അഷ്ടചൂർണ്ണം

ദഹനപ്രക്രിയയെ സുഗമമാക്കുന്നതിനും ഉദരരോഗങ്ങളെ ചെറുക്കുന്നതിനും ആയുർവേദം നിർദ്ദേശിക്കുന്ന അത്യുത്തമവും ലളിതവുമായ ഒരു ഔഷധക്കൂട്ടാണ് അഷ്ടചൂർണ്ണം. പേര് സൂചിപ്പിക്കുന്നതുപോലെ തന്നെ, കൃത്യമായ അനുപാതത്തിൽ സംയോജിപ്പിച്ചിട്ടുള്ള എട്ട് വ്യത്യസ്ത ഔഷധദ്രവ്യങ്ങളാണ് ഇതിലടങ്ങിയിരിക്കുന്നത്. ദഹനക്കുറവ് അഥവാ അഗ്നിമാന്ദ്യമാണ് സകല രോഗങ്ങൾക്കും കാരണമെന്ന ആയുർവേദ സിദ്ധാന്തത്തെ അടിസ്ഥാനമാക്കിയാണ് ഈ ഔഷധം പ്രവർത്തിക്കുന്നത്. ഇതിലടങ്ങിയിരിക്കുന്ന ഓരോ ഘടകങ്ങൾക്കും അതിന്റേതായ സവിശേഷമായ ഫാർമക്കോളജിക്കൽ മൂല്യങ്ങളും ശാസ്ത്രീയ അടിത്തറയുമുണ്ട്. ഈ ഔഷധങ്ങളെല്ലാം ചേരുമ്പോൾ കുടലിന്റെ ആരോഗ്യത്തിന് പൂർണ്ണമായ സംരക്ഷണം ലഭിക്കുന്നു.

അഷ്ടചൂർണ്ണത്തിലെ ആദ്യത്തെ മൂന്ന് ഘടകങ്ങൾ ആയുർവേദത്തിൽ ത്രികടുക്കൾ എന്നറിയപ്പെടുന്ന ചുക്ക് (Zingiber officinale), കുരുമുളക് (Piper nigrum), തിപ്പലി (Piper longum) എന്നിവയാണ്. ദഹനരസങ്ങളുടെ ഉൽപ്പാദനം ത്വരിതപ്പെടുത്തുന്നതിൽ ഇവയ്ക്ക് വലിയ പങ്കുണ്ട്. ചുക്കിൽ അടങ്ങിയിരിക്കുന്ന ജിഞ്ചറോൾ (Gingerol), ഷോഗോൾ (Shogaol) എന്നീ സജീവ രാസഘടകങ്ങൾ ആമാശയത്തിലെ ദഹനരസങ്ങളെ ഉത്തേജിപ്പിക്കുകയും ഗ്യാസ്ട്രിക് എംപ്റ്റിയിംഗ് (Gastric emptying) അഥവാ ആമാശയത്തിൽ നിന്ന് ഭക്ഷണം കുടലിലേക്ക് നീങ്ങുന്ന പ്രക്രിയ എളുപ്പമാക്കുകയും ചെയ്യുന്നു. മികച്ച ഒരു ആന്റി-ഇൻഫ്ലമേറ്ററി കൂടിയാണിത്. കുരുമുളകിലെ പ്രധാന ആൽക്കലോയിഡായ പൈപ്പറിൻ (Piperine) ഒരു ബയോ-എൻഹാൻസർ (Bioavailability enhancer) ആയിട്ടാണ് പ്രവർത്തിക്കുന്നത്. അതായത്, ചൂർണ്ണത്തിലെ മറ്റ് ഔഷധങ്ങളുടെ ഗുണങ്ങളെ ശരീരം വേഗത്തിൽ വലിച്ചെടുക്കാൻ കുരുമുളക് സഹായിക്കുന്നു. കൂടാതെ പാൻക്രിയാറ്റിക് എൻസൈമുകളെ ഉദ്ദീപിപ്പിക്കാനും ഇതിന് കഴിവുണ്ട്. തിപ്പലിയിലുള്ള പൈപ്പർലോംഗുമിൻ (Piperlongumine) കുടലിലെ ആഗിരണ പ്രക്രിയയെ മെച്ചപ്പെടുത്തുകയും കരളിലെ ഉപാപചയ പ്രവർത്തനങ്ങളെ (Metabolism) ഉത്തേജിപ്പിക്കുകയും ചെയ്യുന്നു.

