പുനർനവ

ആയുർവേദത്തിലെ അത്ഭുത ഔഷധവും ശാസ്ത്രീയ വശങ്ങളും

ആയുർവേദ ചികിത്സാ ശാസ്ത്രത്തിൽ ഏറ്റവും കൂടുതൽ ഉപയോഗിക്കപ്പെടുന്നതും അതീവ പ്രാധാന്യമർഹിക്കുന്നതുമായ ഒരു പ്രധാന ഔഷധസസ്യമാണ് തഴുതാമ. സംസ്കൃതത്തിൽ ഇതിനെ 'പുനർനവ' എന്നാണ് വിളിക്കുന്നത്. നശിച്ചുപോയ കോശങ്ങളെ പുനരുജ്ജീവിപ്പിക്കാനും, ശരീരത്തിന് പുതിയ ഉണർവും ആരോഗ്യവും നൽകാനുമുള്ള അസാധാരണമായ കഴിവുള്ളതുകൊണ്ടാണ് ഈ സസ്യത്തിന് പുനർനവ അതായത് ശരീരത്തെ വീണ്ടും പുതിയതാക്കുന്നത് എന്ന അർത്ഥം വരുന്ന പേര് ലഭിച്ചത്. 

ശാസ്ത്രീയമായി ബൊർഹാവിയ ഡിഫ്യൂസ എന്ന് അറിയപ്പെടുന്ന ഈ സസ്യം പ്രധാനമായും നീർക്കെട്ട്, വൃക്കരോഗങ്ങൾ, കരൾ രോഗങ്ങൾ എന്നിവയുടെ ചികിത്സയ്ക്കായി വ്യാപകമായി ഉപയോഗിച്ചുവരുന്നു. ആയുർവേദ ഗ്രന്ഥങ്ങൾ തഴുതാമയെ പ്രധാനമായും വെളുത്ത തഴുതാമ അഥവാ ശ്വേത പുനർനവ എന്നും, ചുവന്ന തഴുതാമ അഥവാ രക്ത പുനർനവ എന്നും രണ്ട് ഇനങ്ങളായി തിരിച്ചിട്ടുണ്ട്. ഇവ രണ്ടും കാഴ്ചയിൽ സമാനമാണെങ്കിലും അവയുടെ ഔഷധഗുണങ്ങളിൽ നേരിയ വ്യത്യാസങ്ങൾ കാണാൻ സാധിക്കും.

തഴുതാമയുടെ ആയുർവേദ ഗുണധർമ്മങ്ങളെക്കുറിച്ച് പ്രതിപാദിക്കുമ്പോൾ പ്രധാനമായും വെളുത്ത തഴുതാമയുടെ സവിശേഷതകൾ മനസ്സിലാക്കേണ്ടതുണ്ട്. വെളുത്ത തഴുതാമയ്ക്ക് കടു, തിക്തം, കഷായം, മധുരം എന്നീ നാല് രസങ്ങളാണുള്ളത്. ഗുണത്തിൽ ഇത് ദഹിക്കാൻ എളുപ്പമുള്ളതും എന്നാൽ അല്പം വരണ്ട സ്വഭാവം കാണിക്കുന്നതുമാണ്. ഉഷ്ണ വീര്യമുള്ള ഇത് ദഹനാനന്തരം മധുരവിപാകമായി മാറുന്നു. ശ്വേത പുനർനവ പ്രധാനമായും ശരീരത്തിലെ കഫ, വാത ദോഷങ്ങളെ ശമിപ്പിക്കുന്നതിനും, മൂത്രവിസർജ്ജനം സുഗമമാക്കുന്നതിനും, നീർക്കെട്ട് ഇല്ലാതാക്കുന്നതിനും ഏറ്റവും മികച്ച ഒരു ഔഷധമായി കണക്കാക്കപ്പെടുന്നു. ശരീരത്തിന് യൗവനം നിലനിർത്താൻ സഹായിക്കുന്ന മികച്ച ഒരു രസായന ഔഷധം കൂടിയാണിത്.

