്രധാന ലക്ഷണങ്ങളാണ്.

കരൾ രോഗത്തെ പ്രതിരോധിക്കാൻ നിങ്ങളെ സഹായിക്കുന്ന ജീവിതശൈലി
______________________________________

1)ആയുർവേദത്തിൽ പാചക പിത്തം, രഞ്ജക പിത്തം, സമാന വായു എന്നിവയുടെ സ്ഥാനം ആയാണ് കരളിനെ പറയുന്നത്. അതിനാൽ കരൾ രോഗമുള്ളവർക്ക് പൊതുവെ ദഹനശക്തി കുറവാണ്. അതിനാല്‍, പെട്ടെന്നു ദഹിക്കുന്നതും പോഷകം നിറഞ്ഞതുമായ ഭക്ഷണമാണ് അവര്‍ക്ക് അനുയോജ്യം. കഞ്ഞി, ഇഡ്ഡലി, സൂചിഗോതമ്പ്, ഓട്‌സ്, പാട നീക്കിയ പാല്‍, ഇളനീര്, കാച്ചിയ മോര് ഇവ കുറഞ്ഞ അളവില്‍ പല തവണകളായി കഴിക്കാം. പടവലങ്ങ, കാരറ്റ്, പപ്പായ, കുമ്പളങ്ങ, വെള്ളരിക്ക, ഇലക്കറികള്‍, പയര്‍വര്‍ഗങ്ങള്‍ ഇവയും കരളിനെ സംരക്ഷിക്കാന്‍ നിത്യഭക്ഷണത്തില്‍ ഉൽപ്പെടുത്തുന്നത് ഏറെ ഗുണം ചെയ്യും. അമിതമായി ക്ഷീണമുള്ളപ്പോള്‍ ചെറുപയര്‍ വേവിച്ച വെള്ളം സൂപ്പാക്കി കഴിക്കുന്നത് കരള്‍ രോഗത്തിന് ഗുണം ചെയ്യും. ഉള്ളി, തക്കാളി, നെല്ലിക്ക, മുരിങ്ങയില, മുന്തിരി, തണ്ണിമത്തന്‍, പേരയ്ക്ക,വെളുത്തുള്ളി, ചുവന്നുള്ളി, കറിവേപ്പില മുതലായവ ധാരാളമായി ആഹാരത്തിൽ ഉൾപ്പെടുത്തുക ഇത് കരളിന് നല്ലതാണ്

2)ധാരാളം ആൻറി ഓക്സിഡൻറുകൾ അടങ്ങിയിരിക്കുന്ന പ്ലം, ഉണക്കമുന്തിരി, ബ്ലൂബെറി, ബ്ലാക് ബെറി, റാസ്പ്ബെറി, ഓറഞ്ച്, റോസ് മുന്തിരി, ആപ്പിൾ എന്നീ പഴങ്ങൾ ധാരാളം ഉപയോഗിക്കുക.

3)വളരെ ഉയർന്ന തോതിൽ പഞ്ചസാരയുടെ ഉപയോഗം കരളിൽ കൊഴുപ്പ് അടിഞ്ഞ് കരളിെന്റെ പ്രവർത്തനത്തെ പ്രതികൂലമായി ബാധിക്കും.

4)ഫാസ്റ്റ്ഫുഡ് വിഭവങ്ങളിൽ പൂരിത കൊഴുപ്പുകളാണ് ഉപയോഗിക്കുന്നത്. ഇവയുടെ അമിതോപയോഗം കരളിന് ദോഷം ചെയ്യും.

5)പായ്ക്കറ്റുകളിലാക്കി വരുന്ന പലതരം സൂപ്പുകൾ, സാലഡുകൾ, ചിപ്പ്സുകൾ എന്നിവയെല്ലാം കൃത്രിമ മധുരം, കളറുകൾ, കേടാകാതെയിരിക്കുന്നതിനുള്ള കെമിക്കലുകൾ എന്നിവ അടങ്ങിയതാണ് ഇത് കരളിന് നല്ലതല്ല.

