തഴുതാമ -Boerhavia diffusa ഔഷധഗുണങ്ങൾ

വേനൽക്കാലത്ത് കരിഞ്ഞുണങ്ങി പൂർണ്ണമായും നശിച്ചാലും വർഷകാലത്ത് തളിർത്ത് പടർന്നു പന്തലിച്ചു വളരുന്ന ഒരു ചെടിയുണ്ട്. വീണ്ടും തളിർക്കുന്നത് എന്ന അർത്ഥത്തിൽ ആയുർവേദാചാര്യന്മാർ അതിനെ പുനർനവ എന്നു പേരിട്ടു. വയസായവരെ വീണ്ടും തളിർപ്പിക്കാനുള്ള മരുന്നാക്കി (രസായന ഔഷധം എന്ന് ശാസ്ത്രീയമായി പറയാം ) . ആധുനികശാസ്ത്രം ലാബുകളിൽ പരിശോധിച്ച് ഫലമറിഞ്ഞ് ഇന്നതിനെ പല മരുന്നുകളിലും ഉപയോഗിക്കുന്നു. മലയാളത്തിൽ അതിന്റെ പേര് തഴുതാമ , പുനർനവ എന്നൊക്കെയാണ്. ബൊറാവിയ ഡിഫ്യൂസ (Boerhavia diffusa ) എന്നാണ് ശാസ്ത്രീയ നാമം . നിക്ടാജിനേസിയേ (Nyctaginaceae) കുടുംബാംഗമാണ്. 

ചുവപ്പ് വെള്ളനിറങ്ങളിൽ 2തരം തഴുതാമ ഉണ്ട് . നീല, പച്ച നിറത്തിലുള്ള തഴുതാമ ഉണ്ട് എന്ന് നാട്ടുവൈദ്യം പറയുന്നുണ്ട് എങ്കിലും കണ്ടവരില്ല. രാജനിഘണ്ടുവിൽ നീല ഇനത്തെ പറയുന്നുണ്ട്. നീല, പച്ച പൂക്കളുള്ള തഴുതാമ അറിവുള്ളവർ ഫോട്ടോ കമന്റ് ചെയ്താൽ ഉപകാരമായിരിക്കും.

രസ, ഗുണ, വീര്യ, വിപാകങ്ങൾ

കഷായ തിക്ത മധുരരസങ്ങൾ ആണ് ഈ ചെടിക്കുള്ളത്. അതിനാൽ പിത്തശമനമായിരിക്കും എന്ന ധാരണ തിരുത്തി ഉള്ളിൽ ചെന്നാൽ ലഘു രൂക്ഷഗുണങ്ങളാൽ ദഹനശേഷം എരിവു രസമായി മാറി ഉഷ്ണത്തെ ഉണ്ടാക്കി കഫത്തെയും , വാതത്തേയും ശമിപ്പിക്കുന്ന തലതിരിഞ്ഞ ഒരു ചെടിയാണിത്. അതുകൊണ്ടു തന്നെ നീര്, വിഷം, ഹെർണ്ണിയ , സ്പ്ലീനോമെഗാലി, ഹൃദ്രോഗം, ശ്വാസരോഗം, വൃക്കരോഗങ്ങൾ എന്നിവയിലെല്ലാം അവസ്ഥാനുസരണം പുനർനവ ഉപയോഗിക്കാം.

പടർന്നു പന്തലിച്ചു വളരുന്ന ബഹുവർഷി ക്രീപ്പറാണ്. വേര് തടിച്ചതും, കട്ടിയുള്ളതുമാണ്. ഇത് പൊടിച്ച് ഉപയോഗിക്കുന്നത് സമൂലം (whole plant) ഉപയോഗിക്കുന്നതിനേക്കാൾ ഗുണം ചെയ്യും. ഈ ചെടി ഇലകൾ ഓപ്പോസിറ്റായി , ചെറിയ പൂക്കളോടെയും , ഉരുണ്ട ചെറിയ കായ്കളോടെയും ഇന്ത്യയിലെവിടെയും കാണാൻ കഴിയും.

മൂത്രതടസത്തിന് വെള്ളം തിളപ്പിച്ച് ഉപയോഗിക്കാറുണ്ട് എങ്കിലും ധാരാളം പൊട്ടാസ്യം നൈട്രേറ്റ് അടങ്ങിയ ചെടിയായതിനാൽ 

പ്രായമുള്ളതും, സോഡിയം / പൊട്ടാസ്യം താഴുന്നതുമായ രോഗികൾക്ക് കൊടുക്കാതിരിക്കുന്നതാണ് നല്ലത്. 

ഇല തോരനാക്കി / ഉപ്പേരിയാക്കി കഴിക്കുന്നതാവും കൂടുതൽ അപായരഹിതമായ ഉപയോഗം. 

അർശസിന് ഹിതകരമായ മരുന്നാണ്. 

വിശപ്പുവർദ്ധിപ്പിക്കും. സ്ത്രീകളുടെ പലരോഗങ്ങളിലും നാട്ടുവൈദ്യം ഈ മരുന്ന് ഉപയോഗപ്പെടുത്തിക്കണ്ടിട്ടുണ്ട്. ഉറക്കക്കുറവിന് തഴുതാമവേര് കഷായം ഗുണകരമാണ്.

കരളിൻ്റെ ആരോഗ്യംവർദ്ധിപ്പിക്കുന്ന ഒരു ഔഷധസസ്യമായ ഇത്

രക്തത്തെ വർദ്ധിപ്പിക്കുന്നതു കൂടിയാണ്.

 പുനർനവാദി കഷായം, പുനർനവാസവം, പുനർനവമണ്ടുരം ഗുളിക എന്നിവ പ്രസിദ്ധയോഗങ്ങളാണ്.