ശരീരത്തിലുണ്ടാകുന്ന നീർക്കെട്ട് അഥവാ ശോഫം മാറ്റുക എന്നതാണ് തഴുതാമയുടെ ഏറ്റവും പ്രധാനപ്പെട്ട ഉപയോഗവും ശാസ്ത്രീയമായ പ്രസക്തിയും. ഇതിൽ ധാരാളമായി അടങ്ങിയിട്ടുള്ള പുനർനവിൻ എന്ന സവിശേഷമായ ആൽക്കലോയിഡ് കോശങ്ങൾക്കിടയിൽ കെട്ടിക്കിടക്കുന്ന അമിതമായ ജലാംശത്തെ വലിച്ചെടുത്ത് പുറന്തള്ളാൻ സഹായിക്കുന്നു. ആധുനിക വൈദ്യശാസ്ത്രത്തിൽ ഉപയോഗിക്കുന്ന ഡൈയൂററ്റിക് മരുന്നുകൾ പ്രവർത്തിക്കുന്നതിന് സമാനമായാണ് ഇത് പ്രവർത്തിക്കുന്നത്. വൃക്കകളുടെ പ്രവർത്തനം കാര്യക്ഷമമാക്കാൻ തഴുതാമയ്ക്ക് സവിശേഷമായ കഴിവുണ്ട്. സാധാരണ ഡൈയൂററ്റിക് മരുന്നുകൾ ദീർഘകാലം ഉപയോഗിക്കുമ്പോൾ ശരീരത്തിൽ നിന്ന് പൊട്ടാസ്യം പോലുള്ള അവശ്യ ലവണങ്ങൾ നഷ്ടപ്പെടാൻ സാധ്യതയുണ്ട്. എന്നാൽ പുനർനവ തികച്ചും സുരക്ഷിതമായ ഒരു ഔഷധമാണ്. ഇത് വൃക്കകളിലെ ഗ്ലോമറുലാർ ഫിൽട്രേഷൻ റേറ്റ് വർദ്ധിപ്പിക്കുകയും മൂത്ര തടസ്സം ഇല്ലാതാക്കുകയും ചെയ്യുന്നു.

കരളിന്റെയും ഹൃദയത്തിന്റെയും ആരോഗ്യത്തിന് ഏറ്റവും ഹിതകരമായ ഔഷധങ്ങളിൽ മുൻപന്തിയിലാണ് തഴുതാമയുടെ സ്ഥാനം. ഫാറ്റി ലിവർ, മഞ്ഞപ്പിത്തം തുടങ്ങിയ അവസ്ഥകളിൽ കരൾ കോശങ്ങളെ സംരക്ഷിക്കാനും, ലിവർ എൻസൈമുകളുടെ പ്രവർത്തനം സാധാരണ നിലയിലാക്കാനും തഴുതാമ സഹായിക്കുന്നു. കരൾ രോഗങ്ങൾ മൂലം വയറ്റിൽ വെള്ളം കെട്ടിക്കിടക്കുന്ന അവസ്ഥയായ ഉദരരോഗം ശമിപ്പിക്കാൻ പുനർനവ അത്യുത്തമമാണ്. കൂടാതെ, ആയുർവേദത്തിൽ തഴുതാമയെ ഹൃദയത്തിന് ഗുണകരമായത് എന്നർത്ഥത്തിൽ 'ഹൃദ്യം' എന്ന് വിശേഷിപ്പിച്ചിരിക്കുന്നു. ഹൃദയപേശികളുടെ സങ്കോചവികാസ ശേഷി വർദ്ധിപ്പിക്കാൻ ഇത് സഹായിക്കുന്നു. ഹൃദയത്തിന്റെ പമ്പിങ് തകരാറിലാകുമ്പോൾ ശരീരത്തിൽ ഉണ്ടാകുന്ന നീർക്കെട്ട് കുറയ്ക്കാനും, ഹൃദയത്തിലേക്കുള്ള അമിതഭാരം കുറയ്ക്കാനും ഇതിലെ ആക്ടീവ് ഘടകങ്ങൾ കാര്യമായി സഹായിക്കുന്നു.