6)അധികമായ അളവിലും, അധികകാലവും ഉപയോഗിക്കുന്ന പ്രോട്ടീൻ ഷെയ്ക്കുകൾ കരളിനെ തകരാറിലാക്കും. ഹെൽത്തു ഷെയ്ക്കുകളിൽ അടങ്ങിയിരിക്കുന്ന പ്രോട്ടീനുകൾ സോയയിൽ നിന്നോ, മറ്റു പച്ചക്കറികളിൽ നിന്നോ ആണെങ്കിൽപ്പോലും മാംസത്തിൽ നിന്നും കിട്ടുന്ന പ്രോട്ടീനുകളെക്കാൾ ദഹിക്കാൻ ബുദ്ധിമുുള്ളതാണ്.തത്ഫലമായി കരളിന് കൂടുതലായി പ്രവർത്തിക്കേണ്ടി വരും അത് കാലക്രമത്തിൽ കരൾ തകരാറിലാക്കും

7)പ്രോട്ടീനുകളും കൊഴുപ്പും അധികമായി അടങ്ങിയിട്ടുള്ള റെഡ് മീറ്റുകളുടെ സ്ഥിരമായ ഉപയോഗം കരളിനു നല്ലതല്ല. ഇവയിലെ പ്രോട്ടീൻ, കൊഴുപ്പ് എന്നിവയെ നശിപ്പിക്കുന്നതിന് വേണ്ടി കരൾ സാധാരണയിലധികം പ്രവർത്തിക്കേണ്ടി വരുന്നതുകൊണ്ട് ഇവയുടെ അമിതമായ ഉപയോഗം കരൾ രോഗം ഉണ്ടാക്കും.

8) അമിതമായ മദ്യപാനവും കരളിന് ദോഷം ചെയ്യും. കൂടിയ അളവിലുള്ള മദ്യപാനം കരളിൽ കൊഴുപ്പ് അടിയുന്നതിനും സീറോസിസ്, ഹെപ്പറൈറ്റിസ് എന്നീ കരൾ രോഗങ്ങൾ ഉണ്ടാകുന്നതിനും കാരണമാകും.

9)നിത്യേനയുള്ള വ്യായാമവും പോഷകങ്ങള്‍ നിറഞ്ഞ നാടന്‍ഭക്ഷണങ്ങളും കരളിന്റെ ആരോഗ്യത്തിനു അനിവാര്യമാണ്.
അമിതമായ പുകവലിയും കരൾരോഗത്തിന് അതിന് ഒരു കാരണമാണ് അതിനാൽ പുകവലിയും തീര്‍ത്തും ഉപേക്ഷിക്കേണ്ടതാണ്.

10)വറുത്തതും പൊരിച്ചതുമായ ആഹാരപദാര്‍ഥങ്ങള്‍, മാംസോത്പന്നങ്ങള്‍, കേക്ക്, കടുപ്പംകൂടിയ ചായ, കാപ്പി, പപ്പടം, അച്ചാര്‍, സോസുകള്‍ ഇവ ഒഴിവാക്കുക. പച്ചക്കറികളും പഴങ്ങളും നന്നായി കഴുകി ഉപയോഗിക്കണം.​​

11)ഉപ്പിന്റെ ഉപഭോഗം വർധിച്ചാൽ ശരീരത്തിൽ​ സോഡിയത്തിന്റെ അളവ്​ വർധിക്കും. ഇത്​ ലിവർ സിറോസിസി​​ൻറ ആദ്യപടിയായ ​ഫൈബ്രോസിസിന് ഇടവരുത്തും.

12)നട്സ് ധാരാളമായി കഴിക്കുന്നത് കരളിന്‍റെ ആരോഗ്യത്തിന് നല്ലതാണ്. നട്സില്‍ അടങ്ങിയിരിക്കുന്ന വൈറ്റമിന്‍ ഇ കരളന് ആവശ്യമാണ്. അണ്ടിപ്പരിപ്പും ബദാമും ധാരാളം കഴിക്കാം.