ദഹനസംബന്ധമായ പ്രശ്നങ്ങൾക്ക് ഏറ്റവും മികച്ച ഔഷധങ്ങളായ അയമോദകവും (Trachyspermum ammi) ഇന്തുപ്പുമാണ് (Saindhava Lavana) ഇതിലെ തുടർന്നുള്ള ഘടകങ്ങൾ. അയമോദകത്തിൽ ധാരാളമായി അടങ്ങിയിട്ടുള്ള തൈമോൾ (Thymol) എന്ന ബാഷ്പശീലമുള്ള തൈലത്തിന് അതിശക്തമായ ആന്റിസ്പാസ്മോഡിക് (Antispasmodic) ഗുണങ്ങളാണുള്ളത്. കുടലിലെ പേശികളിലുണ്ടാകുന്ന കോച്ചിപ്പിടുത്തം മാറ്റാനും, ഗ്യാസ് മൂലമുണ്ടാകുന്ന വയറുവേദന തൽക്ഷണം ശമിപ്പിക്കാനും ഇത് സഹായിക്കുന്നു. സാധാരണ ഉപ്പിൽ നിന്നും വ്യത്യസ്തമായി ധാരാളം സൂക്ഷ്മ മൂലകങ്ങൾ (Trace minerals) അടങ്ങിയിട്ടുള്ളതാണ് ഇന്തുപ്പ്. ഇത് ശരീരത്തിൽ അധികമായി ജലം കെട്ടിനിൽക്കുന്ന അവസ്ഥ (Water retention) സൃഷ്ടിക്കാതെ തന്നെ ഉമിനീരിന്റെയും ഗ്യാസ്ട്രിക് ജ്യൂസുകളുടെയും ഉൽപ്പാദനം വർദ്ധിപ്പിക്കുന്നു. ശരീരത്തിലെ ഇലക്ട്രോലൈറ്റ് ബാലൻസ് നിലനിർത്താനും ഉദരത്തിലെ അമ്ലത (Acidity) ക്രമീകരിക്കാനും ഇന്തുപ്പ് സഹായിക്കുന്നു.

ജീരകം (Cuminum cyminum), കരിഞ്ചീരകം (Nigella sativa), കായം (Ferula asafoetida) എന്നിവയാണ് അഷ്ടചൂർണ്ണത്തെ കൂടുതൽ ഫലപ്രദമാക്കുന്ന മറ്റ് ഘടകങ്ങൾ. ജീരകത്തിലെ ക്യൂമിനാൽഡിഹൈഡ് (Cuminaldehyde) ഉമിനീർ ഗ്രന്ഥികളെയും പാൻക്രിയാസിനെയും നേരിട്ട് ഉത്തേജിപ്പിച്ച് ദഹനപ്രക്രിയ എളുപ്പമാക്കുന്നു. മികച്ച ഒരു കാർമിനേറ്റീവായ ഇത് കുടലിന്റെ ചലനശേഷി (Bowel motility) വർദ്ധിപ്പിക്കുന്നു. അതിശക്തമായ ആന്റിഓക്സിഡന്റ് സവിശേഷതകളുള്ള കരിഞ്ചീരകത്തിലെ തൈമോക്വിനോൺ (Thymoquinone) കുടലിലെ നല്ല ബാക്ടീരിയകളെ (Gut microbiome) സംരക്ഷിക്കുകയും അൾസർ വരാതെ തടയുകയും ചെയ്യുന്നു. അഷ്ടചൂർണ്ണത്തിന് അതിന്റെ സവിശേഷമായ വീര്യം നൽകുന്നത് എട്ടാമത്തെ ഘടകമായ കായമാണ്. ഇതിലെ ഫെറുലിക് ആസിഡ് (Ferulic acid), അംബെല്ലിഫെറോൺ എന്നീ രാസഘടകങ്ങൾക്ക് ആന്റിമൈക്രോബിയൽ ഗുണങ്ങളുണ്ട്. കുടലിൽ ഗ്യാസ് രൂപപ്പെടുന്നത് തടയുന്നതിനും (Anti-flatulent), ദഹനമില്ലായ്മ മൂലമുണ്ടാകുന്ന അസ്വസ്ഥതകൾ ഒഴിവാക്കുന്നതിനും കായം അത്യുത്തമമാണ്.