രക്തക്കുറവ് അഥവാ പാണ്ഡുരോഗ ചികിത്സയിൽ തഴുതാമ വളരെ പ്രധാനപ്പെട്ട ഒരു പങ്കുവഹിക്കുന്നുണ്ട്. ഇത് അസ്ഥിമജ്ജയെ ഉത്തേജിപ്പിക്കുകയും അതുവഴി ചുവന്ന രക്താണുക്കളുടെ ഉത്പാദനം വർദ്ധിപ്പിക്കുകയും ചെയ്യുന്നു. ഇതിന് പുറമെ ദഹനപ്രക്രിയ മെച്ചപ്പെടുത്തുന്നതിലൂടെ ആഹാരത്തിൽ നിന്നുള്ള ഇരുമ്പിന്റെ ആഗിരണം വേഗത്തിലാക്കാനും ഇത് സഹായിക്കുന്നു. ദഹനഗ്നിയെ ഉത്തേജിപ്പിക്കുന്നതിലൂടെ ആഹാരത്തോട് താല്പര്യം ഉണ്ടാക്കാനും തഴുതാമയ്ക്ക് കഴിയും. മലബന്ധം അകറ്റാനും കുടലിന്റെ ചലനം സുഗമമാക്കാനും സഹായിക്കുന്നതിനാൽ അർശസ്സ് അഥവാ പൈൽസ് ചികിത്സയിൽ ഇത് വ്യാപകമായി ഉപയോഗിച്ചുവരുന്നു. കുടലിലെ രക്തക്കുഴലുകളിലുണ്ടാകുന്ന മർദ്ദം കുറയ്ക്കാൻ ഇതിന്റെ ശോഫഹര ഗുണം ഏറെ പ്രയോജനകരമാണ്. 

ശരീരത്തിൽ കാലക്രമേണ അടിഞ്ഞുകൂടുന്ന രാസമാലിന്യങ്ങളെയും കൃത്രിമ വിഷങ്ങളെയും നിർവീര്യമാക്കി പുറന്തള്ളാനും തഴുതാമയ്ക്ക് കഴിയും. ആധുനിക ജീവിതശൈലിയിൽ ഭക്ഷണത്തിലൂടെയും മറ്റും ഉള്ളിലെത്തുന്ന ഇത്തരം മാലിന്യങ്ങളെ വൃക്കകളിലൂടെയും കരളിലൂടെയും അരിച്ചെടുത്ത് കളയാൻ പുനർനവയുടെ ആന്റിഓക്‌സിഡന്റ് ഘടകങ്ങൾ സഹായിക്കുന്നു. കൂടാതെ വൃഷണം, അർശസ്സ് തുടങ്ങിയ ഭാഗങ്ങളിലുണ്ടാകുന്ന വീക്കം അഥവാ വൃദ്ധി കുറയ്ക്കാനും ഇത് സഹായിക്കുന്നു. അവിടങ്ങളിലെ കോശങ്ങളിൽ കെട്ടിക്കിടക്കുന്ന ദ്രാവകം വലിച്ചെടുക്കുന്നതിലൂടെ വേദനയും വീക്കവും വേഗത്തിൽ ശമിക്കുന്നു.