13)പച്ചക്കറികളിലും മറ്റും കലരുന്ന കീടനാശിനികള്‍, ചിലയിനം മരുന്നുകളുടെ തുടര്‍ച്ചയായ ഉപയോഗം, കൃത്രിമ ഭക്ഷണം, അമിത ഭക്ഷണം, വ്യായാമത്തിന്റെയും വിശ്രമത്തിന്റെയും കുറവ്, തുടര്‍ച്ചയായ മാനസിക പിരിമുറുക്കം തുടങ്ങിയവയും കരളിന്റെ ആരോഗ്യത്തെ ബാധിക്കാറുണ്ട്. വര്‍ധിച്ച തോതിലുള്ള പ്രമേഹവും, കൊളസ്‌ട്രോളും, ബ്ലഡ് പ്രഷറും കരളിന് ഹാനികരമാണ്.

കരളിനെ ബാധിക്കുന്ന പ്രധാന രോഗങ്ങൾ
__________________________________________
കരളിനെ ബാധിക്കുന്ന ഒരു പ്രധാന രോഗമാണ് ഹെപ്പറ്റൈറ്റിസ് ഇതിൽ തന്നെ ഹെപ്പറ്റൈറ്റിസ് A,B,C എന്നീ രോഗങ്ങളാണ് ഏറെ വ്യാപിച്ചതും കരളിനെ ബാധിക്കുന്നതും. ആഗോളതലത്തില്‍ പ്രതിവര്‍ഷം 1.4മില്യണ്‍ ആള്‍ക്കാര്‍ ഈ രോഗം വന്ന് മരിക്കുന്നുണ്ട്.ഇന്ത്യന്‍ സൊസൈറ്റി ഓഫ് ക്ലിനിക്കല്‍ റിസര്‍ച്ച്(ISCR) 2016ല്‍ നടത്തിയ പഠനം പറയുന്നതിങ്ങനെ: ഇന്ത്യയില്‍ 12മില്യണ്‍ വ്യക്തികളെയാണ് മാരകമായ ഹെപ്പറ്റെറ്റിസ് C ബാധിച്ചിട്ടുള്ളത്. ഹെപ്പറ്റൈറ്റിസ് ഒരു തീരാവ്യാധിയായി മാറിയ 11 ലോകരാജ്യങ്ങളില്‍ നാലാമതാണ് ഇന്ത്യയുടെ സ്ഥാനം. ഹെപ്പറ്റൈറ്റിസ്-ബി ക്കെതിരെ ഇന്ന് പ്രതിരോധകുത്തിവെപ്പുകൾ ലഭ്യമാണ് അത് എടുക്കുന്നത് വളരെ നല്ലതാണ്.

അതുപോലെതന്നെ മദ്യപിക്കാത്തവരിൽ കാണുന്ന "നോൺ ആൽക്കഹോളിക് ഫാറ്റി ലിവർ' ഡിസീസ് ഇന്നു വളരെ സാധാരണം. സ്ത്രീകളിലും ഇതു വ്യാപകം.മുതിർന്നവർക്ക് മാത്രമല്ല കുട്ടികൾക്കും ഇത് വരാം. വ്യായാമക്കുറവും മോശം ഭക്ഷണ ശീലവുമൊക്കെയാണ് ഇതിന്റെ കാരണമാകാം. മദ്യപാനികളുമായി ചേർത്തുവായിച്ചിരുന്ന ''സിറോസിസ്'' മദ്യം തൊടാത്തവർക്കും വരാം.

കരളിൽ കൊഴുപ്പടിയുമ്പോൾ ഉണ്ടാകുന്ന
"ഫാറ്റി ലിവർ"എന്ന രോഗം ഇന്ന് വളരെ വ്യാപകമായ കാണുന്ന കരൾ രോഗങ്ങളിലൊന്നാണ് ഇതുമൂലം കരളിന്റെ പ്രവർത്തന ശേഷി കുറയും.കരളിനെ ബാധിക്കുന്ന മിക്ക രോഗങ്ങളും അവസാനിക്കുന്നത് സിറോസിസിലാണ് ക്രമേണ കരളിന്റെ പ്രവർത്തനക്ഷമത കുറയുന്നതിനെ തുടർന്ന് ദോഷകരമായ വിഷവസ്തുക്കളെ നിർവീര്യമാക്കാനോ, രക്തം ശുദ്ധീകരിക്കാനോ, അണുബാധ തടയാനോ കഴിയാതെ കരൾ പൂർണമായും പരാജയപ്പെടുന്നു. സിറോസിസ് കൃത്യമായ ചികിത്സ ലഭിച്ചില്ലെങ്കിൽ അത് കരൾ ക്യാൻസർ ആയി മാറാം. ഇതിനെല്ലാം ഏറ്റവും അവസാനം കരൾരോഗത്തിന്റെ ഏറ്റവും ഗുരുതരവുമായ ലക്ഷണമാണ് "കോമ" അഥവാ മസ്തിഷ്‌കാഘാതം മൂലമുണ്ടാകുന്ന ഒരിക്കലും ഉണരാത്ത അവസ്ഥ.