ഈ ഔഷധങ്ങളുടെയെല്ലാം സംയോജിതമായ പ്രവർത്തനം വഴി അഷ്ടചൂർണ്ണം ഉദരരോഗങ്ങളിൽ വളരെ മികച്ച ഫലം നൽകുന്നു. 

വാതഗുല്മം (വയറ്റിൽ വായു കോപിച്ചുണ്ടാകുന്ന അവസ്ഥ), ഉദരശൂല (വയറുവേദന), അജീർണ്ണം (ദഹനമില്ലായ്മ), അരുചി (ഭക്ഷണം കഴിക്കാൻ താത്പര്യമില്ലായ്മ), ആധ്മാനം (വയർ വീർപ്പുമുട്ടലും ഗ്യാസ് നിറയലും) എന്നിവയെ ഇത് പൂർണ്ണമായും ശമിപ്പിക്കുന്നു. കൂടാതെ ആമാശയത്തിന്റെയും കുടലിന്റെയും ആഗിരണശേഷി നഷ്ടപ്പെടുന്ന ഗ്രഹണി (Malabsorption syndrome) എന്ന അവസ്ഥയിലും ഇത് വളരെ ഫലപ്രദമാണ്. ദഹനരസങ്ങളുടെ ഉൽപ്പാദനം വർദ്ധിപ്പിച്ച് ആമത്തെ ഇല്ലാതാക്കുകയും, അതിലൂടെ അഗ്നിദീപ്തിയെ ഗണ്യമായി വർദ്ധിപ്പിക്കുകയും ചെയ്യുക എന്നതാണ് അഷ്ടചൂർണ്ണത്തിന്റെ പ്രധാന ധർമ്മം.

അഷ്ടചൂർണ്ണം സേവിക്കേണ്ട വിധത്തിനും ആയുർവേദത്തിൽ പ്രത്യേക ശാസ്ത്രീയ കാരണങ്ങളുണ്ട്. 2 മുതൽ 5 ഗ്രാം വരെ ചൂർണ്ണം അല്പം നെയ്യിൽ കുഴച്ച് ഭക്ഷണത്തിന്റെ ആദ്യത്തെ ഉരുളയോടൊപ്പം (First bolus of food) ദിവസത്തിൽ രണ്ടുപ്രാവശ്യം കഴിക്കേണ്ടതാണ്. മരുന്നിന്റെ ഉഷ്ണതീക്ഷ്ണ ഗുണങ്ങൾ മൂലം ആമാശയ ഭിത്തികൾക്ക് അസ്വസ്ഥതയുണ്ടാകാതിരിക്കാൻ നെയ്യ് ഒരു ആവരണം നൽകി സംരക്ഷിക്കുന്നു. 

മാത്രമല്ല, ആദ്യത്തെ ആഹാരമുരുളയോടൊപ്പം മരുന്ന് ഉള്ളിൽ ചെല്ലുമ്പോൾ അത് സമാനവായുവിനെയും പാചകാഗ്നിയെയും നേരിട്ട് ഉത്തേജിപ്പിക്കുകയും ദഹനരസങ്ങൾ വേഗത്തിൽ സ്രവിക്കാൻ സഹായിക്കുകയും ചെയ്യുന്നു. ഇതുകൂടാതെ, ഇഞ്ചിയും കറിവേപ്പിലയും ചേർത്ത് തിളപ്പിച്ച മോരിനോടൊപ്പവും ഈ ചൂർണ്ണം കഴിക്കാവുന്നതാണ്. മോരിലെ ലാക്ടിക് ആസിഡ് കുടലിലെ പ്രോബയോട്ടിക് അന്തരീക്ഷം മെച്ചപ്പെടുത്തുന്നതിനാൽ ഗ്രഹണി പോലുള്ള അസുഖങ്ങളിൽ ഈ രീതി വളരെ ഫലപ്രദമാണ്. രോഗിയുടെ ആരോഗ്യസ്ഥിതിയും ദഹനശേഷിയും വിലയിരുത്തി വൈദ്യന്റെ നിർദ്ദേശപ്രകാരവും ഈ ഔഷധം ഉപയോഗിക്കാവുന്നതാണ്.

ഡോ.പൗസ് പൗലോസ് 

(അസോസിയേറ്റ് പ്രൊഫസർ)