ഉദർദപ്രശമന മഹാകഷായം

ആയുർവേദത്തിൽ ഉദർദം എന്നത് പെട്ടെന്ന് ഉദയം ചെയ്യുന്ന ചർമ്മവ്യാധികളെ സൂചിപ്പിക്കുന്ന പദമാണ്. ചർമ്മത്തിൽ പെട്ടെന്ന് ഉണ്ടാകുന്ന ചുവപ്പ്, വീക്കം, ചൊറിച്ചിൽ, പൊള്ളൽ തുടങ്ങിയ ലക്ഷണങ്ങളോടുകൂടിയ അവസ്ഥകളെയാണ് ഉദർദം എന്ന് വിവക്ഷിക്കുന്നത്. ആധുനിക വൈദ്യശാസ്ത്രത്തിൽ പറയുന്ന അർട്ടിക്കേറിയ, അലർജിക് റിയാക്ഷനുകൾ, ഇൻസെക്റ്റ് ബൈറ്റ് അലർജി എന്നിവയുമായി ഇതിന് വലിയ സാമ്യമുണ്ട്. ചരകാചാര്യൻ ഉദർദത്തിന്റെ കാരണമായി പ്രധാനമായും കഫ-പിത്ത ദോഷങ്ങളുടെ വികൃതിയെയും രക്തദൂഷണത്തെയും സൂചിപ്പിക്കുന്നു.

ചരകസംഹിത സൂത്രസ്ഥാനത്തിൽ ഉദർദത്തിന്റെ ശമനത്തിനായി പ്രത്യേകം പ്രതിപാദിച്ചിരിക്കുന്ന ഔഷധസമൂഹമാണ് ഉദർദപ്രശമന മഹാകഷായം. ദശേമാനി എന്ന വിഭാഗത്തിൽ ഉൾപ്പെടുന്ന ഈ മഹാകഷായത്തിൽ പത്ത് ഔഷധങ്ങൾ ഉൾക്കൊള്ളുന്നു. ഇവയിൽ ഭൂരിഭാഗവും കഷായരസപ്രധാനങ്ങളായതിനാൽ രക്തത്തിലെ അമിതമായ ചൂടും ദോഷവികൃതിയും നിയന്ത്രിക്കാൻ കഴിവുള്ളവയാണ്. അതുകൊണ്ടുതന്നെ ഉദർദം പോലുള്ള അക്യൂട്ട് ചർമ്മവ്യാധികളിൽ ഈ ഗണത്തിന് പ്രത്യേക പ്രാധാന്യമുണ്ട്.

തിന്ദുക, പ്രിയാല, ബദര, ഖദിര, കദര, സപ്തപർണ, അശ്വകർണ്ണ, അർജുന, അസന, അരിമേദ എന്നീ പത്ത് ഔഷധങ്ങളാണ് ഉദർദപ്രശമന ദശേമാനിയിൽ ഉൾപ്പെടുന്നത്. ഇവയിൽ ഖദിരയും കദരയും പോലുള്ള ദ്രവ്യങ്ങൾ രക്തശുദ്ധികരവും കുഷ്ഠഘ്നവുമായ ഗുണങ്ങൾ കൊണ്ട് പ്രശസ്തമാണ്. സപ്തപർണ, അശ്വകർണ്ണ തുടങ്ങിയവ ശോഥഹരവും ദാഹശമനവുമാകുമ്പോൾ, അർജുന രക്തധാതുവിനെ ബലപ്പെടുത്തുകയും പിത്തശമനം നടത്തുകയും ചെയ്യുന്നു. ഇതെല്ലാം ചേർന്നപ്പോൾ കഫ-പിത്ത ദോഷങ്ങളുടെ സമത്വം പുനഃസ്ഥാപിക്കപ്പെടുകയും ചർമ്മത്തിലെ അലർജിക് പ്രതികരണങ്ങൾ ശമിക്കപ്പെടുകയും ചെയ്യുന്നു.

ഈ മഹാകഷായത്തിന്റെ പ്രവർത്തനരീതി പ്രധാനമായും രക്തദൂഷണം ശമിപ്പിക്കുക, കഫപിത്ത ശമനം നടത്തുക, ചർമ്മത്തിലെ വീക്കം, ചൊറിച്ചിൽ, ചൂട് എന്നിവ കുറയ്ക്കുക എന്നതാണ്. അതിനാൽ ഉദർദം, ശീതപിത്തം, അലർജിക് ഡെർമറ്റൈറ്റിസ്, ഫുഡ് അലർജി മൂലമുള്ള സ്കിൻ റിയാക്ഷനുകൾ, കീടദംശജന്യമായ അലർജികൾ തുടങ്ങിയ അവസ്ഥകളിൽ ഇത് ഫലപ്രദമായി ഉപയോഗിക്കപ്പെടുന്നു. രോഗിയുടെ ദോഷാവസ്ഥയും ശക്തിയും കണക്കിലെടുത്ത് കഷായമായി, ലേപമായി അല്ലെങ്കിൽ സംയുക്ത ഔഷധങ്ങളുടെ ഭാഗമായി ഈ ദ്രവ്യങ്ങൾ പ്രയോഗിക്കാം.

ഇന്നത്തെ കാലഘട്ടത്തിൽ ജീവിതശൈലി മാറ്റങ്ങൾ, രാസവസ്തുക്കളോടുള്ള അധിക സമ്പർക്കം, ഭക്ഷണക്രമത്തിലെ അപാകതകൾ എന്നിവ മൂലം അലർജിക് ചർമ്മരോഗങ്ങൾ വർധിച്ചുവരുന്ന സാഹചര്യത്തിൽ, ഉദർദപ്രശമന മഹാകഷായത്തിലെ ആശയം വളരെ പ്രസക്തമാണ്. ശരിയായ ആയുർവേദപരമായ നിർണയത്തോടെയും യുക്തമായ ചികിത്സാരീതികളോടെയും ഉപയോഗിക്കുമ്പോൾ, ഈ ദശേമാനി സുരക്ഷിതവും ദീർഘകാല ഫലപ്രാപ്തിയുള്ളതുമായ പരിഹാരമായി മാറുന്നു.

      ഡോ.പൗസ് പൗലോസ് 

(അസോസിയേറ്റ് പ്രൊഫസർ)