ഉപസംഹാരം
_____________

നമ്മുടെ ജീവിതശൈലിയിൽ ചെറിയ മാറ്റങ്ങൾ വരുത്തിയാൽ നമുക്ക് കരൾ രോഗങ്ങൾ വരാതെ പ്രതിരോധിക്കാൻ സാധിക്കും എന്നതാണ് യാഥാർത്ഥ്യം. കേടുപറ്റിയാല്‍ സ്വയം സുഖപ്പെടുത്താനും സ്വന്തം ശക്തിയെ പുനര്‍ജനിപ്പിക്കാനുമുള്ള ശക്തി കരളിനുണ്ട്. ഇതിനു പുറമേ അസാമാന്യമായ സഹനശേഷിയുമുണ്ട്. രോഗ ലക്ഷണങ്ങള്‍ പ്രകടമാകും മുമ്പേ ആരും കരളിൻറെ ആരോഗ്യം സംബന്ധിച്ച് കരുതല്‍ എടുക്കാറില്ല എന്നതാണ് വസ്തുത.എൺപതുശതമാനത്തോളം അവശത വരുമ്പോഴേ കരൾ കരഞ്ഞു തുടങ്ങൂ. ആ സമയത്ത് അവശേഷിക്കുന്ന വഴി കരൾ മാറ്റി വയ്ക്കലായിരിക്കും. കരളിന്റെ പ്രവർത്തനം നിലയ്ക്കുക, ട്യൂമറുകൾ ബാധിക്കുക തുടങ്ങിയ പ്രശ്‌നങ്ങളെ അഭിമുഖീകരിക്കുമ്പോഴും പ്രതിവിധി കരൾമാറ്റം തന്നെ. മസ്തിഷ്‌ക മരണം സംഭവിച്ചവരിൽ നിന്നു കരൾ എടുത്തു മാറ്റിവയ്ക്കുക, ചേരുന്ന രക്തഗ്രൂപ്പുകൾ ഉള്ളവരിൽ നിന്നു കരളിന്റെ ഒരു ഭാഗം സ്വീകരിക്കുക എന്നിങ്ങനെ രണ്ടു തരത്തിലാണു കരൾ മാറ്റശസ്ത്രക്രിയകൾ. അതെന്തെങ്കിലുമാവട്ടെ കരളിൻറെ ആരോഗ്യം നിങ്ങളുടെ ഉത്തരവാദിത്തമാണ് അതിനാൽ അതിനെ ദ്രോഹിക്കാതെ സംരക്ഷിച്ചു കൊണ്ട് നടക്കുക. ആയുർവേദ ശാസ്ത്രത്തിൽ കരളിനെ "യകൃത്" എന്നാണ് പറയുന്നത് അതുപോലെതന്നെ കരൾ രോഗങ്ങളെ "യകൃത് രോഗങ്ങൾ" എന്നും പറയുന്നു. കരൾ രോഗങ്ങൾക്കുള്ള ചികിത്സ വളരെയധികം പ്രാധാന്യത്തോട് കൂടിയാണ് ആണ് ആയുർവേദ ശാസ്ത്രത്തിൽ പറയുന്നത്. കരൾ സംബന്ധമായ പല അസുഖങ്ങളിലും വളരെ ഫലപ്രദമായ ആയുർവേദ ചികിത്സകൾ ഇന്ന് ലഭ്യമാണ്.