ചുവന്ന പൂക്കളോടു കൂടിയ രക്ത പുനർനവ അഥവാ ചുവന്ന തഴുതാമയ്ക്ക് ഔഷധഗുണങ്ങളിൽ നേരിയ വ്യത്യാസങ്ങളുണ്ട്. പ്രധാനമായും കൈപ്പ് രസവും തണുപ്പ് സ്വഭാവവുമുള്ള ഇതിന് ശരീരത്തിലെ കഫദോഷത്തെയും, രക്തസ്രാവത്തോട് കൂടിയ രോഗങ്ങളെയും ശമിപ്പിക്കാനുള്ള സവിശേഷമായ കഴിവുണ്ട്. ആർത്തവ സംബന്ധമായ അമിതരക്തസ്രാവം, മൂക്കിൽ നിന്നുള്ള രക്തസ്രാവം തുടങ്ങിയ രക്തപിത്ത അവസ്ഥകൾ തടയാൻ ഇത് ഏറ്റവും മികച്ചതാണ്. എന്നാൽ ഇത് വാതദോഷത്തെ അല്പം വർദ്ധിപ്പിക്കുന്നതും, മലബന്ധം ഉണ്ടാക്കുന്നതുമായ സ്വഭാവം കാണിക്കുന്നതിനാൽ വയറിളക്കം പോലുള്ള അവസ്ഥകളിൽ ഉപയോഗപ്രദമാകാറുണ്ട്.

രോഗിയുടെ പ്രായം, രോഗാവസ്ഥ, ദഹനശേഷി എന്നിവ പരിഗണിച്ച് ആയുർവേദ ഡോക്ടറുടെ കൃത്യമായ നിർദ്ദേശപ്രകാരമാണ് പുനർനവ ഉപയോഗിക്കേണ്ടത്. ഇതിന്റെ വേര്, ഇല, തണ്ട് എന്നിവയെല്ലാം ഔഷധമായി ഉപയോഗിക്കുന്നുണ്ട്. 

തഴുതാമ സമൂലം ഇടിച്ചു പിഴിഞ്ഞെടുത്ത നീര് അഥവാ സ്വരസം പത്ത് മില്ലി മുതൽ ഇരുപത് മില്ലി വരെ ദിവസത്തിൽ രണ്ടുനേരം ഉപയോഗിക്കാവുന്നതാണ്. ഉണങ്ങിയ തഴുതാമ വേര് ചതച്ച് തിളപ്പിച്ചെടുത്ത കഷായം നാല്പതു മില്ലി മുതൽ അൻപതു മില്ലി വരെ ആഹാരത്തിന് മുൻപായി സേവിക്കാം. പുനർനവാദി കഷായം ഇതിന്റെ ഏറ്റവും മികച്ച ഉദാഹരണമാണ്. തഴുതാമ വേര് ഉണക്കിപ്പൊടിച്ച ചൂർണ്ണം മൂന്ന് ഗ്രാം മുതൽ ആറ് ഗ്രാം വരെ ഇളം ചൂടുവെള്ളത്തിലോ തേനിലോ ചേർത്ത് കഴിക്കുന്നത് വളരെ ഫലപ്രദമാണ്. ശരീരത്തിലുണ്ടാകുന്ന നീർക്കെട്ടുകൾക്കും സന്ധിവേദനകൾക്കും തഴുതാമയില അരച്ച് ലേപമായി പുറമെ പുരട്ടുന്നത് പെട്ടെന്ന് ആശ്വാസം നൽകും. സമ്പൂർണ്ണമായ ഒരു ഔഷധം എന്ന നിലയിൽ തഴുതാമ ശരീരത്തിലെ ദുഷിച്ച ദ്രവങ്ങളെ പുറന്തള്ളുക മാത്രമല്ല ചെയ്യുന്നത്, മറിച്ച് ഓരോ അവയവങ്ങൾക്കും പുതിയ ജീവൻ നൽകുകയും ശരീരത്തിന്റെ സ്വാഭാവികമായ സന്തുലിതാവസ്ഥ നിലനിർത്തുകയും ചെയ്യുന്നു.

ഡോ.പൗസ് പൗലോസ് 

(അസോസിയേറ്റ് പ്രൊഫസർ)