നന്ദി

🌹🌹🌹🌹🌹🌹🌹🌹🌹

ഡോ. പൗസ് പൗലോസ് BAMS, MS(Ay)

സീതാറാം ആയുർവേദ സ്പെഷ്യാലിറ്റി ഹോസ്പിറ്റൽ. തൃശ്ശൂർ

പരീക്ഷയിൽ തോൽക്കുമ്പോഴോം ചില വിദ്യാർഥികൾ ആത്മഹത്യ ചെയ്യുന്നു

പരീക്ഷയ്ക്ക് മാർക്ക് കുറയുമ്പോഴും, പരീക്ഷയിൽ തോൽക്കുമ്പോഴോം ചില വിദ്യാർഥികൾ ആത്മഹത്യ ചെയ്യുന്നു എന്ന് കേൾക്കുന്നത് വളരെ വേദനിപ്പിക്കുന്ന ഒരു കാര്യമാണ്. കാരണം പഠനകാലത്ത് ഞാനും ഒരു ആവറേജ് വിദ്യാർത്ഥിയായിരുന്നു പലപ്പോഴും തോൽവികൾ ഏറ്റു വാങ്ങേണ്ടി വന്നിട്ടുണ്ട്. ജീവിതത്തിൽ ഇന്നേവരെ ഒരു പരീക്ഷയും അമിത പ്രാധാന്യത്തോടുകൂടി നോക്കി കണ്ടിട്ടില്ല. ഞാൻ ഇപ്പോഴും പഠിച്ചുകൊണ്ടിരിക്കുന്ന വ്യക്തിയാണ് അത് ഒരുപക്ഷേ ഈ പരീക്ഷ പേടി ഇല്ലാത്തത് കൊണ്ടാവും അതിനാൽ എന്റെ ഒരു ചെറിയ അനുഭവത്തിൽ നിന്നും എനിക്ക് പറയുവാനുള്ളത് പരീക്ഷയെ അമിതപ്രാധാന്യത്തോട് കൂടി നോക്കി കാണാതിരിക്കുക, തോൽവിയിൽ നിന്ന് ഒരുപാട് പാഠങ്ങൾ പഠിക്കാനുണ്ട് അതിന് ഒരുപാട് ജീവിതാനുഭവങ്ങൾ സമ്മാനിക്കാൻ സാധിക്കും യഥാർത്ഥത്തിൽ ജീവിതത്തിൽ വിജയിക്കാനുള്ള കൽപ്പടവുകൾ ജീവിതത്തിൽ നമ്മളെ ഒരുപാട് വേദനിപ്പിച്ച തോൽവികൾ തന്നെയാണ്. ഇടയ്ക്ക് നമ്മൾ പത്രമാധ്യമങ്ങളിൽ വായിക്കാറുള്ള കാര്യമാണ് മാതാപിതാക്കൾ പരീക്ഷയിൽ മാർക്ക് കുറയുമ്പോൾ കുട്ടികളോട് ദേഷ്യപ്പെടുന്നു, കുറ്റപ്പെടുത്തുന്നു അവരെ അടിക്കുന്നു. ഇതെല്ലാം വളരെ തെറ്റായ ഒരു പ്രവണതയാണ് ജീവിതത്തിൽ പരാജയം ഏറ്റുവാങ്ങി വരുമ്പോൾ അവർക്ക് ഒരു താങ്ങും, തണലും ആകേണ്ട മാതാപിതാക്കൾ അവരോട് ശത്രുക്കളെ പോലെ പെരുമാറുന്നത് സഹിക്കാനാവാതെ ചിലപ്പോൾ ചില കുട്ടികൾ സ്വന്തം ജീവിതത്തിന്റെ വിലയറിയാതെ അത് അവസാനിപ്പിക്കുന്നു. അല്ലെങ്കിൽ വേറൊരു കൂട്ടർ പരീക്ഷയും പഠനത്തെയും അവസാനിപ്പിക്കുന്നു വേറെ ചിലർ സാമൂഹ്യദ്രോഹികൾ ആയി മാറുന്നു. പരീക്ഷയിൽ ഉന്നത വിജയം നേടാൻ അല്ല മാതാപിതാക്കൾ സ്വന്തം മക്കളെ പഠിപ്പിക്കേണ്ടത് അവരെ നല്ല മനുഷ്യരാവാൻ പഠിപ്പിക്കുക. നമ്മുടെ സമൂഹത്തിന് ആവശ്യം നല്ല മനുഷ്യരെയാണ് അല്ലാതെ
കുറെ മാർക്ക് നേടിയവരെ അല്ല അതിനാൽ അവരെ നല്ല ഒരു സാമൂഹ്യജീവി ആവാൻ പഠിപ്പിക്കുക. ഇങ്ങനെ സ്വന്തം മക്കൾക്ക് നേർവഴി കാണിച്ച് കൊടുത്ത് വിജയത്തിലും, പരാജയത്തിലും കൂടെ നിൽക്കുന്ന മാതാപിതാക്കൾ ആണ് അവരെ യഥാർത്ഥ ജീവിത വിജയത്തിന് സഹായിക്കുന്നവർ.

ഡോ.പൗസ് പൗലോസ്

ഗുരുവേ നമ

गुरूर ब्रह्मा गुरूर विष्णु,
गुरु देवो महेश्वरा,
गुरु साक्षात परब्रह्म,
तस्मै श्री गुरुवे नमः

നമുക്ക് വളരെ സുപരിചിതമായ വരികളാണിവ. എന്നാൽ ഈ വരികളുടെ ഉദ്ഭവത്തെക്കുറിച്ച് അറിയുന്നവർ ചുരുക്കമാണ്. 'സ്കന്ദപുരാണ' ത്തിലെ 'ഗുരുഗീത' എന്നപേരിൽ അറിയപ്പെടുന്ന ഭാഗമാണിത്.

പരമശിവനും പത്നിയായ പാർവ്വതിയും തമ്മിലുള്ള സംഭാഷണമാണ് ഇത് മുഴുവൻ. മിക്കപ്പോഴും ധ്യാനസ്വഭാവത്തിൽ കാണപ്പെടുന്ന പരമശിവനോട് പാർവ്വതി ചോദിക്കുന്നു, 'ലോകം മുഴുവനും അങ്ങയെ പ്രാർത്ഥിച്ചു കൊണ്ടിരിക്കുമ്പോൾ അങ്ങ് ആരെയാണ് ധ്യാനിക്കുന്നത് 'എന്ന്.ഈ ചോദ്യത്തിന് മറുപടിയായി പരമശിവൻ നൽകുന്ന മറുപടിയാണ് മുകളിൽ പറഞ്ഞ വരികൾ.

പരമശിവൻ പറയുന്നു , 'ഞാനും ബ്രഹ്മാവും വിഷ്ണുവുമെല്ലാം ഗുരുവാണ്. എന്നാൽ ഞങ്ങൾക്കെല്ലാം ഒരു ഗുരുവുണ്ട് . അത് സാക്ഷാൽ പരബ്രഹ്മമാണ്. ആ പരബ്രഹ്മമായി നിൽക്കുന്ന ഗുരുവിനെയാണ് ഞാൻ പ്രാർത്ഥിക്കുന്നത്. ഇതാണ് ആ വരികൾക്ക് അർത്ഥം.

തുടർന്ന് അങ്ങനെയൊരു ഗുരുവിനെ എങ്ങനെ കിട്ടുമെന്നും കിട്ടിയാൽ എങ്ങനെ ആരാധിക്കണമെന്നും ഗുരുവാക്ക് പാലിച്ചാൽ എന്തൊക്കെ ഗുണങ്ങളുണ്ടെന്നും തെറ്റിച്ചാൽ എന്തൊക്കെ ദോഷങ്ങളുണ്ടെന്നും ഇങ്ങനെയുള്ള പാർവ്വതിയുടെ നിരവധി ചോദ്യങ്ങൾക്ക് പരമശിവൻ നൽകുന്ന മറുപടികളാണ് ഗുരു ഗീതയിലെ നൂറുകണക്കിന് വരികൾ

ഗുരുവേ നമ: